FILEMON 1 - Diospaj Shimi

Alillachu capangui nishcami

¹ Jesucristomanda villajushpa, prezu tiajuj Pablomi cani. Caitaca, huauqui Timoteondimi, can juyashca Filemonman escribimunchi. Canga, ñucanchihuan Diospajta rurajmi cangui.

² Shinallata Apia shuti juyashca paniguman, ñucanchi cumba, alipacha villaj Arquipo shuti huauquiguman, cambaj huasipi tandanajuj crijcunamambashmi, caitaca escribinchi.

³ Ñucanchi Taita Diospash, Apunchi Jesucristopash ninan juyaita, casilla ali causaiguta cangunaman carachunmi munanchi.

Alipacha crij cashpami, Filemón shuti runa juyaita charishca

⁴ Ñuca Taita Diosta mañajushpaca, canda yariashpami, pashi nijunilla.

⁵ “Apunchi Jesustami juyajun, alipacha crijmi, Diospajlla causajcunatapash, tucuillatami juyajun” nijtami, canmandaca uyarcani.

⁶ Can crishcata villajushcapash aliguta pactachunmi, Diosta mañajuni. Shinallata Cristo Jesusmanda imagutapash carashpa alita can rurajuchunmi mañajuni.

⁷ Cambaj juyaimandami, ñucanchipash ninandapachami cushijunajunchi. Quiquin huauquigumandami, Diospajlla causajcunapaj shungupash cushichi tucushca.

Pabloca, Onésimo shuti runagutaca cutin chasquipangui nishcami

⁸ Shina ali cajta yachashpami, Cristomanda ushaita charishpa, can imatalla rurachumbash mandai ushanilla.

⁹ Ashtahuangarin candaca juyashpami yarichijupani. Ña rucuyajuj Pablomi cani. Jesucristomanda villajushpami, cunangarin prezu tiajuni.

¹⁰ Caipi prezu tiajujpimi, Onésimo shuti runaguca crishpa, ñuca huahuashna tucurca. Paitaca canmanmi mingapani.

¹¹ Pundaca, Onésimo runaguca imapajllapash nalichu cashca. Ashtahuangarin cunanga, cambajpash, ñucapajpash ñami alipacha tucushca.

¹² Paitami cambajman cutin cachamujuni, ñucatashnalla chasquipangui ninimi.

¹³ Ali villaita villajushcamanda ñuca prezu tiajujpi, cambaj randi ñucata servishpa quedachunmi, Onésimo runagutaca munarcani.

¹⁴ Ashtahuangarin can nara imatapash nijpillata, ñuca munaita rurangapaca na munarcanichu. Ñucata ayudangapaj munashpaca, ama ñuca nijpilla rurashpa, ashtahuangarin cambaj munaita rurapanguilla ninimi.

¹⁵ Onésimo runaguca, cambaj huasimandaca ashacamanllami llujshishpa rijushcanga. Cunan can chasquijpica, causaita causaicamanmi canhuan causanga.

¹⁶ Ashtahuangarin ama cambaj gañandashna charishpa, huauquitashna juyashpa charipangui. Ñucapash, paitaca ninandami juyani. Apunchi Jesusta crij cajpimi, paitaca gañandapash yalita juyana cangui.

¹⁷ Ñucata cambaj cumba cajta yarishpaca, ñucatashna paitaca chasquipangui.

¹⁸ Pai imatapash nalita rurashpa llaquichijpi, na cashpaca divita cunata charijpica, ñucaman villahuanguilla. Paimandaca ñucami ricupasha.

¹⁹ Pablomi, ñuca maquihuambacha caitaca escribimuni. Paimandaca, ñucami tigrachipasha. Ashtahuangarin cambash ñucaman ruranatami charingui nishpaca, na yarichinichu.

²⁰ Ari huauquigu, Apunchi Jesusta crij cajpi ima alitapash canmanda japingapajmi munani. Apunchi Jesusta crij cashcamandaca, ñuca shungupi cushichihuangui nipanimi.

²¹ Ñuca nijujtaca, canga cazunapacha cajtaca yachanimi. Cai ñuca nijujtapash ashtahuan yalishpa ruranatapash yachashpami, caitaca escribimuni.

²² Ñucata mingachingapajpash alichijupangui. Ñucamanda canguna Diosta mañanajujta uyashpami, cangunapajman ñucata cachanata cushijushpa shuyajuni.

Aliguta causapanguichi, Diospash bendiciachun nishpami tucuchishca

²³ Cristo Jesusmanda villajushpa, ñucahuan prezu tiajuj Epafras shuti huauquipash, candaca alillachu capangui nijunmi.

²⁴ Ñucahuan Diospajta ruraj Marcos, Aristarco, Demas, Lucas shuti huauquicunapash, candaca alillachu capangui ninajunmi.

²⁵ Ñucanchi Apunchi Jesucristopaj ninan juyaica, cangunapaj espirituhuan cachunmi munani. Shina cachun.