Joswa 1 - Biblia Umwikemo 1996

Kyala ịkunndagila Joswa isya kukitola ikị̄su kya Kanānị

¹ Bo afwịle Mose ummbōmbị gwa NTWA, UNTWA alinkujoba na Joswa umwana gwa Nụnị uju āli ntūlị gwa Mose.

² Alinkuti: Mose ummbōmbị gwangu afwịle, lilino lelo sụmụkaga ubūkege, ulobokege ulwisi ulu lwa Jolịtanị; ugwe na bāndu bōsa aba, mụbūkege nkị̄su iki nịkubapaga abany'Ịsịlaelị.

³ Ubujo bōsa ubu īnjajo sya malūndi gīnụ sịkukanyangapo, mbapēle umwe bo mụmo nālimfịngị̄le Mose.

⁴ Ukufụmila ndungalāngala ulu na mụ Lebanonị mōsa mpaka ku lwisi ulunywamụ, ulu bịkuti Fụlatị īngamụ, nikị̄su kyōsa ikya Bahịtị ukwakufịka kunyanja īngulūmba mpaka kubujōngelo ilịsuba gụkujaga go mpaka gwa kị̄su kyinụ.

⁵ Atịsakujapo najumo ugwa kukutola ugwe mbūmị bwako bōsa; bo papo nāli na Mose nịkujaga nanụngwe kisịtakukuleka nasịku.

⁶ Gwịkasyege ujege nkịfụ, papo jo ugwe gwe nndōngosị gwa kubị̄ngisya abāndu aba nkị̄su iki nāfị̄ngịle kubị̄sabo ukuti āngubapaga.

⁷ Lyene ilya kuti ujege nkịfụ kangi gwịkasyege, gwịkētege bunụnụ utigi nukutị̄la ubōmbege nukukōnga syosa isị sịli mụngomēlesyo sya Mose ummbōmbị gwangu isị ākupēle; ungasịlekaga nasịku kangi ungasanụkilaga kukiboko ikị̄līlo pamo kukị̄mama, ukuti ugwe gwịse unogege kuko linga kubūka.

⁸ Kalata gwa ngomēlesyo uju angasōkangamo sịku nkanwa mmyako, amasyu ga mwa kalata uju gabalịgwege bwịla bo mụli pakwịpụ̄ta. Ugakolege amasyu gāke uganogēlesyege pamụsi na pakilo, utị̄lege kangi ubōmbege ukukōngana na masyu aga gasịmbị̄gwemo, po kwịsakujipelelaga ulusajo injila jāko kangi po kwịsakukabaga ubunoge.

⁹ Bule ngaja jo une ngulagị̄le? Ukuti gwịkasyege ujege nkịfụ ungatị̄laga kangi ungafwaga umōjo, papo UNTWA, Kyala gwāko, alinanụngwe kōsa kuko linga kubūka.

Joswa ịkubapa īndagilo abāndu

¹⁰ Po papo Joswa alinkubalagila abalōngosị ba bāndu alinkujoba alinkuti:

¹¹ Amụbūkege mmatēmbe ga bāndu bōsa, mụbalagilege abāndu mụtigi: Mwịtendekesyege mụpịnyege ifị̄ndu fyinụ; papo bo gakīndịle amasịku matatu, mụkulobokaga ulwisi ulu Jolịtanị mụkwịngilaga nkị̄su iki UNTWA, Kyala gwinụ, ịkubapaga umwe ukuja kyinụ.

¹² Kangi Joswa alinkubabūla abanya Lubenị na banya Gatị nihāfụ ija kikolo kya Manasị alinkuti:

¹³ Mụkumbukege ilịsyu ili ābalagị̄le Mose ummbōmbị gwa NTWA pala atigi: UNTWA, Kyala gwinụ, ịkubapaga umwe ubujo bwa lutūsyo, kangi ịsakubapaga ikị̄su iki.

¹⁴ Abakasị bīnụ nabānīnụ, ning'ōmbe syinụ, ābịsakusyalaga nkị̄su iki ābapēle Mose ịsīlya lila lya lwisi Josịtanị; lolị abalwabwịte bōsa abāmaka, aba bali mmyịnụ, ābalobokege bo bịgelị̄ke ifịlwilo ukubūka kukubatūla abāmyinụ.

¹⁵ Ukufịka papo UNTWA ịsakubapaga ulusekelo abāmyinụ bo papo ābapēle umwe, bo bakikabịle ikị̄su iki ịkubapaga abēne UNTWA, Kyala gwinụ, po umwe mwịsakubụjaga kukị̄su kyinu iki ābapēle Mose ummbōmbị gwa NTWA; iki kili ịsīlya lila lya lwisi Jolịtanị kubusōkelo ilị̄suba.

¹⁶ Bōsa balinkummwamụla Joswa balinkuti: Syōsa isị utulagị̄le uswe tukubōmbaga kangi linga kuko kututuma tukubūkaga.

¹⁷ Bo mụmo twampilikaga Mose, mo mụmo tukukupilikilaga nanụngwe, UNTWA, Kyala gwako, ajege nanụngwe bo papo āli na Mose.

¹⁸ Umụ̄ndu uju ịkusịkịlanịaga ingomēlesyo syāko nukusịta kugatị̄la amasyu gako abōmbege isị sịli pasịma nindagilo syāko, aịkugogịgwaga. Lyene ilya kuti ujege nnyāmbala kangi ujege nkịfụ īndụmbụla.