Ubwandilo 1 - Biblia Umwikemo 1996

Ukupeligwa ikị̄su

¹ Pabwandilo Kyala āpelịle ikya kumwanya ni kya pāsi,

² Ikị̄su kikāli nafyo nafịmo, kyali ịtolo, ingị̄sị jilinkuja pamwanya pa mīsi amasolofụ; mbepo gwa Kyala alinkwalamila pamwanya pamīsi.

³ Kyala alinkuti: Lujeko ulumụlị; popāpo lulinkujako ulumụlị.

⁴ Umwene Kyala alinkulukēta ulumụlị alinkwaga lunụnụ. Po papo alinkupāgulanịa ulumụlị ni ngị̄sị.

⁵ Ulumụlị alinkulupa Ingamụ ija Mụ̄si, ijēne ingị̄sị alinkujipa ingamụ ija Kilo. Ukufụma namajolo ukwịsakufịka nulubūnju lilinkuja lyo ịsịkụ lya kwanda.

⁶ Po papo Kyala alinkuti: Gujeko umpālānga pakati pa mīsi, go gugatapulanịege amīsi.

⁷ Alinkugupela umpālānga, alinkugatapulanịa amīsi gamo galinkuja kūsi ku mpālānga agāngi galinkuja pamwanya pa mpālānga; sịlinkuja bo buno buno.

⁸ Kyala alinkugupa umpālānga ingamụ ija Kumwanya. Ukufụma namajolo ukwịsakufịka nulubūnju lilinkuja lyo ịsịku lya bubili.

⁹ Po papo Kyala alinkuti: Amīsi ga kūsi kumpālānga gābūngāne mbujo bumobwene, ukuti ikị̄su ikyumụ kibonekege. Bo sịlinkutendeka buno buno.

¹⁰ Kyala alinkukipa ikị̄su ikyumụ ingamụ ija Kị̄su, gōpe na mīsi aga gābūngēne mbujo bumobwene alinkugapa īngamuụ ija Nyānja; Kyala alinkusịkēta sịsịsị alinkwaga nụnụ.

¹¹ Po papo Kyala alinkuti: Ikị̄su kimesyege ilị̄su, ni fyakumela ifị fịkupa iseke, ni mịpịkị igi gịkupa iseke, igi iseke syake sịli ni mbejụ nkati, ukukōngana nu luko lwake, pamwanya pakị̄su. Sịlinkuja bo buno buno.

¹² Ikị̄su kilinkumesya ilị̄su ni fyakumela ifị fịkupa iseke, ni mịpịkị igi gịkupa iseke syake isị sịli ni mbejụ nkati, ukukōngana nuluko lwake. Kyala alinkukēta sịsịsị alinkwaga nụnụ.

¹³ Ukufụma namajolo ukwịsakufịka nulubūnju lilinkuja lyo ịsịku lya butatu.

¹⁴ Kyala alinkuti: Sịjeko īmụlị mụ mpālānga, isya kupāgulanịa umụsi ni kilo; syo sị̄pelege ukuja fịmanyịlo, fya kumanyịlamo utubalilo, na masịku, ni fyinja.

¹⁵ Syo sịmụlikege mụmpālānga gwa kumwanya sịkimụlịkege ikị̄su. Sịlinkuja bo buno buno.

¹⁶ Kyala alinkupela īmụlị īngulūmba ịbili, ulukulūmbapo kulunịne lulinkuja lwa kubala pamụ̄si, ulunāndi lulinkuja lwa kubala pakilo; kangi alinkupela ni ndōndwa.

¹⁷ Kyala alinkusịbīka imụlị sịsịsị mụmpālānga gwa kumwanya ukuti sịkimụlịkege ikị̄su,

¹⁸ nu kubala pamụ̄si na pakilo, nukuti sịpāgulanịege ulumụlị ni ngị̄sị, Kyala alinkusịkēta sịsịsị alinkwaga nụnụ.

¹⁹ Ukufụma namajolo ukwịsakufịka nulubūnju lilinkuja lyo ịsịku lya buna.

²⁰ Po papo Kyala alinkuti: Mmīsi fịjemo ifya būmị fị̄fị̄ngị ịtolo, ni njunị, sịpụlụlụkege pamwanya pa kị̄su mụmpālānga.

²¹ Buno buno Kyala alinkufịpela ifịkulūmba ifya mụnyanja nifịpelịgwa fyosa ifị fịkupakanya mmīsi, mfịkolo mfịkolo, kangi ni njunị sya mụmpālānga uluko nu luko. Kyala alinkusịkēta sịlinkuja nụnụ.

²² Kyala alinkufịsaja alinkuti, mụbālege mwịsule mmīsi ga mụnyanja, syope ni njunị sịbālege pakị̄su.

²³ Ukufụma namajolo ukwịsakufịka nulubūnju, lilinkuja lyo ịsịku lya buhāno.

²⁴ Kyala alinkuti: Ikị̄su kije nifịpelịgwa ifya būmị uluko nu luko, ing'ōmbe kangi na kāndu kōsa aka kịkwendela ulwanda, kangi nifịnyamāna fyosa ifya nndị̄su, ifịnywamụ ni fịnāndi ifya luko nu luko. Sịlinkuja bo buno buno.

²⁵ Bo buno buno Kyala alinkufịpela ifịnyamāna ifya nndị̄su iki nnduko lwake, ni fịnyamāna ifyakuswilịgwa iki nnduko lwake, nifị̄ngị fyosa ifị fịkwendela ulwanda pamwanya pakị̄su ifya luko nu luko. Kyala alinkusịkēta sịsịsị alinkwaga nụnụ.

²⁶ Po papo Kyala alinkuti: Oko, atupelege umụ̄ndu nkifwanị kyitu, ajege bo jujuswe; jo ajege gwa kusilāmbika īswi sya mụnyanja, ni njunị sya mụmpālānga ni ng'ōmbe ni fịnyamāna fya nndị̄su ni kị̄su kyosa, nutūndu tōsa utu tukwendela ulwanda.

²⁷ Buno buno lelo Kyala alinkumpela umụ̄ndu nkifwanị kyake; nkifwanị kyake jūjo Kyala mo alinkumpelela unnyāmbala nu nkị̄kulu.

²⁸ Kyala alinkubasaja, kangi alinkubabūla alinkuti: Mụbālege mwịsulege nkị̄su, kangi mụkilambikege, mụjege balāmbikị ba nswi sya mụnyanja, ni njunị sya mụmpālānga, kukuti kāndu kōsa akābūmị aka kịkwenda pakị̄su.

²⁹ Kyala alinkuti: Mụkēte, mmbapēle umwe fyosa ifyakubyala ifị fịli ni mbejụ, ifị fịlịmo nkị̄su, ni mịpịkị gyosa igi gịkupa īseke isị sịli ni mbejụ, nkati, fyo fịkujaga fyakulya fyinụ.

³⁰ Ifịnyamāna fyosa nkị̄su, ni njunị syosa sya mụmpālānga, kangi fyosa, nīfị fịkwendela ulwanda, fyosa ifị fịli nubūmị, fyo mfịpēle ifị fịkumela fyosa ukuja fyakulya fyabo. Po papo sịlinkuja bo buno buno.

³¹ Kyala alinkufịkēta fyosa ifị āpelịle, alinkwaga fịnụnụ fị̄jo. Ukufụma namajolo ukwịsakufịka nulubūnju, lilinkuja lyo ịsịku lya ntandatu.