Eclesiastés 1 - Ñawpaq Testamento Apurímac Llaqtanchispaq Este nisqa Lawpaq

Kay pachapi tukuy imapas tukukuqlla kasqanmanta

¹ Predicadorqa *rey Davidpa wawanmi karan. Paymi Jerusalén llaqtapi rey kashaspa khaynata niran:

² “¡Kay pachapiqa tukuy imapas yanqapaqmi! ¡Tukuy imapas tukukuqllan!”, nispa.

³ Runari ¿ima provechotataq orqon kay pachapi sapa p'unchaw ñak'arispa llank'asqanmantarí?

⁴ Wakinmi nacemushan; wakintaqmi wañupushan. Ichaqa kay allpa pachaqa kaqllan kashan.

⁵ Intin lloqsiykamun. Intin haykupun. Intiqa maymanta lloqsimunanmanmi apurayllaman kutin, kaqmanta lloqsimunanpaq.

⁶ Wayraqa *sur nisqa lawmanmi wayran; chaymantataqmi *norte nisqa lawman muyun. Wayraqa muyu-muyurispan mana tukukuyta wayran, kaqmanta muyu-muyurispa wayramunanpaq.

⁷ Mayukunaqa llapallanmi *lamar qochaman rin. Ichaqa lamar qochaqa manan hunt'anchu. Mayukunaqa maymantan hamuran, chaymanmi kutin, kaqmanta hamunanpaq.

⁸ Tukuy imakunan runataqa pisipachin. Runakunaqa chay pisipaykunamantaqa manan explicayta atinchu. Ñawiqa manan qawasqanwanqa pisipanchu. Nitaqmi ninripas uyarisqanwanqa pisipanchu.

⁹ Imas pasaran, chayllataqmi pasanqa. Imas ruwasqa karan, chayllataqmi ruwasqa kanqa. Kay pachapiqa manan imapas mosoqqa kanchu.

¹⁰ Pipas ninmanmi khaynata: “Kayqa mosoqmi”, nispa. Ichaqa chaykunaqa ñawpaq tiempomantapacharaqmi ña karanña.

¹¹ Ñawpaqtaraq tukuy ima pasaqkunataqa ñan qonqankuña. Saynallataqmi qepa tiempopi pasaqkunatapas qepa tiempopi naceqkunaqa qonqanqaku.

Predicadorta imakunas pasasqanmanta

¹² Noqa Predicadormi *rey kaspay, Jerusalén llaqtamanta Israel *nacionta gobiernarani.

¹³ Hinaspan noqaqa tukuy sonqoywan investigaspa, yachaywan allinta estudiarani kay pachapi tukuy ima ruwasqa kasqanmanta, saynapi chaykunamanta allinta yachanaypaq. Señor Diosqa runakunamanmi sasa llank'anakunata qoran, chay llank'aykunapi ocupakunankupaq.

¹⁴ Noqaqa kay kawsay vidapi tukuy ruwasqankuta qawaspaymi, cuentata qokurani chaykunaqa yanqapaq kasqanta hinallataq sonqota llakichiq kasqanta.

¹⁵ Q'ewisqa kaqtaqa manan derechaytaqa atisunmanchu. Mana kaqtaqa manan yupaytaqa atisunmanchu.

¹⁶ Noqaqa sonqoypin khaynata piensarani: “Noqaqa kaypin kashani. Noqaqa Jerusalén llaqtapi ñawpaq gobiernaqkunamantapas aswan más importante hinallataq aswan más yachayniyoq runan kani. Noqaqa tukuy sonqoywanmi tukuy yachaykunataqa yacharani”, nispa.

¹⁷ Noqaqa tukuy sonqoywanmi yachayta entiendenaypaq dedicakurani. Hinaspapas noqaqa roqro uma runa kayta hinallataq mana yuyayniyoq kaytapas allintan yachani. Noqaqa cuentatan qokurani, chaypas sonqota llakichiq kasqanta.

¹⁸ Kayqa cheqaqpunin: ancha yachayniyoq kayqa, ancha uma nanaytan apamun. Astawanraq yachaqqa, astawanmi ñak'arinqa.