Jueces 1 - Ñawpaq Testamento Apurímac Llaqtanchispaq Este nisqa Lawpaq

Judá ayllu Simeón ayllupiwan rey Adoni-bezecta guerrapi vencesqankumanta

¹ Josueypa wañukapusqanpa qepantan Israelpa miraynin runakunaqa Señor Diosta tapukuranku khaynata: —Noqaykumantari, ¿mayqen kaq ayllutaq primerta rinqa, cananeo runakuwan guerrapi peleananpaqrí? nispanku.

² Hinaqtinmi Señor Diosqa contestaran khaynata: —Primertaqa Judá ayllun guerrapi peleaqqa rinqa. Noqaqa ñan chay allpataqa paypa makinman entreganiña, nispa.

³ Hinaqtinmi Judá ayllumanta runakunaqa wawqenku Simeón ayllumanta runakunata khaynata niranku: —Noqaykuwan kushka rispaykichisyá, tupawasqanku allpapi tiyaq cananeo runakunawan guerrapi peleayta yanaparamuwayku. Saynallataqmi noqaykupas tupasuqniykichis allpapi tiyaq runakuwan guerrapi peleaq riqtiykichis, qankunawan kushka rillashaqkutaq, nispanku. Chaymi Simeón ayllumanta runakunaqa aceptaranku, Judá aylluwan kushka rinankupaq.

⁴ Hinaqtinmi Judá ayllumanta runakuna guerrapi peleaq riranku. Hinaspan chay cananeo runakunata hinallataq ferezeo runakunatawan Señor Diospa yanapayninwan venceranku. Hinaspan paykunaqa chunka waranqa runakunata Bezec llaqtapi wañuchiranku.

⁵ Chay Bezec llaqtapin *rey Adoni-bezecwanpas tuparanku. Hinaspan chaypi guerrapi peleaspanku venceranku. Saynallataqmi cananeo runakunatapas hinallataq ferezeo runakunatapas vencellarankutaq.

⁶ Hinaqtinmi rey Adoni-bezecqa ishkapakuran. Ichaqa Israelpa miraynin runakunan qepanta qatispa ayparanku. Hinaspan chay reypa makinkunapi mama dedonkunata hinallataq chakinkunapi mama dedonkunatapas kuchuranku.

⁷ Chaymi chay rey Adoni-bezecqa khaynata niran: —Noqaqa ñawpaqtan qanchis chunka reykunapa makinkupi mama dedonkunata hinallataq chakinkupi mama dedonkunatapas kuchurani. Hinaspapas paykunaqa mesaymanta usuq mikhunata pallapakuspan mikhuranku. Saynata mama dedonkuta kuchusqaymantan Señor Diosqa noqatapas saynallatataq ruwawashan, nispa. Saynata ruwaruspankun, rey Adoni-bezectaqa Jerusalén llaqtaman aparanku. Hinaspan chay reyqa chay llaqtapi wañukapuran.

Judá ayllu runakuna Jerusalén llaqtata Hebrón llaqtatawan vencesqankumanta

⁸ Saynallataqmi Judá ayllumanta runakunaqa Jerusalén llaqtayoq runakunatapas guerrapi peleaspa vencellarankutaq. Hinaspan *espadawan llapallanta wañuchispanku chay llaqtatapas ninawan k'anayuranku.

⁹ Hinaspapas chaymantan Judá ayllumanta runakunaqa riranku, cananeo runakunawan guerrapi peleaq. Chay cananeo runakunaqa tiyaranku orqokunapi, Neguev lawpi hinallataq Sefela nisqa moqokunapi iman.

¹⁰ Saynallataqmi Judá ayllumanta runakunaqa rillarankutaq guerrapi peleaq Hebrón llaqtapi tiyaq cananeo runakunawanpas. Chay Hebrón llaqtapa ñawpaq sutinmi karan Quiriat-arba. Hinaspan chay llaqtapi wañuchiranku Sesaita, Ahimanta hinallataq Talmaitawan ima.

Otonielqa Debir llaqtata vencespa Acsa sutiyoq warmiwan casarakusqanmanta

¹¹ Chay Hebrón llaqtamantan Judá ayllu runakunaqa rillarankutaq, Debir llaqtapi tiyaq runakunawan guerrapi peleaq. Chay Debir llaqtapa ñawpaq sutinmi karan Quiriat-sefer.

¹² Chaymi Calebqa Judá ayllu runakunata khaynata niran: —Sichus pipas Quiriat-sefer llaqtata atacaspa vencenqa chayqa, Acsa sutiyoq ususiytan qosaq, warmin kananpaq, nispa.

¹³ Hinaqtinmi Calebpa sullk'a kaq wawqen Cenaz sutiyoq runapa wawan Otoniel, chay Quiriat-sefer llaqtata atacaspa, venceran. Chaymi Calebqa Acsa sutiyoq ususinta qoran Otonielpa warmin kananpaq.

¹⁴ Hinaspan Otonielqa chay casarakusqankumanta pusapushaqtinku, Acsa sutiyoq warminta convenceran, papan Calebmanta allpata mañakunanpaq. Chaymi Otonielpa warminqa montakusqan asnomanta uraykuran. Hinaqtinmi papan Calebqa khaynata tapuran: —¿Imatataq munashankirí? nispa.

¹⁵ Chaymi ususinqa papan Calebta khaynata niran: —Ama hina kaychu. Ñataq Neguev ch'inñeq desierto allpata qoykuwankiña chayqa, pukyukunayoq allpatapas qoykuwayyá, nispa. Hinaqtinmi Calebqa alto orqokunapi pukyu unukunata hinallataq uray lawkunapi pukyu unukunatawan ima Acsa sutiyoq ususinman qoran.

Judá ayllu Benjamín ayllupiwan vencesqanku llaqtakunamanta

¹⁶ Moisespa suegron Hobabqa ceneo runakunapa mirayninmantan karan. Paypa miraynin runakunan Judá ayllu runakunapiwan kushka “Palmerakuna” nisqanku llaqtanta pasaspanku, riranku Neguev lawpi Judá ayllupa ch'inñeq desierto lugarpi kaq allpankukama. Hinaspan chaypi tiyaq runakunawan kushka tiyaranku. Chay Neguev allpaqa kashan Arad llaqtapa cercanpin.

¹⁷ Chaymantan Judá ayllu runakunaqa Simeón ayllumanta runakunapiwan riranku Sefat llaqtaman. Hinaspan guerrapi peleaspa, chaypi tiyaq cananeo runakunata venceranku. Hinaspapas chay llaqtataqa thuñichispan mana imaman tukuchiranku. Chaymantapachan chay lugartaqa Horma sutiwan suticharanku (mana imaman tukuchisqankurayku).

¹⁸ Saynallataqmi Judá ayllumanta runakunaqa guerrapi peleaspanku vencellarankutaq Gaza llaqtata, Ascalón llaqtata hinallataq Ecrón llaqtatapas. Hinaspan dueñochakuranku chay llaqtakunata allpakunantinta.

¹⁹ Hinaspapas Judá ayllumanta runakunataqa Señor Diosmi yanaparan. Chayraykun paykunaqa orqokunapi tiyaq runakunata qarqospanku, chaypi tiyaranku. Ichaqa pampa uraykunapi tiyaq runakunataqa manan qarqoytaqa atirankuchu, chay runakunaqa guerrapi peleanankupaq fierromanta ruwasqa carretakunayoq kasqankurayku.

²⁰ Ichaqa Moisespa kamachisqanman hinan, Calebmanqa Hebrón llaqtata qoranku chaypi tiyananpaq. Chaymi Calebqa guerrapi peleaspa, chay llaqtamanta Anac sutiyoq hatun runapa kinsantin wawankunata mirayninkunatawan qarqoran.

²¹ Ichaqa Benjamín ayllumanta runakunaqa manan qarqoyta atirankuchu Jerusalén llaqtapi tiyaq jebuseo runakunataqa. Chaymi chay jebuseo runakunaqa paykunawan kushka tiyaranku chay tiempokama.

Joseypa mirayninkuna Betel llaqtata vencesqankumanta

²² Saynallataqmi Joseypa miraynin runakunapas Señor Dios yanapaqtin, guerrapi peleanankupaq Betel llaqtaman riranku.

²³ Chayraykun paykunaqa mandaranku wateqaq runakunata wateqamunankupaq. Chay Betel llaqtapa ñawpaq sutinmi karan Luz.

²⁴ Chay mandasqanku espía runakunan chay llaqtamanta huk runa lloqsimuqta rikuranku. Chaymi chay runata khaynata niranku: —Sichus qan rikuchiwankiku kay llaqtaman imaynatas haykunaykupaq chayqa, noqaykupas qantaqa khuyapayasqaykikun, nispanku.

²⁵ Hinaqtinmi chay runaqa imaynatas llaqtaman haykunankupaq rikuchiran. Chaymi Joseypa mirayninmanta Efraín aylluqa hinallataq Manasés ayllupas chay llaqtaman haykuspanku, *espadawan chaypi tiyaq llapallan runakunata wañuchiranku. Ichaqa chay llaqtaman imayna haykunankupaq willakuq runataqa llapallan familiantintan mana ni imanarankupashchu.

²⁶ Hinaqtinmi chay runaqa heteo runakunapa tiyasqanku allpaman ripuran. Hinaspan chay allpapi huk llaqtata hatarichiran. Chay llaqtapa sutintan Luz sutiwan suticharan. Chaymi chay llaqtataqa chay sutiwan reqsiranku kay (libro escribisqa kasqan) tiempokama.

Israelpa miraynin runakunapa mana vencesqanku llaqtakunamanta

²⁷ Ichaqa Manasés ayllumanta runakunaqa manan qarqoyta atirankuchu kay llaqtakunapi tiyaq runakunataqa: Bet-seán llaqtapi, Taanac llaqtapi, Dor llaqtapi, Ibleam llaqtapi, Meguido llaqtapi hinallataq chay llaqtakunapa uchuy llaqtachankunapi tiyaq runakunatapas. Chayraykun chay cananeo runakunaqa chay tiyasqanku llaqtakunallapi tiyaranku.

²⁸ Chaymantan ichaqa unay watakuna pasaruqtinña, Israelpa miraynin runakunaqa allin armasqa hinallataq allin kallpayoq karuspankuña, chay cananeo runakunataqa sasa llank'anakunapi llank'achiranku. Ichaqa chay cananeo runakunataqa manapunin paykuna ukhumantaqa qarqoyta atirankuchu.

²⁹ Saynallataqmi Efraín ayllumanta runakunapas Gezer llaqtapi tiyaq cananeo runakunataqa mana qarqoyta atirankuchu. Chaymi chay cananeo runakunaqa paykunawan kushka chay Gezer llaqtapi tiyaranku.

³⁰ Saynallataqmi Zabulón ayllumanta runakunapas mana qarqoyta atirankuchu Quitrón llaqtapi hinallataq Naalal llaqtapi tiyaq cananeo runakunataqa. Chaymi chay cananeo runakunaqa paykunawan kushka tiyaranku. Ichaqa unay watakuna pasaruqtinñan, paykunataqa sasa llank'anakunapi llank'achiranku.

³¹ Saynallataqmi Aser ayllumanta runakunapas mana qarqoyta atirankuchu kay llaqtakunapi tiyaq runakunata: Acopi, Sidonpi, Ahlabpi, Aczibpi, Helbapi, Afecpi hinallataq Rehob llaqtapi tiyaq runakunatapas.

³² Chaymi Aser ayllumanta runakunaqa chay cananeo runakunawan kushka tiyaranku, chay llaqtakunamanta mana qarqoyta atisqankurayku.

³³ Saynallataqmi Neftalí ayllumanta runakunapas mana qarqoyta atirankuchu Bet-semes llaqtapi hinallataq Bet-anat llaqtapi tiyaq cananeo runakunataqa. Chaymi chay cananeo runakunaqa paykunawan kushka chay llaqtakunapi tiyaranku. Ichaqa unay watakuna pasaruqtinñan, sasa llank'anakunapi llank'achiranku.

³⁴ Ichaqa Dan ayllumanta runakunan amorreo runakunata mana venceyta atispanku orqokunaman ayqekuspanku chaypi tiyaranku. Chay amorreo runakunaqa Dan ayllumanta runakunataqa manan permitirankuchu chay orqokunamanta urayamuspa, pampa uraykunapi tiyanankutaqa.

³⁵ Hinaspapas chay amorreo runakunaqa Israelpa miraynin runakuna paykunata mana venceyta atisqankuraykun, kay lugarkunapi tiyaranku: Heres orqopi, Ajalón llaqtapi hinallataq Saalbim llaqtapi ima. Ichaqa unay watakuna pasaruqtinñan, Joseypa mirayninmanta runakunapas allin armasqa hinallataq allin kallpayoq karuspankuña, chay amorreo runakunataqa sasa llank'anakunapi llank'achiranku.

³⁶ Chay amorreo runakunapa allpankupa linderonmi qallariran Acrabim wichaymanta asta Sela llaqtapa wichaynin q'asakama.