Osịja 1 - Biblia Umwikemo 1996

¹ Ili lyo ịsyu lya NTWA ili ālimpēle Osịja umwana gwa Belị, mmasịku ga Usịja, Jotamụ, Ahasị na Hesekịja, abanyafyale ba mwa Jụ̄ta, kangi na mmasịku ga Jeloboamụ umwana gwa Joasị umalafyale gwa Ịsịlaelị.

Unkasị gwa Osịja na bānāke

² Bo UNTWA āndịle ukujobela nkanwa ka Osịja kubanya Ịsịlaelị, ājobịle na Osịja ātịle: Būka ukammwege unkị̄kulu gwa bulogwe ukuja nkasịgo, ukapāpege nagwe abāna aba bope bịsakujaga ba bulogwe, namanga ikị̄su kịkubōmba ubulogwe ubukulūmba fị̄jo apa kinndekịle UNTWA.

³ Po papo alinkwenda nukubūka alinkwakummwega Gomelị umwana unndịndwana gwa Ndibulaịmụ, alinkuja nikifụba, alinkumpāpila Osịja umwana unndumyana.

⁴ UNTWA alinkummbūla Osịja alinkuti: Umpege īngamụ ja Jeselelị, pasyele panāndi ịtolo apa nịsakujifụ̄ndaga īnyụ̄mba ja Jehụ panōngwa ja ịlopa lya Jeselelị; kangi nịsakōmolaga ubutwa bwa nnyụ̄mba ja Ịsịlaelị.

⁵ Kangi pịsịku lilalila nisakubatolaga abany'Ịsịlaelị ndusōko lwa Jeselelị.

⁶ Lulalula Gomelị alinkuja nikifụba ikīngi, alinkupāpa umwana unndīndwana. UNTWA alinkummbūla Osịja alinkuti: Umpege īngamụ ja Atịkupakisigwa, namanga ndisakwandisya kangi ukunāngisya ulupākisyo kubanya Ịsịlaelị, kangi ndisakubaswa napanāndi.

⁷ Lolị nisakunāngisyaga ulupākisyo kubanya Jụ̄ta, kangi nịsakubapoka ne NTWA Kyala gwabo; ndịsakupokaga nubupīndo pamo ulūbo, pamo nubwịte, pamo nifalāsị, pamo na bāndu aba bịkwịtoga pafalāsị, himma!

⁸ Po papo lelo bo Atịkupakisigwa alekịle ukōnga amabēle, alinkuja nikifụba ikīngi, alinkupāpa umwana unndumyana.

⁹ UNTWA alinkummbūla Osịja alinkuti: Umpege īngamụ ja Bakajabandubangu, namanga abāndu ba Ịsịlaelị bakaja bandu bangu na nịne ngaja gwabo.

Ịsịlaelị ịkugomolịgwaga kukajīlo akanụnụ

¹⁰ Abany'Ịsịlaelị bịsakujaga bị̄ngị bo unsānga gwa kwa sūmbi, ugu gukabagila ukupimịgwa namalebe kangi nukubalịgwa. Ịjolo Kyala ātịle: Umwe mụkaja bāndu bāngu, lolị ilịsịku ili lịkwịsaga abāngi bịsakubajobaga ukuti: Mụli bāna ba Kyala umụmị.

¹¹ Abāndu ba mwa Jụ̄ta na bāndu ba mwa Ịsịlaelị bịsakujaga pamopene, bịsakunsalaga unndōngosị jumojwene ugwa kubalōngosya, po kangi bisakubālaga nkị̄su kyabo. Ena ilịsịku lya Jeselelị lịsakuja ịkulūmba fịjo.