Jona 1 - Biblia Umwikemo 1996

Jona ịkukāna ululagilo lwa NTWA

¹ Akabalilo kamo UNTWA alinkujoba nunkụngụlụka Jona umwana gwa Amịtaị alinkuti:

² Būkaga mụ Nịnịbe, nkāja kala akakulūmba; ukafụmụsyege ukuti: Mbumēnye ubutulanōngwa bwa bāndu mụno bujịlịle.

³ Umwene Jona alinkusụmụka alinkujōngela nkāja ka Talasịsị nkị̄su kya Sịpanịja, ukuti ammbopege UNTWA nukusị̄ta kuntị̄la. Po papo alinkusōsya īndalama sya naulị, alinkwenda nukwịngila mụ Sịtịma pamopene na babōmbị ba mụ Sịtịma ukuti abūkege nabo mpaka nkāja ka Talasịsị, ukuti ajege kubutalị nu NTWA.

⁴ Lolị umwene UNTWA alinkutuma ummbelo unkulūmba pamwanya pa nyanja kangi namajiga aga gị̄bisyaga fị̄jo, ịsịtịma jilinkuja kifụkị ukupanguka kangi jilinkupona ukwịbila.

⁵ Ababōmbị ba mụ Sịtịma lulinkubāga ulutēnde ulukulūmba, balinkwenda nukugililila gyabakyala gyabo ukuti gibapoke. Bo buno buno lelo balinkwenda nukutāga ifịtwalo mụnyanja ukuti babupepulepo ubusịto bwa sịtịma. Umwene lolị Jona nkabalilo kala kala ālị̄ngị̄le nukwakulāmbalala mbujo bwankati bwa pāsi mụ sịtịma, alinkugona utulo utwịngị.

⁶ Unkulūmba gwa mụ Sịtịma alinkummwaga mụla alinkunndālūsya alinkuti: Bo bulē bule ugwe kugona utulo? Sụmụka gwịpụ̄tege kwa Kyala gwako usūmege ubutūlị. Mụmo twage atupākị̄sye ēndege nukutulekela ubūmị.

⁷ Ababōmbị ba mụ Sịtịma balinkujobana balinkuti: Atukūngege ubulagusị ukuti tummwage uju atutwalị̄le ubutolwe. Balinkulagula ubulagusị bulinkunkola Jona.

⁸ Po papo balinkujoba nagwe balinkuti: Oko lelo tulīngānịe, ububị̄bị ubu bujege bwanị? Kubōmba fịkị apa? Apēne ufụmịle kị̄su kiliku? Uli kikolo kikị?

⁹ Jona alinkwamụla alinkuti: Une ndi Nhịbulị; ngwịpụ̄ta Ku NTWA, Kyala ugwa kumwanya uju apelịle ikị̄su ni nyanja.

¹⁰ Jona alinkongelapo ukubalīngānịa ukuti: Nannjon̄gaga UNTWA. Abobōmbị ba mụ sịtịma lulinkongelapo ukubakoma ulutēnde! Balinkujoba balinkuti: Isị ubōmbịle mbị̄bị fị̄jo.

¹¹ Balinkunndālūsya balinkuti: Tubōmbe fịkị nanụngwe ukuti inyanja jibote? Papo jākīndililaga ukusāmbuka.

¹² Jona alinkwamụla alinkuti: Amụnndāge mụ nyanja, po jịsakubota. Mmēnye une ukuti busobị bwangu apa umwe gubāgịị̄le ummbelo unkulūmba ugu.

¹³ Mbujo bwa kuti bị̄tikege isya Jona, abēne balinkwijūla namaka gabo gosa ukujitwala īsịtịma kūmbali kūnyanja. Lolị papo ummbelo gwakīndilị̄le ukusāmbuka bātolịgwe ukufịka kūmbali kūnyanja.

¹⁴ Po papo balinkunndilila UNTWA balinkuti: Gwe NTWA tụkwịpụ̄ta ukuti ungatugogaga kunōngwa ja būmị bwa mụ̄ndu uju! Gwe NTWA namanga syosa sịsịsị sịkubōmbịgwa mbwịgane bwako.

¹⁵ Po papo balinkummwega Jona balinkuntāga mụ nyanja, ijēne inyanja jilinkwenda nukutalalila lula lula.

¹⁶ Sịsịsị sịlinkubapelela ababōmbị ba mụ sịtịma ukuntị̄la UNTWA, ko kuno balinkwenda nukusōsya ilị̄kemo lya kwịkemēsya kangi balinkufị̄nga ulufị̄ngo lwakuti bikummbōmbelaga.

¹⁷ Po papo UNTWA alinkujisala īswi īnywamụ ja kummila Jona; Jona alinkuja mundwanda lwa nswi amasịku matatu pamusi na pakilo.