JOB 1 - Diospaj Shimi

Job shuti runaguta llaquicuna japishcatami villajun

¹ Uz shuti llactapimi, Job shuti runagu causajurca. Paica, ima pandatapash na ruraj, aligutalla ruraj, Taita Diostapash manllaj, nalita ruranamandaca anchurishca runami carca.

² Paica, canchis churicunata, quimsa ushicunatami charirca.

³ Paipaj jazindapica, canchis huaranga llamacunata, quimsa huaranga camellocunata, picha patsaj yunta huagracunata, picha patsaj burrocunata, servijcunatapash ashtacatapachami charirca. Indi llujshimuj ladopi causanajuj puramandaca, chai runami tucuita yali charij carca.

⁴ Paipaj churicunaca, paicuna huacharishca punlla pactajpimi, paicunapaj huasiman rishpa, tucuicuna jatun micuita ruran carca. Paicunapaj quimsa panicunatapash, paicunahuan micuchun, ufiachunmi cayachun cachan carca.

⁵ Chai jatun micui punllacuna tucurishca jipami, cashna ruran carca: Job runaguca, paipaj tucui huahuacuna Diospajlla tucushpa alichirichunmi, cachan carca. Paica, tutamandata jatarishpami, paipaj churicuna mashna churicuna cashcashnallata, Diosman animalcunata cushpa huañuchishpa, tucuillata rupachin carca. Job runaguca, cashnami nijurca: “Ñuca huahuacunaca, imapipash juchata rurarcapashchari. Taita Diostapash fiñashpa, paicunapaj shungupi nali shimicunata rimarcapashchari” nircami. Shina nishpami, fiesta tucurishca jipaca, punllandi chashna ruran carca.

⁶ Shuj punllami, Taita Diospaj churicunaca, pai Mandaj Diospaj ñaupajpi ricuringapaj shamurca. Paicuna purapica, Satanaspashmi shamurca.

⁷ Chaipimi Mandaj Diosca, Satanastaca: —¿Maimandata shamungui?— nirca. Shina nijpimi Satanasca, Mandaj Diosman cashna nishpa tigrachirca: —Alpa pachata muyushpa, chaipi purishpami shamuni— nircami.

⁸ Shina nijpimi Mandaj Diosca, Satanastaca cashna nirca: —Ñucata servij Job runataca, ima pandatapash na ruraj, aligutalla ruraj, Taita Diostapash manllaj, nalita ruranamanda anchurishca cajtaca, ¿nachu ali ricurcangui? Chai alpa pachapica, paishnaca pipash na tianllu— nircami.

⁹ Shina nijpimi Satanasca, Mandaj Diosman cashna nishpa tigrachirca: —Job runaca, ¿yangamandachu Taita Diosta manllan?

¹⁰ ¿Nachu canllata paitapash, paipaj huasi ucu puratapash, tucui imatalla pai charishcatapash, tucuilla muyundita cuidajungui? Paipaj maquihuan imata rurajpipash, ninandami bendiciarcangui. Chaimandami pai imata charishcacunaca, cai llactapica ninanda mirashca.

¹¹ Ashtahuangarin cunanda, cambaj maquita chutashpa, pai imatalla charishcacunata quichuyari. Shina rurajpica, ¿nachu candaca, cambaj ñaupajpillata nalicachishpa nali shimicunata rimanga?— nircami.

¹² Shina nijpimi Mandaj Diosca, Satanastaca cashna nirca: —Ricui, pai imatalla charishcacunaca cambaj maquipimi. Shina cajpipash paitalla, ama cambaj maquihuan tacaringui— nircami. Shina nijpica Satanasca, Mandaj Diospaj ñaupajmanda llujshishpa rircallami.

¹³ Shuj punllami, cashna tucurca: Job runagupaj churicunapash, ushicunapash, paicunapaj punda huauquipaj huasipimi micunajurca, vinotapash ufianajurca.

¹⁴ Chaipimi shuj villaj runa, Job runagupajman shamushpa cashna nishpa villajurca: —Huagracunaca yapunajurcami. Chai ladopillatami, burrocunapash micunajurca.

¹⁵ Chaipimi, sabeo nishca runacuna ñapash shamushpa, canda servijcunata japishpa, espadahuan huañuchirca. Chaita villangapaca, ñucallami quishpirircani— nijurcami.

¹⁶ Chai runa villajujpillatami, shuj runa chayamushpaca, cashna nirca: —Taita Diospaj nina jahua pachamanda urmamushpami, llamacunatapash, michij runacunatapash rupachishpa tucuchirca. Chaita villangapaca, ñucallami quishpirircani— nircami.

¹⁷ Chai runapash villajujpillatami, shuj runa chayamushpaca, cashna nirca: —Quimsapi shicanyarishca caldeocuna chayamushpami, camellocunata tandachishpa ñapash aisashpa rinajurca. Canda servijcunatapash, espadahuanmi huañuchirca. Chaita villangapaca, ñucallami quishpirircani— nircami.

¹⁸ Chai runapash villajujpillatami, shuj runa chayamushpaca, cashna nirca: —Cambaj churicunapash, ushicunapash paicunapaj punda huauquipaj huasipimi micushpa, vinotapash ufianajurca.

¹⁹ Chaipica, jichushca pamba ladomanda ninan acapana shamushpami, huasi chuscundi lado tigranacunapi huactarca. Shina huactajpi, chairalla viñaicunapaj jahuapi urmajpimi huañurca. Chaita villangapaca, ñucallami quishpirircani— nircami.

²⁰ Shinamandami Job runaguca jatarishpa, paipaj jahualla churajushcata liquishpa, umatapash aspirishpa, alpapi cungurishpa Diosta ninanda alicachirca.

²¹ Paica cashnami nirca: —Ñuca mamapaj vijsamandaca, lluchullami huacharircani. Lluchullallatami, alpaman tigrana cani. Mandaj Diosmi cararca, Mandaj Diosllatami quichurca. Mandaj Diospaj shutica, aligumari ni tucushca cachun— nircami.

²² Chai tucui llaquicuna shamujpipash, Job runaguca napacha juchataca rurarcachu. Taita Diostaca, ima nalitapash na rimarcachu.