Job 1 - Ñawpaq Testamento Apurímac Llaqtanchispaq Este nisqa Lawpaq

Jobman sasachakuykuna hamusqanmanta

¹ Uz *nacionpin tiyaran Job sutiyoq runa. Payqa mana pantaq justo runan karan. Payqa allin kaqkunata ruwaqmi karan. Payqa tukuy sonqonwan Señor Diosta manchakuq runan karan. Hinaspapas payqa mana allin ruwaykunamanta karunchakuspan kawsaran.

² Paypaqa qanchis qari wawankuna hinallataq kinsa ususinkunan karan.

³ Hinaspapas paypaqa karanmi qanchis waranqa (7,000) ovejankuna, kinsa waranqa (3,000) *camellonkuna, pishqa pachak (500) masa toronkuna hinallataq pishqa pachak (500) china asnonkunapas. Saynallataqmi paypaqa kallarantaq ashka sirvienten runakunapas. Chayraykun Jobqa intipa lloqsimunan law nacionkunapi tiyaq runakumantaqa aswan más qapaq karan.

⁴ Jobpa qari wawankunaqa sapankamankun costumbrenkuman hina turnonpi huk banqueteta wasinkupi ruwaranku. Chaypaqmi paykunaqa kinsantin hermanankunata paykunawan kushka mikhunankupaq hinallataq tomanankupaq waqyachimuranku.

⁵ Jobqa wawankuna chay banqueteta ruwayta tukuruqtinkun, wawankunata waqyachimuspa ch'uyancharan. Payqa tutallanmanta hatarispan, sapankama wawankunamanta lliw k'anana *sacrificio ofrendakunata sapa kutin Señor Diosman ofreceran, khaynata piensaspa: “Ichapashchá wawaykunaqa huchallirukunku. Ichapashchá wawaykunaqa sonqonku ukhupi Señor Diosta k'amirunku”, nispa.

⁶ Huk p'unchawmi Señor Diosta serviq *angelkuna paypa kasqanman presentakamuranku. Saynallataqmi Satanaspas acusananpaq paykunawan kushka presentakamullarantaq.

⁷ Hinaqtinmi Señor Diosqa Satanasta khaynata tapuran: —Qanri, ¿maymantataq hamushankí? nispa. Hinaqtinmi Satanasqa khaynata contestaran: —Noqaqa enteron allpa pachata muyumusqaymantan hamushani, nispa.

⁸ Chaymi Señor Diosqa Satanasta khaynata tapuran: —Qanri ¿noqata serviqniy Jobta manachu rikumurankí? Pay hinaqa manan pipas allpa pachapiqa kanchu. Payqa allin justo runan. Payqa allin kaqkunata ruwaqmi. Payqa tukuy sonqonwan noqa Señor Diosta manchakuq runan. Hinaspapas payqa mana allin ruwaykunamanta karunchakuspanmi kawsan, nispa.

⁹ Hinaqtinmi Satanasqa Señor Diosta khaynata contestaran: —Jobqa manan qantaqa gratisllachu servisunki, aswanqa imapasraykullan.

¹⁰ Qanqa payta, familiankunata hinallataq ima kapuqninkunatapas alli-allintan cuidanki, saynapi mana imapas pasananpaq. Saynallataqmi qanqa tukuy ima ruwasqankunapipas yanapanki. Chayraykun paypa animalninkunaqa anchallataña mirarun.

¹¹ Ichaqa sichus llapallan kapuqninkunata qechurunki chayqa, qan rikushaqtiykin ñawpaqniykipi ñakasunki, nispa.

¹² Chaymi Señor Diosqa Satanasta khaynata niran: —Sayna kaqtinqa, Jobpa llapallan kapuqninkunawanyá ima munasqaykita ruwamuy. Ichaqa aman paytaqa tupaykunkichu, nispa. Chaymi Satanasqa Señor Diospa ñawpaqninmanta lloqsitamuran.

¹³ Huk p'unchawmi Jobpa qari wawankunaqa hinallataq ususinkunapas kurak kaq wawqenkupa wasinpi mikhusharanku hinallataq vinotapas tomasharanku.

¹⁴ Hinaqtinmi huk runa Jobpa kasqanman hamuspa khaynata willaran: —Chakratan torokunawan yapusharayku. Saynallataqmi china asnokunapas chay chakrapa ladonpi mikhusharanku.

¹⁵ Chayllamanmi Sabá lawmanta runakuna qonqayllamanta rikhurimuspa atacawaranku. Hinaspan serviqniyki runakunata llapallanta *espadawan wañuchispanku, llapallan animalkunatapas qatiritakamunku. Noqallañan ishkaparakamuni, chaykunamanta qanman willanaypaq, nispa.

¹⁶ Chay runa manaraq willayta tukushaqtinmi, huk runañataq chayamullarantaq. Hinaspan khaynata willaran: —Rayon llapallan michiqkunata hinallataq ovejakunatapas hap'irpaspa wañurparichin. Noqallañan ishkaparakamuni, chaykunamanta qanman willanaypaq, nispa.

¹⁷ Chay runapas manaraq willayta tukushaqtinmi, huk runañataq chayamullarantaq. Hinaspan khaynata willaran: —Caldea nisqa lawmanta runakunan kinsa grupopi hamuspanku atacawaranku. Hinaspan serviqniyki runakunata llapallanta *espadawan wañuchispanku, llapallan camellokunata aparikunku. Noqallañan ishkaparakamuni, chaykunamanta qanman willanaypaq, nispa.

¹⁸ Chay runapas manaraq willayta tukushaqtinmi, huk runañataq chayamullarantaq. Hinaspan khaynata willaran: —Wawaykikunan ususiykikunapiwan kurak wawaykipa wasinpi mikhusharanku hinallataq vinotapas tomasharanku.

¹⁹ Chayllamanmi qonqayllamanta ch'inñeq desierto lawmanta nishu wayra hamuspa, wasita tawantin esquinanmanta paykunapa hawanman thuñiykachiran. Hinaspan paykunataqa llapankuta ñit'ispa wañurachin. Noqallañan ishkaparakamuni, chaykunamanta qanman willanaypaq, nispa.

²⁰ Hinaqtinmi Jobqa sayarispa llakikuymanta p'achanta llik'ikuran hinallataq chukchantapas q'alata rutukuran. Hinaspan pampapi qonqorikuspa Señor Diosta yupaycharan.

²¹ Hinaspan khaynata niran: —Noqaqa q'alallan mamaypa wiksanmantaqa nacemurani. Q'alallataqmi wañukapusaqpas. Señor Diosmi tukuy imatapas qoykuwaran. Señor Diosllataqmi qechurakapuwan. Señor Diospa sutinqa yupaychasqayá kachun, nispa.

²² Tukuy chaykuna pasashaqtinpas, Jobqa manan huchallikuranchu. Nitaqmi payqa Señor Diospa contranpiqa ni imatapas rimaranchu.