ZEFANIA 1 - IBIBILIA INDAKATIFU

Eshinyasio eshia OMWAMI Nyasaye khu Yuda

¹ OMWAMI Nyasaye yaboolela Zefania omusiani wa Kushi, owali omusiani wa Gedalia, omusiani wa Amenia, omusiani wa Hezekia, mutsinyanga tsia Yosia omusiani wa Amoni yali omuruchi wa Yuda.

² OMWAMI Nyasaye aboola ari, “Ndalamulula ebilonje biosi ebili khushialo:

³ Ndalamulula abandu, tsisolo, amanyonyi, nende tsinyeni tsiomunyanza; Ndalamulula abamayanu boosi; Ndalarusiaho abandu boosi khushialo.

⁴ Ndalahelesia abandu ba Yuda eshinyasio, nende boosi abamenyanga mu Yerusalemu. Ndalamulula boosi abasikala khu abenamilanga omunyasaye Baali, khandi abulaho ouletsulila eliira liomwisaaliisi owabemilila okhwinamila omunyasaye oyo.

⁵ Ndalamulula boosi abaninanga khubilama bietsinzu nibenamilakhwo eliuba, nende abo abenamilanga omwesi nende tsing'ining'ini, ndalamulula boosi abanzinamilanga isie OMWAMI Nyasaye nende okhwitsuba khulwa eliira lianje, mana khandi betsuba khulwa eliira liaomunyasaye Moleki.

⁶ Ndalamulula abo boosi abashiukhana nibandekha, nende boosi abalekha okhukhaaba nende okhureeba obuchetsiyi okhurula khwisie.”

⁷ Holeele tsi imbeli ewa OMWAMI Nyasaye, okhuba inyanga eya OMWAMI Nyasaye yili ahambi okhuula. OMWAMI Nyasaye urecheshe omusango, khandi umalile okhwahula abo aba alaanjile okhwitsa.

⁸ OMWAMI Nyasaye aboola ari, “Khunyanga ya lisabo eyo, ndilihaana eshinyasio khubemilisi babandu, nende khubasiani babaruchi, nende khu abandu boosi abalondanga emilukha chiamahanga kandi.

⁹ Khunyanga eyo ndilihaana eshinyasio khu abo boosi abasanganga mumilukha chiokhwinamila ebifwanani, nende khu abo abetsusinjia inzu eyomwami wabwe nende ebindu ebia bebile nende ebia bayaayile.

¹⁰ Khunyanga eyo, Isie OMWAMI Nyasaye esubisia mbu, oluhungu lulihulilikha okhurula mushilibwa eshia Tsinyeeni, okhwikhuula khulihulilikha okhurula mulukongo olwa khabili, omwoyo omukhongo kulihulilikha okhurula khubikulu.

¹¹ Inywe abamenya mushialo Makiteshi, abakholi abeinganga boosi basasibwe, boosi abakulanga nende okhukusia ifeetsa mubichelo bafuubilwe ehale.

¹² Mutsinyanga etsio nilwo olwa elikhaabilisia mwitookho lia Yerusalemu neitaa, nilwo olwa lihaana eshinyasio khu abo abamenyanga nibehonjeshile shinga litseshe liidivai, abo ababoolanga abeene mumwoyo mbu, ‘OMWAMI Nyasaye shialakholakhwo eshindu shiosi eshilayi, kata eshibi ta.’

¹³ Obuyinda bwabwe bulayaaywa, natsio tsinzu tsiabwe tsilakwisibwa. Balombakha tsinzu, nebutswa shibalamenyamwo ta, balaraaka emikunda chiemitsabibu, nebutswa shibalanywakhwo idivai yachio ta.”

¹⁴ Inyanga ikhulundu eyo, eya OMWAMI Nyasaye yili ahambi, yili ahambi khandi yitsanga bwangu. Oluhungu olwa inyanga eya OMWAMI nolululu po, habwene yaho, abelihe abalulu balalila nomwoyo omukhongo.

¹⁵ Inyanga eyo yakhabe inyanga yoburuma, yakhabe inyanga yamanyakhano nende obutsunwi, inyanga yeshiliima nende lifumbi, inyanga yobusasishi nende obumululwi, inyanga yamaleesi nende eshilima eshimali ti.

¹⁶ Inyanga eyo yakhabe yokhukhupa olwika lwalihe, khumahanga aketsingoba nende akeminaara emirambi.

¹⁷ Khulwa okhuba abandu bamwonoonela OMWAMI Nyasaye, alabareerera amatinyu amakhongo, balachenda nibakoyaana shinga ababofu. Amatsayi kabwe kalasundulwa shinga olufu, nachio emilambo chiabwe chilafubwa shinga amasingo.

¹⁸ Ifeetsa kata itsahabu yabwe shibilabahonokosia okhurula khunyanga yeliruma elia OMWAMI Nyasaye tawe. Eshialo shiosi shilasasibwa nomulilo kwa lirumalie. Alasishia abandu boosi abamenyanga khushialo metsukhana.