Ulwịlilisyo 1 - Biblia Umwikemo 1996

Ubusụlụmanịe bwa Jelụsalemụ

¹ Ko kuja ịtolo kukị akāja ka Jelụsalemụ, aka kālịswile abāndu. Kīpelile ukuja bo umfwīle, aka kāli kāja kakulūmba kufịkolo fyōsa; kīmikịgwaga kāli bo unndēnga nkati ntwaja, abāndu bāke bākolị̄gwe mbutumwa.

² Kịkulila fị̄jo pakilo, amāsosị gāke masịsya mụsaja; mbaganịgwa bāke bōsa, akajapo najumo ugwa kunsūbisya. Abakamụ bāke bōsa bammbōmbīle akabịnị; bịpelịle balugu bāke.

³ Abāndu ba Jụ̄ta basāmịsị̄gwe panōngwa ja kubonelịgwa paōngwa ja butumwa ubukulūmba; bịkutūgala nkati mfịkolo fya bāpānja, bakaja nubujo nabumo ubwa kutūsyamo ubu bwabo bābo; abalugu bābo aba bābakagaga bābāgịle, babasyungūtị̄le bākamandanị̄gwe fị̄jo bakābagị̄le nukujōnga.

⁴ Imịsebo igi gịkulabila kwa Syonị gịkulila, papo abāndu nabamo, batịkwendamo ukwisa kukwịpụ̄ta kufyaka ifi fịbātikị̄gwe; ifịfịgo fyake fịli ịtolo, abapụ̄tị bāke bịkupēhula; abalīndwana bāke abīmbị bịkukubilwa, kangi Syonị ịkubabịgwa fị̄jo.

⁵ Abalugu bāke bo balōngosi bāke, kangi abalugu bāke bikunoga; UNTWA amfụndịle papo Imbịbị syake nyịngị; abānāke bakolịgwe, begịgwe nabalugu.

⁶ Kunndindwana gwa Syonị, ubukulūmba bwake bōsa busokịleko; abakulūmba bāke bōsa bị̄pelịle ukuja bo utusya utu tukabwaga ubujo nabumo ubwa kulyamo; utu amaka gābo gōsa gamalị̄ke bo tukubabopa aba bịkutufwima.

⁷ Jelụsalemụ mmasịku gāke ga ngubilo nukutamịgwa, ịkukumbuka utūndu utunụnụ tōsa, utu twali twake amasịku ga ịjolo. Bo abāndu bāke bāgwilịle nkiboko kya nndugu, akālịpo najumo ugwa kuntūla; aba bālintolịle balinkunnseka nukummūgīlila, panōngwa ja kugwa kwake.

⁸ Jelụsalemụ abōmbịle imbị̄bị nyịngị fị̄jo, po apa anyalịle; bōsa aba bammwimikaga bịkunhena, papo babubwene ubufụ̄la bwake; ịkuhihila, kangi ịkusanụkisya ikyeni kyake kubūngi.

⁹ Ubunyalị bwake bwabonekaga pabwelụ ịtolo, lolị umwene akị̄nogonaga nasịmo isya bumalikilo bwāke; po apa ukugwa kwake kwali kwakutị̄lisya fị̄jo; akaja nagwe najumo ugwa kunsūbisya. Gwe NTWA, ketako īngubilo syangu, unndugu atolịle.

¹⁰ Unndugu ēgile ikyuma kyosa ikya Jelụsalemụ. Jelụsalemụ ababwene abāpānja bo bịkwịngila kumaka Nnyumba inyikemo, aba UNTWA abagị̄le ukongāna nabāndu bāke.

¹¹ Abāndu bāke bōsa bịkuhihila bo bali pakulōnda ifị̄ndu; bịkūsania ikyuma kyabo nifị̄ndu ukuti fịbapege amaka. Gwe NTWA, ngētako; papo une ngusyōkeligwa.

¹² Bule mwesa mwe mukukīsanịa sya ịtolo, oko mụkēte, linga bulịko ubusụlụmanịe ubu bufwene nubusụlụmanie bwangu, ubu ndwaliligwe une; ukubabịgwa uku ālindwalị̄le UNTWA pị̄sịku lya bukalale bwake ubukulūmba.

¹³ Ātumile umōto ukufụma kumwanya; umōto ugu gulinkunyōkya nkati mfịfụpa fyangu; ātegile ulwelo kumalūndi gangu, angomwịsye kūnyuma; āndekịle nimwene kangi bo ngutamịgwa ilịsịku lyosa.

¹⁴ Imbị̄bị syangu syosa asịpịnyēnịe namaboko gāke pamopēne ukuja kitwalo, asịnịembile mmakosị gāngu; sikumbị̄ta kummilo; sịsōsịsyemo amaka gōsa kunōngwa ja busịto. UNTWA āmbīkịle mmaboko ga bāndu, aba ngabagila ukutolana nabo.

¹⁵ UNTWA abapelịle abasīkali bāngu abāmaka ukuja ba ịtolo nkati mmyangu; angōlelị̄le ikilūndilo kya balwabwịte ikya kubapyụta abāndu bāngu abatụbwa; UNTWA abatyogojolenịe abāna ba Jūta abalīndwana ukufwana seke sya mafị̄lu isị sịli nkati ndyiki bịkukamịla ubwalwa bwa māfị̄lu.

¹⁶ Po apa amāso gāngu gịswịle amāsosị, ngulila. Akajapo najumo ugwa kūsūbisya; akajapo najumo ugwa kūngasya. Abānāngu balekịgwe bēne papo unndugu ujo atolịle.

¹⁷ Syonị ịkugolosya amaboko gake; lolị akajako najumo ugwa kunsūbisya. UNTWA ansōkīsye ululagilo Jakobụ, ulu lukuti: Abapalamanị bāke bikujaga balugu bāke. Jelụsalemụ ali bo akāndu akanyalị nkati mmyabo.

¹⁸ UNTWA nngolofụ; papo une ngịlēnịe ilịsyu lyake; mụmbilikisyege mwe bāndu mwesa, mungētege īngubilo syangu. Abalīndwana bāngu nabāndu bāngu abatụbwa, bēgị̄gwe ukubūka mbupịnyịgwa.

¹⁹ Ndinkubakōlela abaganịgwa bāngu lolị balinkūsyoba; abapụ̄tị bangu namafụmu gāngu bāfwilị̄le nkāja; bobali pakulōnda ifị̄ndu fya kulya, ifya kuti fịbapege amaka.

²⁰ Kētako gwe NTWA, namanga ndi mbutolwe ubukulūmba; umōjo gwangu gukamandanigwe gukubabigwa fijo; papo ndinsāmbuke fị̄jo. Mmịpūlo bịkugoga nulūbo; mope nnyụ̄mba bulịmo ubufwe.

²¹ Bapilị̄ke muno nguhihila; akajapo najumo ugwa kūsūbisya. Abalugu bangu bōsa bapilị̄ke isya butolwe bwangu; bịkusekela apa ubōmbile isyo. Utwalege ilịsịku ili gwafị̄ngịle, ukuti abalugu bangu bope bakubilwege bo papo nanịne ngukubilwa.

²² Imbị̄bị syabo syosa sijege nkyeni mmyako; ubafụ̄ndege bo papo ūfụ̄ndile une panōngwa ja mbị̄bị syangu syosa; namanga īngubịlo syangu nyịngị, mbinile mụndụmbụla.