HEBREOS 1 - Diospaj Shimi

Taita Dios paipaj Churimanda villashcami

¹ Taita Diosca, punda huatacunallatami ñaupa taitacunaman Dios ima nishcata villajcunahuan cutin cutin villachishpa, shujta shujta yarichishpa villajushca.

² Cunan cai tucurimui punllacunapica, Diospaj Churimandami ñucanchiman villajushca. Tucuita pailla mandajuchunmi, paipaj Churiman ushaita cushca. Diosca, paihuanmi ima tiachumbash tucuita rurashca.

³ Taita Dios punchapamba punchayachijujta, Diosllata imashna cajtapash paipaj Churimi, chashnapacha cajta ricuchijun. Paillatami, tucui imata cashpapash, ninan ushaihuan rimashpa cazuchishpa charijun. Chashna cashpami, ñucanchi juchacunata anchuchishpa, mapa illajta rurashca Chai jipaca, mandana ushaita charij, jahua pachapi tiajuj Diospaj ali ladopimi tiarirca.

⁴ Paica, angelcunatapash yali ushaitami charin. Chashna cashpami, angelcunapaj shutitapash yali ashtahuan juyailla shutiguta charin.

Diospaj Churica, angelcunatapash yalimi

⁵ Taita Diosca, ¿maijan angeltapash ima horallapash: “Canga, ñuca Churimi cangui. Cunan punllami, ñuca huahua cangui” nishcachu? ¿Shinallata: “Ñucami, paipaj Taita casha. Paica, ñuca Churimi canga” nishcachu?

⁶ Paipaj shujlla Churita, cai pachaman cachamushpaca: “Taita Diospaj tucui angelcuna, paita ninanda alicachinguichi ninimi” nishcami.

⁷ Angelcunamanda parlashpaca, cashnatapachami nijun: “Paipaj angelcunataca, espiritucunatami rurashca. Paipajta rurajcunataca, nina rupajujtashnami rurashca” nijunmi.

⁸ Ashtahuangarin paipaj Churimanda parlashpaca, cashnami nijun: “Taita Dioslla, can mandashpa tiarinaca, causaita causaicamanmi canga. Can mandana vara caspica, can mandajuj llactapaj ali cachun mandanami.

⁹ Imatapash cashcatapacha ruranatami juyashcangui. Nalita ruranataca millanayachishcanguimi. Shina cajpimi Taita Diosca, candaca aceiteta talishpa javirca. Paica, cambaj Taita Diosmi. Cambaj cumbacunatapash yali cushijuchunmi, shina rurarca” nijunmi.

¹⁰ Shinallata cashnatapashmi nijun: “Jatun Dioslla, canmi callaripica cai pacha tiachun rurarcangui. Jahua pachaca, cambaj maquihuan rurashcacunami.

¹¹ Chaicunaca tucuringami. Ashtahuangarin canga causajunguillami. Chai churashcacunaca, tucuillami churajunashna maucayanga.

¹² Chaicunataca, churajunata pillushpa saquinshnami, shuj mushujta churangui. Ashtahuangarin canga, canllatami cangui. Can causana huatacunapash, na tucuringachu” nijunmi.

¹³ Taita Diosca, ¿maijan angeltapash ima horallapash: “Canda na ricunayachijcunata can saruchun, cambaj chaquipi churangacaman, ñuca ali ladoman tiarilla” nishcachu?

¹⁴ ¿Nachu tucui angelcuna, Diospajta ruraj espiritucuna? ¿Nachu quishpirinata japishpa ringapaj shuyajcunata servinajuchun cachamushcacuna?