Joel 1 - Ñawpaq Testamento Apurímac Llaqtanchispaq Este nisqa Lawpaq

Langostakuna kay pachapi tukuy imata tukusqanmanta

¹ Kaytan Señor Diosqa Petuel sutiyoq runapa wawan Joelta rimapayaran.

² Hinaqtinmi Joelqa chay nacionpi tiyaq masin runakunata khaynata niran: —¡Kay nacionpi tiyaq jefekuna hinallataq kay nacionpi tiyaq runakunapas, kayta uyariychis! ¿Kawsasqaykichis tiempokunapi khayna pasasqanta rikurankichishchú? ¿Ñawpaq abueloykichiskunapa tiemponpi khayna pasasqankunata yacharankichishchú?

³ Qankunaqa wawaykichiskunamanyá willaychis. Wawaykichiskunataqyá wawankunaman willachunku. Wawaykichiskunapa wawankunataqyá qepa mirayninkunaman willachunku.

⁴ Langostakunan phuyu hina ashkallaña hamuspa mikhurparin. Chay langostakunapa puchuntataqmi uña langostachakuna hamuspa mikhurparin. Chay uña langostachakunapa puchuntataqmi lat'aq urukuna mikhurparin. Chay lat'aq urukunapa puchuntataqmi sillwi urukunañataq mikhurparin.

⁵ ¡Llapallan mach'asqa runakuna, rikch'arispa qaparqachaychis! ¡Llapallan vinota tomaq runakuna, waqaychis! ¡Mana poqosqa vinoykichispas qankunamanta qechusqa kasqanrayku waqaychis!

⁶ Langosta urukunaqa nacionniytan atacaramunku mana yupay atina atiyniyoq ejército tropakuna hinaraq. Paykunapaqa leonpa kirun hinaraqmi kirunkunapas; china leonpa hinaraqmi waqsankunapas.

⁷ Chay langosta urukunaqa uvas chakraykunatan purunyarachin. Higos sach'aykunatapas k'utuspan lliwta k'umparunku; ramankunatapas yuraqllatañan khashkarunku.

⁸ Llaqtaypi tiyaq runakuna waqaychis, imaynan sipas warmipas qosan wañuqtin qashqa p'achawan churakuspa waqan chay hinata.

⁹ Señor Diospa *templonpiqa kawsay ruru ofrendakuna hinallataq ch'aqchunapaq vino ofrendakunapas manañan kanñachu. Chaymi Señor Diosta serviq *sacerdotekunaqa waqashanku.

¹⁰ Campokunaqa purunyasqan kashan. Allpakunaqa lutosqa hinañan kashan. Trigo cosechapas manañan kanñachu. Uvas sach'akunapas ch'akirapunñan. Olivos sach'akunapas ñaq'erapunmi chaymi aceitepas manaña kanñachu.

¹¹ Chakrapi llank'aqkuna, campopi uvaskunata plantaspa llank'aqkuna, trigomantawan cebadamantawan waqaychis, chakrakunapi wiñaq cosechakuna perdesqanrayku.

¹² Uvas sach'akunaqa ch'akirapunmi. Higos sach'akunapas ñaq'erapunmi. Granada sach'apas, palmera sach'apas, manzana sach'apas hinallataq campopi kaq llapallan sach'akunapas ch'akirapunmi. Llapallan runakunapa kusikuyninpas lliwmi chinkarapun.

¹³ Sacerdotekuna, qashqa luto p'achawan churakuspayá waqaychis. *Altarkunapi serviqkunapas, lutokuspayá waqaychis. Señor Diosniyta serviqkunapas, qashqa p'achawan p'achakuychis. Hinaspa temploman hamuspa llakikuymanta waqaychis, kawsay ofrendakuna Señor Diospa templonpi manaña kasqanrayku hinallataq ch'aqchunapaq vino ofrendakunapas manaña kasqanrayku.

¹⁴ Ayunota ruwaychis. Nacionpi runakunata huñumuychis. Señor Diosta yupaychana templomanyá liderkunata hinallataq nacionpi llapallan tiyaq runakunatawan huñumuychis. Hinaspa Señor Diosta qaparisparaq ruegakuychis.

¹⁵ ¡Ay, imayna manchakuyraqmi chay p'unchawqa kanqa! Señor Diospa castiganan p'unchawqa chayaykamushanñan. Tukuy Atiyniyoq Señor Diospa destruinan p'unchawqa chayamushanñan.

¹⁶ Qawashaqtinchismi mikhunataqa qechuruwanchis. Señor Diosninchispa templonpi kusikuyninchisqa manañan kanñachu.

¹⁷ Tarpusqa mukhupas wachupin ismurun. Trigopas manañan cosechanapaqqa kanñachu. Chayraykun cosechata waqaychana wasikunapas thuñichisqa kashan.

¹⁸ Ima khuyaytan wakakunaqa purispanku, mikhunankupaq pasto mana kaqtin waqashanku. Ovejakunapas pastomantan tulluyaspa ñak'arishanku.

¹⁹ Señor Diosnilláy, qanllatan waqyakamuyki. Ch'inñeq desiertopi pastokunatan nina rupharun. Campokunapi sach'akunatapas rawrashaq ninan rupharapun.

²⁰ Campopi salqa animalkunapas qanmanmi qaparimusunkiku. Wayq'okunapi unukunapas ch'akirapunmi. Pastokunatapas lliwtan nina rupharapun.