Mika 1 - Biblia Umwikemo 1996

¹ Ilịsyu lya NTWA lyalimmwịsịle Mika, uju āfụmịle nkaja kā Molesyetị. Mmasị̄ku ga Jojamụ, Ahasị na Hesekịja, abanyafyale ba Jụ̄ta, lyajobaga isị̄ āsịbwene isya Samalịja na Jelụsalemụ.

Īfwa ja kunndilila Samalịja na Jelụsalemụ

² Amụpilike mwe fịkolo mwesa; pilika mwesa mwe bāndu ba kīṣu kya pāsi, UNTWA Kyala ịsakuja nsịsịmịkisi gwinụ, umwene ịsakusịsịmịkisyaga nnyụ̄mba jāke īnyịkemo ja kumwanya.

³ Kēta, UNTWA ịkusōka ukufụma mbujo bwake, ịkwịkililaga ịkwendaga mfyamba fya kị̄su kya pāsi.

⁴ Ifyamba fịkwengukaga pāsi pamyake, īsōko sịkubalanịlaga, bo umpụlya ugu guli nkyeni mmōto, fịsakōnekaga ukufwana nyīsi isị sịkusụlụka nndusōko.

⁵ Nōngwa jakuti abany'Ịsịlaelị bansāmbukị̄le Kyala, babōmbịle ị̄mbị̄bị, syo isị sịtwele syōsa sịsịsị. Jwanị ịkulōngịgwaga kubutulanōngwa bwa Ịsịlaelị, bule ko kāja ka Samalịja akākulōngịgwa? Ena! Jwanị ịkulōngịgwaga panōngwa ja Jụ̄ta, ko kāja ka Jelụsalemụ? Ena!

⁶ Ena! UNTWA ịkuti: Buno buno Samalịja nịsakumpelaga ukuja ịbungila lya kāja akā kapāngulị̄gwe ịpelege lukubo ulwelu, bwịsakujaga bujo bwakubyalamo amāfị̄lu; amabwe gāke nịsakugatāgaga ndusōko, nukusịsetula pabwelụ inyālo syake.

⁷ Ifịfwanị fyāke fyōsa fịsakubogojolịgwaga, fyōsa ifị ịkukabila mbunịongafụ fịsakukosịgwaga mmōto, ifịfwanị ifị ịkwịpụ̄tako fyōsa nịsakufyonāngaga; papo fịfịfị fịfụmịle mụ mbōmbo sya kwịpụ̄ta kufịfwanị po fịsakugomokelaga mụ mụmbōmbo sya kwịpụ̄ta kufịfwanị.

⁸ Kunōngwa jijiji Mịka ịkuti: nịsakulilaga ngụ̄tege; nịsakwendaga kitali kisịta kufwala nafịmo; nịsakulilaga bo akāmbwe, nịsakulilaga īfwa bo īmbụnị.

⁹ Namanga ifịfụlalo fya Samalịja fịtịkupona; jōpe Jụ̄ta ịkuja pakufụ̄ndịgwa mụnjila bo jijijo, Ulonāngịko lufịkịle pafịfịgo fya Jelụsalemụ mụno abāndu bāngu bịkutūgala.

Unndugu ịkusegelela mụ Jelụsalemụ

¹⁰ Mụngasịfumụsyaga sịsịsị mu Gatị, mụngalilaga sịku: mwịbụngụlụsyege ndufụ̄mbi mụ Betịle-Afụla.

¹¹ Mwe bāndu ba Safịlị umwe, amwịngilege mbutumwa bo mụli ịtolo mukafwala nafịmo mụli nị̄sonị. Aba bali mụ Sananị batịkusulwa ukusōkamo nkāja kābo. Bo kupilika abāndu ba Beteselị bịkulila ị̄fwa, kwịsakumanyaga ukuti ubuponelo bukajako.

¹² Abāndu aba bajēngịle mwa Malotị indụmbụla syabo sịli mmwanya namanga ubutolwe busụlwị̄ke ukufụma ku NTWA bwisile kukipata kya Jelụsalemụ.

¹³ Mwe bāndu ba mụ Lakịsị amụsịkūngege ifalāsị ku magali; jo umwe mwalyandile ukummbōmbela imbị̄bị umwāna unndịndwana gwa Sịonị; papo mmyako mo mụno syalyagịgwemo Ingịlanịo sya Ịsịlaelị.

¹⁴ Bunobuno lelo kumpaga Molesetị-Gatị ifyabupe fyakunndagila ukuti ugonege; Inyụ̄mba sya Akịsịbụ sịsakujaga kāndu ka kubasyoba abanyafyale ba Ịsịlaelị.

¹⁵ Nịsakubatwalila kangi ugwakubatola umwe, mwe mụjēngịle mwa Malesa; ubukulūmba bwa Ịsịlaelị bwịsakwịsaga kwa Andụlamụ.

¹⁶ Mwị̄mwege ifịpāla, mwị̄metege inywịlị syinụ ukubalilila abānīnụ aba mụbaganịle; mwị̄mwege ikipāla mụfwānege ịpūla, namanga bịsakusōkangamo mmyinụ bịsakubūkaga mbutumwa.