Ukusōka 1 - Biblia Umwikemo 1996

Abany'Ịsịlaelị bikubombeligwa isya kubatamya mw'Egịpịtị

¹ Isị syo ngamụ sya bana abanyambala ba Jakobụ uju āli jo Ịsịlaelị aba bālịsịle mw'Egịpịtị, uju naba nnyụ̄mba jāke uju naba nnyụ̄mba jāke:

² Lubenị, Sịmyonị, Lebị na Jụ̄ta,

³ Isakalị, Sebulonị na Benjamịnị,

⁴ Ndanị, Nafụtalị, Gandi na Aselị.

⁵ Aba nkikolo kya Jakobụ bōsa pamopēne bāli abāndu amalōngo mahāno na mabili; Josefụ jo ājīlị̄lemo ngānịla mw'Egịpịtị.

⁶ Lelo Josefụ āfwịle, na bamyabo bōsa, ni ngulilo jōsa jila jila.

⁷ Lolị aba nkikolo kya Jakobu balyolwịke bābēle bāli bịngị fị̄jo; bābēle kangi bali na maka fị̄jo; ikị̄su kyalịswịle bābo batupu.

⁸ Po papo alinkuboneka umalafyale ujūngi ugwa kulagila mw'Egịpịtị uju akālimmēnye Josefụ.

⁹ Jo alinkubabūla abāndu alinkuti: Mụkēte abany'Ịsịlaelị aba babēle bakindilị̄le; kangi bali namaka ukutukīnda uswe.

¹⁰ Oko tulōnde amahala gamo agakubabōmbela, ukuti bangakindililaga ubwịngị, papo linga babēle fị̄jo lelo ubwịte bumo bukutwịsila, bịkubāmbaga na balugu pa kulwa na nụswe po lelo abēne bēnde nukusokamo nkị̄su.

¹¹ Po papo balinkubabīka abalindililị abakubakufya nimbōmbo ingafụ. Po papo balinkunnjengela Falao utwaja, Pitomu na Lamasesị, utwakulundikamo fyosa ifya kubōmbela umalafyale.

¹² Loli napapo babatamyaga fị̄jo ukubakatasya ni mbombo, abēne balinkōngelela ukōloka nukubāla nkị̄su kyosa. Po papo abāndu ba mw'Egịpịtị balinkwenda nukubatị̄la abany'Ịsịlaelị.

¹³ Balinkubakatasya fị̄jo abany'Ịsịlaelị ni mbōmbo ingafụ fị̄jo kisịta kisa na kimo.

¹⁴ Babapēle ulutamyo lwa butumwa ulukulūmba fị̄jo mbūmị bwabo; bābapaga imbōmbo sya kubūmba amapāmba gakujengela inyụ̄mba, ni mbōmbo sya mịgūnda isya luko nu luko; mụmbōmbo syosa babīmililaga nubukali fị̄jo.

¹⁵ Po papo umalafyale gwa Egịpịtị alinkubabūla abakịkulu Abahịbulị aba bāpāpisyaga abāna, ba Sifala na Pūja, alinkuti:

¹⁶ Bo mụkubapāpisya abāna abakịkulu Abahịbulị, bo bịkupāpa, linga mwagịle umwana nnyāmbala mụkanngogege; lolị linga nkị̄kulu jo mụngaja kunngogaga.

¹⁷ Lolị abapāpisya bāna bala bala bantị̄laga Kyala, bakākōngịle isị umalafyale abalagị̄le, balinkusịta ukubagoga abāna abanyambala aba bapāpịgwa.

¹⁸ Po papo umalafyale gwa mw'Egịpịtị alinkubabilikila abapāpisya bāna bababa, alinkubalālūsya alinkuti: Fịkị mụkabōmba isị mbalagị̄le, mụtịkubagoga abāna abālumyāna?

¹⁹ Abapāpisya bāna bala balimmwamwịle Falao bātịle: Abakịkulu Abahịbulị bakafwana nabakịkulu ba mw'Egịpịtị; tukwakwaga bapāpịle.

²⁰ Po papo lelo Kyala ābịmịle abapāpisya bāna bala, abāndu balinkōngelela ukubāla nukuja namaka mịngị.

²¹ Panongwa jakuti abapāpisya bāna bala bantị̄laga Kyala, Kyala ābapēle utwāja twābo nabāna.

²² Po Papo Falao alinkusōsya ululagilo ku bāndu bāke alinkuti: Umwana gwesa Unhịbụlị uju ịkupāpịgwa, linga nndumyana mụntāgege ndwisi Naịlị, lolị uju linga nndindwana jo mụnndekege mụngantāgaga.