ÉXODO 1 - Diospaj Shimi

Israelcunaca, Egiptopimi llaquita apanajushca

¹ Egiptoman Jacobohuan yaicuj israelcunapaj shuticunaca, caicunami. Paicunaca tucuicunami, paicunapaj familiacunandi yaicurca.

² Rubén, Simeón, Leví, Judá,

³ Isacar, Zabulón, Benjamín,

⁴ Dan, Neftalí, Gad, Aser shuticunami carca.

⁵ Jacobopaj tucui miraicunaca, canchis chungami carca. Joseca, Egiptopimi causajurca.

⁶ Josepash, tucuilla paipaj huauquicunapash, chai tucui miraicunapashmi huañurca.

⁷ Israelcunaca ashtahuan mirashpami, ninanda jundanajurca. Chashna miranajushpami, alipacha shinllicuna tucushpa llactapi jundanajurca.

⁸ Chai punllacunapimi Egiptopica, Joseta na rijsishca shuj mushuj jatun mandaj tiarirca. Chai mandajmi, chaipi causaj paipaj gentecunataca, cashna nijurca:

⁹ “Ricuichi, israelcunaca ñucanchita ashtahuan yali ashtacacunami. Paicunaca, ñucanchita yali ninan shinllicunami.

¹⁰ Cunanga, paicuna ama ashtahuan mirachunga, alipacha yarishpa paicunataca imatallapash rurashunchi. Ñucanchihuan jatun macanajui tiajpi paicunapash, ñucanchita fiñajcunahuan tandanajushpa ñucanchihuan macanajushpaca, cai llactamanda llujshishpa ringallami” nijurcami.

¹¹ Shina nijpimi, impuestota japishpa israelcunata ashtahuan llaquichinajuchun, shuj mandajcunata churarca. Shinallata imatapash alichina, Pitón shuti, Ramesés shuti pueblocunatami, Faraonman shayachinajurca.

¹² Ashtahuangarin chashna ashtahuan ninanda llaquichinajujpipash, ashtahuan mirashpami jundanajurca. Chaimandami Egiptopi causajcunaca, israelcunataca ninanda manllanajurca.

¹³ Egiptopi causajcunaca, israelcunataca ninan shinllitapachami servichishpa charirca.

¹⁴ Paicunataca, ninan shinllitapacha servichishpa charishpami, ninanda llaquichinajurca. Paicunataca turuta, ladrillota rurachishpa, pambapi imatalla ruranacunapi servichishpami charirca. Chaicunapica, imata rurachumbash shinllitapachami mandanajurca.

¹⁵ Egipto llactata jatun mandajca, hebreapura huarmicunata huahuata unguchij Sifra shuti, Fúa shuti huarmicunatami cashna nirca:

¹⁶ —Ima hora cashpapash, hebreapura huarmicunapajman huahuata unguchingapaj rishpa, jari huahua cajta ricushpaca huañuchinguichilla. Huarmi cajpica, causachun saquinguichilla— nircami.

¹⁷ Ashtahuangarin huahuata unguchij huarmicunaca, Taita Diosta manllashpami, Egipto llactata jatun mandaj mandashcashnaca na ruranajurca. Ashtahuangarin jari huahuacunatapashmi causachun saquinajurca.

¹⁸ Egipto llactata jatun mandajca, huahuata unguchij huarmicunata cayachun cachashpami cashna nirca: —Cangunaca, ¿imashpata chashna rurarcanguichi? ¿Imashpata jari huahuacunatapash, causachun saquircanguichi?— nircami.

¹⁹ Shina nijpimi huahuata unguchij huarmicunaca, Faraonman cashna nishpa tigrachinajurca: —Hebrea huarmicunaca, Egiptopi causaj huarmicunashnaca na canllu. Paicunaca shinllicuna cashpami, unguchij huarmi nara paicunapajman chayajpillata ungunlla— ninajurcami.

²⁰ Taita Diosca, chai unguchij huarmicunahuanga alitami rurajurca. Shinamandami israelcunaca, ashtahuan mirashpa ashtahuan shinllicuna tucunajurca.

²¹ Unguchij huarmicuna Taita Diosta manllashcamandami, paicunapaj familiacunata ashtahuan charichun alita rurarca.

²² Shinamandami Faraonga, tucuilla paipaj gentecunata cashna nishpa mandarca: “Jari huahuata ungujpica, jatun yacupi shitanguichilla. Tucui huarmi huahuacunataca, causachun saquinguichilla” nircami.