Ʉbʉsetʉli 1 - Biblia Umwikemo 1996

¹ Isị syo nōngwa sya busetulị ubu Kyala ālimpēle Jesụ Kilisịtị. Ālimpēle ubusetulị bububu ukuti abanāngisyege ababōmbị bāke isị sịkuja pakuboneka nakalīnga. Kilisịtị ālintumịle ugwandumị gwake kukummbūla sịsịsị ummbōmbị gwake Johanị,

² po papo Johanị alinkusịjoba pabwelụ syosa sịsịsị. Alinkusịsịmikisya ilịsyu lya Kyala nubwanalolị ubu bukunnjoba Jesụ Kilisịtị.

³ Nsangalufụ uju linga ịkubala amasyu gabukụngụlụka gagaga, kangi basangalufụ aba bịkugapilika nukusịbīka mụndụmbụla syabo isị sịsịmbigwemo mmasyu gagaga, namanga akabalilo kākwịsila sịsịsị kali kifụkị.

Imbonịo syakufịponịa ifịpānga fịhāno nafịbili

⁴ Johanị ịkufịsị̄mbila ifịpānga fịhāno na fịbili ifị fịli mw'Asịja ịkuti: Ilị̄pyana nulutēngāno fịjege nanụmwe ukufụma kwa Kyala uju alịko lilino, uju āliko bwịla naịjolo, uju nukwịsa ịsakwịsaga kangi; sịbasajege ni mbepo ịhāno naịbili isị sili nkyenị nkikota kyake kya butwa,

⁵ abasajege na Jesụ Kilisịtị unsịsịmikisị unsūbilịgwa, uju āli gwa kwanda ukusyuka ukufụma mmbufwe unndagilị gwa banyafyale bōsa bankị̄su mụno. Uju atuganịle, uju atwabwịle kubutulanōngwa bwitu, nubufwe bwake.

⁶ Uju atubunganịkịsye nkitāngālala kyake atupelịle bapụ̄tị ba Kyala Ugwịse. Jo apēgịgwege ubukulūmba na maka kisịta kuleka sịku. Amenị.

⁷ Keta ịkwịsilaga mmabingu, umụ̄ndu gwesa ịsakummbonaga. Bope nāba bālinndasịle bịsakummbonaga; kangi nifịkolo fyosa fya nkisu fisakulilaga mbusụlụmanịe na nndutēnde bo ịkwịsa. E, nalolị bo sịsakujaga.

⁸ Une Joune A, joune O, (joune Bwandilo, joune Bumalikilo), bo ịkuja UNTWA kyala ugwamakagosa, uju alịko lilino, uju āliko na ịjolo, uju kangi ịsakwịsaga.

Īnjosị sya Kilisịtị

⁹ Une ne Johanị ne nkamụ gwinụ, ne nndīlanịsị mwịnīnụ mwa Jesụ ubufịndang'oma ni ngubilo isị sịkubị̄sila aba bali nkitāngālala kyake. Nābīkị̄gwe pa lusūngo lwa Patịmo kunōngwa ja kulūmbilila ilịsyu lya Kyala nukunsịsịmikisya Jesụ.

¹⁰ Pị̄sịku lya NTWA Mbepo ālinyị̄sị̄le nndinkupilika kūnyụma kumyangu ilịsyu ilịkulūmba, ukufwana kulila kwa ngangabwịte.

¹¹ Lilinkuti: Usịmbēge mwa Kalata syosa isị kusịbona usịtumege kufịpānga fịhāno na fịbili; ikya mw'Efesị ni kya mụ Sịmịlịna, ni kya mụ Pelịgamụ, ni kya mụ Tyatịla, ni kya mụ Salịndị, nikya mụ Fịlatelịfịja ni kya mụ Laotịkịja.

¹² Po papo ndinkusyụtuka ukuti nunkēte uju ājobaga nanịne, ndinkufịbona ifịkolelanyāle fya sahabu fịhāno nafịbili,

¹³ pakāti pali fịlafịla kālipo akāndu kamo aka kābonekaga ngāti mụ̄ndu uju afwele unselekesye ugu gwafịkịle pāsi mmalundi gāke, kangi ị̄pịnyịle umpāngo gwa sahabu pakipāmbaga.

¹⁴ Īnywịlị syake syali nyēlụ swē ukufwana bo amasapa pamo ukufwana bo īngala, amāso gāke gāmụlikaga ukufwana mōto,

¹⁵ amalūndi gāke gabịkukaga ukufwana kyela ikibūngu iki kyengusịgwe kyelusigwe, ilịsyu lyake lyobelaga ukufwana misị amị̄ngị (nndūlilo.)

¹⁶ Ākolị̄le īndōndwa ịhāno naịbili nkiboko kyake ikị̄līlo, ulūbo lwa bwembe kōsakōsa ulūgị lulinkusōka nkufụma nkanwa mmyake. Ikyenị kyake kyamụlikaga ngāti ịsuba bo lili pantu.

¹⁷ Bo nummbwene ndinkwenda nukugwa pāsi mmalūndi mmyake ukufwana mụ̄ndu uju afwịle, alinkubīka ikiboko kyake ikị̄līlo pamyangu alinkuti: Ungatetemaga. Une joune ne Ntasị joune ne Gwakūsụlo,

¹⁸ kangi joune ne mūmị; buno nāfwịle lelo lilino ndi mūmị ngwakufịkaga kubusịtakumalika sịku nasịku nngolị̄le nifị̄gulilo fya bufwe nifya kubusyuka.

¹⁹ Sịmbaga lelo isị kukēta, isị sịlịko lilino na isị sịkwịsaga kūnyụma.

²⁰ Isya mbutị̄tu isya ndōndwa ịhāno naịbili isị gwasịbwene nkiboko kyangu ikị̄līlo, nisya fịkolelanyāle fya sahabu fịhāno nafịbili syo isị; īndōndwa ịhāno naịbili bo bandumị ba fịpānga fịhano nafịbili, ifịkolelanyāle fịhāno nafịbili fyo fipānga fịhāno na fịbili.