Malakị 1 - Biblia Umwikemo 1996

¹ Iji jo ndumị ja NTWA iji ālimpēle unkụ̄ngụlụka Malakị ukuti ababūlege abany'Ịsịlaelị.

Ulugano lwa NTWA kwa Ịsịlaelị

² Une mmbaganịle umwe, bo ịkujoba UNTWA. Lolị umwe mụkuti: Utuganịle uswe bo bulebule? Bule Esabu akaja gwamyabo gwa Jakobụ? Bo ịkujoba UNTWA. Lolị une nunnganịle Jakobụ,

³ ukunkīnda Esabu, nkipelịle ikịsu kyake kya nkyamba ukuja ịtolo kangi akāja kāke ntupēle utūmbwe twa ndungalāngala.

⁴ Linga Etomụ ịkuti: Napapo uswe tukomị̄gwe tutakanyị̄ke pope atụkutujēngaga utwaja twitu kangi. UNTWA gwa fịlūndilo ịkuti: Mma po papo ābatujēngege kangi utwaja twabo, lolị une nịsakutugwikisyaga pāsi. Abāndu bịsakutigi: Ikịsu kya mbị̄bị kangi ikịkolo kya bāndu aba UNTWA abakalalị̄le bwịla na bwịla.

⁵ Amāso gīnụ bo gasịkētịle sịsịsị, po mwịsakutigi: UNTWA nkulūmba akīsēnịe umpaka gwa Ịsịlaelị.

UNTWA ịkubakemela abapụ̄tị

⁶ Umwana ịkummwimịka ugwịse, ummbōmbị ịkummwimịka unkulūmba gwake. Linga une ndi gwị̄sēmwe fịkị mụtịkunyimịka? Kangi linga une ndi nkulūmba gwinụ fịkị mụtịkūndị̄la? Ngujoba une ne NTWA gwa fịlūndilo kuli mwe bapụ̄tị mwe mụkujị̄lamwa īngamụ jāngu. Lolị umwe mụkuti: Tụkujị̄lāmwa īngamụ jako bo bulēbule?

⁷ Mụkujị̄lāmwa papo umwe mụkusōsya amakemo ga fị̄ndu ifịnyalị pamwanya pakigemo kyangu kya kwịkemēkesyapo. Lolị umwe mụkuti: Tukinyasịsye bo bulēbule? Papo umwe mwịnogonaga ukuti īmēsa ja NTWA kāndu ka kukịnilịgwa.

⁸ Apa mụkusōsya amakemo ga kwịkemēsya aga fịnyamāna ifị fịfwịle amāso, bule bāgwi! Bo isyo, sịkaja mbị̄bị? Kangi bo papo mụkusōsya amakemo ga fịnyamāna ifịlemāfụ, pamo ifịbịne bule bo isyo, sịkaja mbị̄bị? Āguntwalịle ifịnyamāna bo fịfịfị unkulumba gwako unndagili bule abagị̄le ukusekela nukukwambilila? Bo ịkujoba UNTWA gwa fịlūndilo.

⁹ Ulu lilino nịkubapyelesya mwe bapụ̄tị, mụsūmege nukupyelesya ku NTWA ukuti atupakịsyege uswe. Mụkwịnogona ukuti ninyịpụ̄to syinụ bo isyo abagị̄le ukummwamụlapo jumo ndi umwe? Bo ịkujoba UNTWA gwa fịlūndilo.

¹⁰ UNTWA gwa fịlūndilo ịkuti: Kājaga kanụnụ linga ālịko umụ̄ndu jumo nkilūndilo kyinụ uju abagị̄le ukwịgalako inyị̄gị po ukuti umwe mụtolịgwege ukwịngila mụngajakukosyaga umōto gwa ịtolo pamwanya pakigemo kyuangu. Ngị̄kyela nanụmwe; bo ịkujoba UNTWA gwa fịlūndilo, ndịsakwambililaga amakemo gīnụ aga mụkūndwalila.

¹¹ Namanga ukufụma kuno lịkusōkela ilịsuba ukwakufịka kuno lịkujongela īngamụ jāngu ngulūmba mfịkolo fyosa, kangi kukuti bujo bịkufụ̄kisya lubanị mụngamụ jāngu, kangi bịkusōsya amakemo aga gịkwịtikisịgwa. Namanga īngamụ jāngu ngulūmba mfịkolo fyosa. Bo ịkujoba UNTWA gwa fịlūndilo.

¹² Lolị umwe mụkujinyasya apa mụkuti īmēsa ja NTWA jinyalịle kangi bo umwe mụkusōsya pamwanya pamyake ifị̄ndu ifị umwe mụkufịhenụla.

¹³ Lolị umwe mụkuti: Tukatēle fị̄jo nimbōmbo syosa isị! Mụkūnyịnulila īmbụlo syinụ kumwanya. Bo ịkujoba UNTWA Kyala gwa fịlūndilo. Bo mụkūsōkesya amakemo une, mụkūndwalila ifịnyamāna ifị mụpokịle kumaka, pamo ifịlemāfụ, pamo ifịbịne. Mukwịnogona ukuti mbagị̄le ukwambilila ukufụma kumyinụ? Bo ịkujoba UNTWA.

¹⁴ Agụnịgwege unsyobị uju ali nimbōngo pantị̄mo gwake gwa ng'ōsị iji afị̄ngịle lolị umwene jo ịkujileka, ịkwịkemēsya ku NTWA iji jikabagila iji jili nikilema. Namanga une ndi malafyale nkulūmba bo ịkujoba UNTWA gwa fịlūndilo, kangi ịkuti: Īngamụ jāngu jikutị̄lịgwa mfịkolo fyosa.