Luti 1 - Biblia Umwikemo 1996

Elịmelekị ni kikolo kyake bịkusāmịla ku Moabu

¹ Po papo lelo pakabalilo kala abalagilị bālōngosyaga ikị̄su, po īnjala jāgwịle ikị̄su kyōsa, unnyāmbala jumo ugwa mu Betelehemụ unnya Jụta, alinkusụmụka ukubụka kukị̄su kya Moabu, jūjo, nu nkasị na babanāke abalumyana babili.

² Īngamụ ja nnyambala jula āli jo Elịmelekị, unkasị āli jo Naumị īngamụ, īngamụ sya bānāke abalumyana bāli bo ba Malonị na Kilyonị, bāli Baefụlatị ba mụ Betelehemụ akāja ka mwa Jụta. Balinkwenda nukubūka kukị̄su kya Bamabu balinkwenda nukwakusyala mụ nkị̄su kila kukabalilo akapị̄mba.

³ Lolị̄ umwene Elịmelekị alinkwenda nukufwa, po papo alinkusyala unkasị Naumị na babanāke, bo babīli.

⁴ Bo balinkwenda nukwega abakị̄kulu ba mụmo mụ Moabu; jumo āli jo Olịpa, ujūngi āli jo Luti īngamụ syābo. Lelo po papo bo bagonịle mụla ifyinja mụlōngo;

⁵ bo babīli balinkwenda nukufwa, Malonị na ju Kilyonị, po unkị̄kulu jula Naumị āfwilị̄lwe nabānāke bo babīli kangi nunndume.

Naumị na Luti bịkubụja ukubūka ku Betelehemụ

⁶ Pānyụma Naumị alinkupilika ukuti UNTWA abakētịleko abāndu bāke, ēndịle nukubapa ifị̄ndu. Po papo alinkwịtendekesya ukuti asōkēngemo mụ Moabu pamopene nabakamwana bāke.

⁷ Po papo alinkwenda nukusụmụka ukufụma pabujo ubu ālịpo pamopene na bakamwana bāke, balinkwenda nukubụja ukubūka kukị̄su ikya mwa Jụta,

⁸ Lolị Naumị alinkujoba kubakamwana bāke alinkuti: Namụgomokege mụbūkege uju kūnyụ̄mba ja nna, uju kūnyụ̄mba ja nna. Umwene lolị UNTWA jo ịseababụkisyege ubōlōlo bwinụ ubu mwababōmbelaga aba bafwịle kangi nanịne.

⁹ UNTWA abasajege ukuti mwegịgwege, uju ni nyụmba jake, kangi nunndume gwake. Po papo Naumị alinkwenda nukubafịpa papo ukuti mụkagone, lolị abēne balinkukụ̄ta balinkulila.

¹⁰ Balinkujoba kumyake balinkuti: Himma! Lolị tụkubụjaga nanụngwe kubāndu bako.

¹¹ Lolị umwene Naumị alinkujoba kumyabo alinkuti: Mwe banāngu namụbụjege kumyinụ nōngwa ja fịkị mụbūkege nanịne? Ndinabo kangi une abāna abalumyāna mụ̄nda mmyangu ukuti bo bịsakujaga balume bịnụ?

¹² Napela banāngu namụbụjege kumyinụ papo une ngāngēle ngabagila ukwegịgwa kangi. Napa linga nājobaga ilya kuti ndinulusūbilo, napa linga nājaga nunndume gwangu ikilo iki nēnde nukupāpa abāna abalumyana,

¹³ bule mwabagịle ukubagụ̄lila ukwịsakufịka bo bakulịle? Mwabagị̄le ukuti mụgonege bunobuno kisịta kwegịgwa kangi? Himma! Syo sịkabagila banāngu, ilịsyu ili ịkafụ fị̄jo kumyangu, papo UNTWA āsanụkị̄le.

¹⁴ Po papo balinkwenda nukukụ̄ta balinkulila; Olịpa alinkumfịpa unkamwana gwake alinkugomoka alinkubūka, lolị Luti jo alinkummūmīlila ju nkamwana gwake kisịta kunndeka.

¹⁵ Naumị alinkwandisya kangi ukujoba kwa Luti alinkuti: Kēta, unkulugo abụjịle ịkubūka kubāndu bāke, kwa gyabakyala gyake; nụngwe ubụjege unkongege unkulugo.

¹⁶ Luti alinkujoba alinkuti: Ungajobaga nalimo kumyangu, ndịkukulekesyaga, kope nukubụja ndịkubụjaga. Kuno kubūkaga ugwe ko nịkubūkaga nanịne, apa kwakutūgalaga ugwe po nịkwakutūgalaga papo nanịne. Abāndu bako bịkujaga bāndu bangu nanịne, Kyala gwako ịkujaga jo Kyala gwangu nanịne.

¹⁷ Apa kwakufwilaga po apa nịkwakufwilaga nanịne nukusyilịgwa papo. Ulufụ̄ndo lwa NTWA ulubị̄bị ālūnyịsilege une linga sịmo sị̄mbelị̄le ukulekana nanụngwe; lolị bwene bubufwe bo bwịsakututapulanịaga.

¹⁸ Bo Naumị ammbwene ukuti Luti atụmwịle lōsa ilya kuti ịkubūkaga nagwe, akālyandị̄sye ukujoba kangi.

¹⁹ Po papo balinkwenda bo babili, bājịlekufịka ku Betelehemụ. Bo bafịkịle ku Betelehemụ, po papo akāja kōsa kalinkwenda nukupilika kalinkuswịganịka, abakịkulu balinkujoba balinkuti: Ena! Uju jo Naumị

²⁰ Alinkujoba kumyabo alinkuti: Mụngāngōlelaga īngamụ ja Naumị (iji ko kuti āsekelaga), mụngōlelege īngamụ ja Mala (iji ko kuti nsụlụmēnịe), papo Kyala umwene maka gōsa ambelị̄le ubusụlamanịe fị̄jo une.

²¹ Nāsōkịlemo nkị̄su iki bo ndi nnoge, lolị UNTWA ambụsị̄sye ne nsịta kamo. Po fịkị mụngōlelege īngamụ ja Naumị, bo UNTWA umwene maka gōsa āfụ̄ndịle andwalị̄le ubutolwe une?

²² Bo ātēndị̄ke bunobuno Naumị ābụjịle ukufụma ku kị̄su kya Moabu pamopene na Luti Ummwabu uju āli nkamwana gwake. Bāfịkịle mụ Betelehemụ mbwandilo bwa ntondolo gwa nganụ iji bịkuti isyajịlị.