Mbupīngamụ 1 - Biblia Umwikemo 1996

Ubunụnụ bwa masyu ga mbupīngamụ

¹ Aga go masyu ga mbupīngamụ ga Solomoni unnya Ndabitị, umalafyale gwa Ịsịlaelị.

² Agakuti abāndu bamanyịlengemo amahala ni manyịsyo, bagāganịege amasyu ga mahala ga mbusolofụ,

³ bambililege īmanyịsyo sya kubōmbela mmahala, mbugolofụ, mbwanalolị na mbusubilịgwa;

⁴ ukuti abakonyofụ bapegịgwege amahala, abakeke bapegịgwege ubumanyị nu kusyaganịa;

⁵ ukuti ugwamahala apilikege ongelelege ubumanyị, umụ̄ndu uju ịkusyaganịa akabege ubumaganyị,

⁶ ukugāganịa amasyu ga mbupīngamụ, amasyu ga bamahala agā kummwịgala umụ̄ndu ukukēta linga ịkusyaganịa.

Isya kubasoka abālumyāna abatụbwa

⁷ Ukuntị̄la UNTWA bo bwandilo bwa kusyaganịa; lolị abakonyofụ bịkugasyokela amahala ni manyịsyo.

⁸ Pilika, gwe mwanāngu unndumyana, isị ịkukumanyịsya ugūso, kangi ungalutāgaga ulumanyịsyo lwa nyoko;

⁹ Īmanyịsyo syabo sịsakunosyaga akajīlo kako bo apa ikitambāla ikinụnụ kya kuntu pamo īnyāmbo sya mmakosị fịkunosya ububūmbe bwako.

¹⁰ Mwanāngu, linga ababōmba mbị̄bị bịkukupēfya, ungị̄tikaga.

¹¹ Linga bịkuti: Oko, tusịgilege umundu gwa kunngoga, twịbīlile tubagwililege pa kubagoga aba bakatula najimo;

¹² ukufwana ko kubusyuka tubamịle abūmị abakafụ ịtolo, ukufwana bo aba bikusụlụka ukubūka mbusyuka;

¹³ twịsakufyaga ifyuma ifịpala fyosa, twịsakwịsusyaga īnyụmba syitu ni fyuma ifị tupupịle;

¹⁴ oko, ongāna nanụswe, twịsakujabanaga ifị twịbịle.

¹⁵ Mwanāngu ungēndaga nabo abāndu ba buno buno, kigomosye ikilūndi kyako kingēndaga mụnjila syabo;

¹⁶ namanga abēne bịkubopela pakubōmba imbị̄bị, bịkukujila pakōna ilịlopa.

¹⁷ Namanga kukaja na mbombo najimo ukujitega nulwelo injunị bo jịkukēta;

¹⁸ Lolị abāndu bo bababa bịkwịtegela untego, ugwakubagoga bābo.

¹⁹ Isị syo njila sya bosa aba ubukabị bịkubwagila nkupoka kumaka; bukubagoga bābo babukabịle.

²⁰ Gịkukụ̄ta gịkulāta amahala gikubilikila mmisebo gya nkaja; gịkwịnụla ilịsyu lyake mbujo bwakūlikisyamo utūndu;

²¹ gịkukụ̄ta pamwanya pa mamato; gịkujoba pafịfịgo fya fịpata fya kāja gịkuti:

²² Mwe bakonyofụ umwe, mwịganịle ukuja bakonyofụ mpaka ndilị? Mwe mụkōbela mụkuhobokaga mpaka ndilị nkōbela kwịnụ? Abakonyofụ bịkububengaga mpaka ndilị ubumanyị?

²³ Amụpilike isị ngubakemela; keta, ngubonelaga inyinogono syangu; ngubamanyịsyaga amasyu gangu.

²⁴ Namanga mmbakōlị̄le mụsị̄tịle ukupilikisya, nngolwịsye ikiboko kyangu najumo akakibīkịleko umojo.

²⁵ Mụkusyokịle ukubasoka kwangu kosa, mụkānịle ukubagolosya kwangu.

²⁶ Nanịne nịsakubasekaga bo bubāgịle ubutolwe, nisakōbelaga bo ulutende lubakomịle,

²⁷ bo ulutende lubagile ukufwana mmbelo ugwamaka, kangi bo ubutolwe bubị̄sị̄le ukufwana kafụlafụ̄mbi, bo ubusụlụmanịe nulukubilo fibisile.

²⁸ Po lelo mwịsakukūtaga kumyangu, lolị ndịsakwamụlaga; mwịsakundondaga namaka gosa lolị mụtịsakunyāgaga.

²⁹ Kunōngwa ja kuti mụbubēngịle ubumanyị, kangi mụkānịle ukuntị̄la UNTWA,

³⁰ mụkakulōndaga ukubasoka kwangu, kangi mwakusyokị̄le ukubagolosya kwangu kosa,

³¹ po mwịsakulyaga īseke sya njila syinụ mwịkutege mụfụkwege īnyalị syinụ.

³² Namanga abasịtamahala bịkugogịgwa kunōngwa ja kugomokela kūnyụma kwabo, abakonyofụ bịkugogịgwa kunōngwa ja kusịtakwipakisya;

³³ lolị uju ịkumbilikisya une ịsakugonaga ndutēngāno, ịsakutengānaga, atịsakutị̄laga ubutolwe nabumo.