ISAÍAS 1 - Diospaj Shimi

Juchatalla rurashpa causaj llactatami villajun

¹ Amoz shuti runapaj churi Isaiasca, muscuipishna ricushca. Paica, Judá llactapash, Jerusalenbash imalla tucunatami Uzías, Jotam, Acaz, Ezequías shuti jatun mandajcuna, Judá llactata mandajui huatacunapi cashna ricushpa villarca.

² Jahua pachapash, cai pachapash ali uyaichi. Mandaj Diosca, cashnami nin: “Cai huahuacunataca, ñucami viñachishpa jatunyachircani. Ashtahuangarin paicunaca, ñucata fiñashpami na cazunajurca.

³ Huagrapash, paipaj dueñota rijsinmi, burropash paipaj dueño rurashca corraltaca rijsinmi. Ashtahuangarin israelcunaca, na yuyaita japinllu. Ñuca agllashcacunaca, ñucataca na rijsinllu” ninmi.

⁴ ¡Aij, juchasapa gentecunalla! Cangunaca, nalitalla aparishca gentecuna, nali taitacunamanda miraicuna, cacharishca huahuacunami canguichi. Mandaj Diosta saquishpa, huashaman tigrashpami, israelcunapaj jucha illaj Diostaca ninanda fiñachinguichi.

⁵ ¿Imashpata ashtahuan llaquichi tucungapaj munanguichi? ¿Cangunaca, cunangamanllu na cazushpa catinajunguichilla? Umacamanmi chugrishca canguichi. Shungupipash, nanailla jundami canguichi.

⁶ Cangunaca, chaqui pundamanda umacaman maipi ima alipash illajmi canguichi. Ashtahuangarin chugrishpa, punguishca, carachayashcami ismunajunguichi. Cangunataca, pipash na jambishcachu, huatachitallapash na huatachishcachu. Ashata amujyachunllapash na aceiteta churashcachu.

⁷ Cangunapaj llactatapash tucuchishcami, pueblocunatapash rupachishcami. Cangunapaj pambacunapi fucushcatapash, shuj llactamanda shamujcunami, cangunapaj ñaupajpillata micushca. Na rijsishca runacunami, llaquinayaita jichushcata saquishca.

⁸ Sion shuti pueblollami, uvas chagra chaupipi shayachishca chugllashna shayajun. Melonguna fucuj yura chaupicunapi churashca chugllashnami quedashca, jichushca puebloshnami tucushca.

⁹ Tucuita Mandaj Dios huaquinllatapash ñucanchita na saquishca cajpica, Sodoma puebloshna, Gomorra puebloshnami canchiman carca.

Tucui shunguhuan llaquirishpa, Diospajman tigrarichunmi cayashca

¹⁰ Sodoma pueblota mandajcuna, Mandaj Dios rimashcata uyaichiyari. Gomorra pueblopi causajcuna, ñucanchi Taita Dios mandashcata ali uyaichiyari.

¹¹ Mandaj Diosca, cashnami nin: “Ashtaca animalcunata ñucaman cushpa canguna huañuchishcapash, ¿ñucapaca imapajta ali? Jari llamacunata cushpa tucuillata rupachishcatapash, virayashca huagracunapaj virata cushpa rupachishcatapash ña millanayachinimi. Huagracunata, jari llamacunata, chivocunata huañuchishpa cushca yahuartapash na munanichu.

¹² ¿Pita cangunataca, ñuca ñaupajman chaicunata apashpa shamushpa, ñuca huasi patiocunapi saruchun mandajunyari?

¹³ Imata ñucaman caranatapash, yangallataca na ashtahuan apamunachu canguichi. Inciensota cushnichishcatapash millanayanmi. Luna llullu punllacunapi, samana punllacunapi, canguna cayashpa tandanajushcatapash, napacha ricunayanllu. Cangunapaj jatun fiestacunapipash, jatun nalicunallami ricurin.

¹⁴ Luna llullu punllacunapi, jatun fiestacunapi tandanajuita canguna rurashcatapash, tucui shunguhuanmi fiñani. Chai tandanajuicunaca, ñucataca llashanmi. Chaicunataca ricujushpallatami shaijuni.

¹⁵ Cangunapaj maquica, huañuchishcamandami yahuarsapa. Shina cashcamandami, cangunapaj maquita vichai churanajujpi ama ricungapaca, ñuca ñavita ladoman churasha. Ninanda mañanajujpipash, napacha uyashachu.

¹⁶ Maillarinshna mapa illaj tucuichi. Jatun nalita canguna ruranajushcataca, ñuca ñaupajmanda anchuchichi. Nalita ruranataca, ña saquichi.

¹⁷ Alita ruranata yachajuichi. Aliguta ricushpa mandanata yachajunata mascaichi. Pita imata quichushpa llaquichishca cashpapash, tigrachinami canguichi. Taita mama illaj huahuagumambash, imatapash cashcatapacha ruraichi. Sapalla huarmigutapash ayudaichi” ninmi.

¹⁸ Mandaj Diosca, cashnatapashmi nin: “Cunanga, randimanda ricunajungapaj shamuichi. Cangunapaj juchacuna puca telashna cajpipash, rasutashna yurajllagumanmi tigrachisha. Yanalla puca telashna cajpica, cangunataca yuraj yuraj milmagumanshnami tigrachisha.

¹⁹ Ñuca rimashcata canguna uyangapaj munashpa uyashpaca, llactapi juyailla fucushcacunatami micunguichi.

²⁰ Ashtahuangarin jariyashpa napacha cazungapaj munashpaca, espadahuanmi tucuchi tucunguichi” nishpami, Mandaj Diosca paipaj shimihuambacha villarca.

Jerusalendaca, llaquichishpapash cutin alichingami

²¹ Diosta ali cazuj pueblolla, ¿imashpata culquimanda huainayaj huarmishna tigrarcanguiyari? Chaipica, tucuicunami imatapash cashcatapacha ruran carca. Imatapash aliguta rurajcunallami causarca. Ashtahuangarin cunanga, huañuchij runacunallami causanajun.

²² Cambaj juyailla culquipash, jirru ismushcamanmi tigrashca. Cambaj vinopash, yacuhuan chapushcami tucushca.

²³ Cambi causanajuj mandajcunaca, napacha cazujcunachu, shuhuacunapaj cumbacunami tucushca. Paicunaca, culquita pacalla japinatallami tucuicuna munan, imatapash pacalla cuchunllami purinajun. Taita mama illaj huahuamambash, na imatapash cashcatapacha ruranllu. Sapalla huarmigu imata villagrijpipash, na uyanayachinllu.

²⁴ Shinamandami israelcunaman ushaita cuj, tucuita Mandaj Jatun Diosca, cashna nin: “Jajai cunanga, ñucata fiñajcunataca llaquichishpapachami cushijusha. Ñucata na ricunayachij runacuna nalita rurashcashnallatami, paicunamambash tigrachisha.

²⁵ Ñuca maquihuan canda llaquichishpami, cambaj mapacunataca tucuillapacha maillashpa, cambaj tucui mapacunataca anchuchisha.

²⁶ Cambica, pundashnallatami ali juezcunata cutin churasha. Pundashnallatami, ali yuyaita cujcunatapash cutin churasha. Shina rurajpimi, candaca cutinllata cashna ninajunga: ‘Imatapash cashcatapacha ruraj Pueblo, Diosta ali cazuj Pueblo’ ninajungami.

²⁷ Sion shuti pueblotaca llaquichishpami, ñucapajman cutin tigrachisha. Chaipi causajcuna ñucapajman tigrarishcacunataca, imatapash cashcatapacha rurashpami quishpichisha.

²⁸ Ashtahuangarin jariyashpa na cazuj, juchasapacunataca tandachishpami tucuchisha. Mandaj Dios ñucata cungajcunaca, tucuillami tucuchi tucunga.

²⁹ Chashna rurajpimi, canguna juyashca encina nishca quirucunapash pingaichinga. Canguna agllashca huertacunapash, rimashpami pingaichinga.

³⁰ Cangunaca, fanga chaquishpa urmashca encina quirushnami tucunguichi. Yacu illaj huertashnami tucunguichi.

³¹ Ninan shinlli runapash, jupashnami canga. Pai imata rurashcapash, nina rupashpa zimbrajunshnami canga. Ishcandimi, tandachishpa rupachi tucunga. Chai ninataca, pipash na huañuchi ushangachu” ninmi.