Nahụmụ 1 - Biblia Umwikemo 1996

¹ Iji jo ndumị iji jịkukajoba akāja kā Nịnịbe, isị āsịbwene isyabusetulị unkụngulụka Nahụmụ uju āfụmịle mw'Elikosị.

Ingalalisị sya NTWA kwa Nịnịbe

² UNTWA jo Kyala gwa būfị gwalubụkisyo, UNTWA gwa lubụkisyo kangi gwa lufụ̄ndo; UNTWA ịkubabụkisya aba bịkumpīnga, ịkubakalalila abalugu bāke.

³ UNTWA atịkukalala nakalinga gwa maka amaku lūmba, untulanongwa atịkunndeka ukumfụ̄nda. Injila jake jili nkafụlafụ̄mbi na mụmmbelo, amabīngu lo lufụ̄mbi lwa mmalūndi gake.

⁴ Ịkujikemela inyanja ịkujipelela ukūma, ịkusyumịka inyīsi syosa. Ulukubo lwa Basyanị ni kyamba kya Kalịmelị fịkūma, ubulēnge bwa Lebanonị bụkukofụka.

⁵ Ifyamba fịkutetema, ifyamba ifịnāndi fịkwenguka nkyenị mmyake ikị̄su kịkusenyendeka nkyenị mmyake, ikị̄su na fyosa ifị fịlịmo fị̄kutetema.

⁶ Jwanị abagị̄le ukwima nkyenị mmyake bo akalēle? Jwanị abagị̄le ukuja nkịfụ kubukali bwa ngalalisị syake? Ingalalisi syake sịkōneka ukufwana mōto, ikusị̄tajanịa nīnyālabwe.

⁷ UNTWA mōlōlo, ịkubalindilila abāndu bāke mbusịku bwa butolwe; kangi ịkubaswila aba bịkubopela kumyake.

⁸ Lolị ịsakubapyụtaga abalugu bāke kifwene bo umwelēsyo umwịngị, ịsakubagogaga abalugu bāke bosa.

⁹ Mụkulōnda ukummbōmbela mbị̄bị nngị UNTWA? Ịsakubapyụtaga lōsa po atịsakwandisya kangi ukubapyụta ulwa bubili abalugu bāke.

¹⁰ Namanga pope linga bafwene bo imịfwa igi gitatēne bịsakukosịgwaga bapyege bo ilị̄su ilyumụ balapilege.

¹¹ Jumo akāfụmịle kumyako, gwa kāja ka Nịnịbe uju ābātị̄ke ukummbōmbela īmbị̄bị UNTWA, unjobamasyu amasita kubagila napanandi?

¹² UNTWA ịkujoba ịkuti: Napāpo Abasịlịja baje namaka kangi baje bị̄ngị, pope bịsakugogịgwaga ịtolo, napāpo nākupēle ulukubilo ndịsakwandisya kangi ukukutwalila ulutamyo.

¹³ Lilino angukonyolanịaga ikipịkị kya Asịlịja iki kili mmakosị gako.

¹⁴ UNTWA asōsị̄sye ululagilo kunongwa ja Asịlịja atile: Ingamu jake jitịsakwandisyaga kangi ukujobịgwa; nnyụ̄mba ja gyabakyala gyake nịsakufịgogaga ifịfwanị fya kusōngola nifyakwengusya. Ngubakumbilaga ilịpumba mwe Basịlịja papo mụli bafwe.

¹⁵ Kēta, umụ̄ndu uju ịkutwala īndumị īnụnụ, uju ịkufụmụsya ulutēngāno, ịkwịsa ukufụmila kufyamba! Kịnaga, ifyaka fyinụ mwe bandu ba Jụ̄ta, mpe Kyala ifị mwafịngịle nagwe, namanga unndugu atịsakwandisyamo sịku kangi ukulwa nanụmwe, apyụtị̄gwe lōsa akasyalila.