Ezequiel 1 - Ñawpaq Testamento Apurímac Llaqtanchispaq Este nisqa Lawpaq

Señor Diosta trononpi tiyashaqta Ezequiel rikusqanmanta

¹ Kinsa chunka watapa tawa kaq killanpa pishqa kaq p'unchawninpin, preso apasqa kaq runakunapiwan Quebar sutiyoq mayupa patanpi noqa Ezequiel kasharani. Chaypin hanaq pachata kicharikushaqta rikurani. Hinaspan Señor Diosmanta huk *visionta rikurani.

² *Rey Joaquín preso apasqa kasqanmanta pishqa watapi, tawa kaq killapa, pishqa kaq p'unchawninpin,

³ Buzi sutiyoq runapa wawan noqa *sacerdote Ezequielqa Babilonia nacionpi kaq Quebar nisqa mayupa patanpi kasharani. Chaypin Señor Diosqa atiyninta noqaman qowaran.

⁴ Chaymi qawariqtiy *norte lawmanta nishu wayra hamuyushasqa. Saynallataqmi admirakuypaq phuyupas ninawan p'istusqa hamushasqa. Chaypa muyuriqninpitaqmi rayo hinaraq k'ancharishasqa. Chay k'ancharishaq ninapa chawpinpitaqmi broncemanta hina huk k'ancharishaq metalta rikurani.

⁵ Chaypa chawpinpitaqmi rikurani tawa kawsaqkunata. Chay kawsaqkunaqa runamanmi rikch'akusqaku.

⁶ Chaykunaqa sapankamankun tawa uyayoq hinallataq tawa raphrayoq kasqaku.

⁷ Piernankutaqmi kasqa derecholla; chakinkutaqmi torillopa situn hina kasqa. Chay chakinkuqa sumaq llushk'achasqa bronce hinaraqmi k'ancharisqa.

⁸ Chay tawa kawsaqkunapa tawantin raphrankupa pachanpin runapa makin hina makinkupas kasqa. Uyankupas hinallataq raphrankupas tawantin lawpin kasqa.

⁹ Sapankamankupa raphrankun tupanakusqa. Purispankupas manan may lawmanpas kutirisqakuchu. Aswanmi ñawpaqllaman derechota purisqaku.

¹⁰ Chay tawantin kawsaqkunapa uyankuqa khaynan kasqa: Ñawpaqnin lawman uyanmi runapa uyan hina kasqa; phaña lawninpi uyantaqmi leonpa uyan hina kasqa; lloq'e lawninpi uyantaqmi toropa uyan hina kasqa; qepa lawninpi uyantaqmi ankapa uyan hina kasqa.

¹¹ Saynan kasqa chay kawsaqkunapa uyankuqa. Ishkay raphrankunan kicharikuspa altoman sayasqa. Ishkay raphrankuwanmi paykunapura tupanakusqa. Ishkay kaq raphrankuwantaqmi cuerponkuta tapakusqaku.

¹² Chay kawsaqkunaqa ñawpaqmanmi derechota purisqaku. Paykunaqa espiritupa pusasqanman hinan purisqaku. Paykunaqa mana maymanpas kutirispan purisqaku.

¹³ Chay tawantin kawsaqkunapa rikch'ayninqa rawrashaq nina sansa hinan kasqa. Paykunapa chawpinpin rawrashaq mecherokuna hina kay lawman waq lawman purisqaku. Chay nina rawrayqa anchatan k'anchasqa; chaypa chawpinmantataqmi llatakyaq rayo hinaraq k'anchariy lloqsimusqa.

¹⁴ Chay tawantin kawsaqkunaqa rayo hinaraqmi kay lawman waq lawman phawasqaku.

¹⁵ Chay tawantin kawsaqkunata qawarispaymi, pampapi sapankamapa ladonpi huk ruedata rikurani.

¹⁶ Chay tawantin ruedakunaqa igualkaman kasqa, k'ancharishaq *topacio rumimantapas ruwasqa kashanman hina. Sapankama ruedan huk ruedamanpas winasqa kashanman hina kasqa.

¹⁷ Chay ruedakunaqa tawantin lawmanmi derechollata avanzasqaku.

¹⁸ Chay ruedakunapa aronkunaqa sapankaman hatu-hatun mancharikuypaq kasqa. Chay arokunapa muyuriqninpitaqmi k'ancharishaq ñawikuna hunt'allaña kasqa.

¹⁹ Chay kawsaqkuna puririqtinkuqa, ruedakunapas paykunawan kushkan avanzallasqakutaq. Chay kawsaqkuna phawaqtinkupas, chay ruedakunapas phawallarankutaqmi.

²⁰ Chay kawsaqkunaqa espiritupa pusasqanman hinan purisqaku. Paykunawan kushkan chay ruedakunapas altoman oqarikuranku. Saynataqa oqarikuranku chay kawsaqkunapa espiritun chay ruedakunapi kasqanraykun.

²¹ Chay kawsaqkuna puririqtikun ruedakunapas puririllarankutaq; chay kawsaqkuna sayaqtinkupas, chay ruedakunapas sayallarankutaqmi. Saynallataqmi chay kawsaqkuna altoman phawaqtinkuqa, chay ruedakunapas phawallarankutaq. Saynaqa pasaran, chay kawsaqkunapa espiritun chay ruedakunapipas kasqanraykun.

²² Chay kawsaqkunapa umanku hawanpitaqmi huk hatun k'ancharishaq cristal hina bóveda kasqa.

²³ Chay bolapa pachanpitaqmi chay kawsaqkunapa raphran kicharisqa derecholla kashasqa, hukninmanta hukninman tupanakuq. Ishkay kaq raphrankuwantaqmi sapankamanku cuerponkuta tapakusqaku.

²⁴ Chay kawsaqkuna puririqtinkutaqmi, raphrankupa raph-raphyaspa bulla ruwasqanta uyarirani. Chay bullaqa hatun mayupa qaparisqan hina otaq Tukuy Atiyniyoq Diospa voznin hina otaq ashkallaña ejército soldadokunapa bulla ruwasqanku hinan uyarikuran. Chay kawsaqkuna sayaykuqtinkutaqmi raphrankunapas uraykullarantaq.

²⁵ Chay kawsaqkuna sayaqtinkun hinallataq raphrankuta uraykachiqtinkun, umanku hawapi cristal hina bóveda hawanmanta huk qapariy uyarikuran.

²⁶ Chay cristal hina bolapa hawanpin sumaq k'ancharishaq *zafiro rumimanta ruwasqa *tronota hina rikurani. Chay tronopitaqmi huk runaman rikch'akuq tiyashasqa.

²⁷ Cinturanmanta wichaymanmi rikukusqa sumaq k'ancharishaq bronce hina. Chay bronceqa nina rawraywan muyuriykusqan kasqa. Cinturanmanta uraymantaqmi nina rawrayman rikch'akuqta hina rikurani. Enteron muyuriqnintaqmi anchapas sumaqta k'ancharisqa.

²⁸ Chay muyuriqninpi k'anchariyqa k'uychimanmi rikch'akusqa, imaynan chirapamuqtin phuyumanta rikhurimun k'uychi chay hina. Saynatan Señor Diospa k'anchariynin rikhuriykuwaran. Chayta rikuspaymi qonqorikuspa pampakama k'umuykurani. Hinaspan huk voz rimapayawasqanta uyarirani.