Johani 1 - Biblia Umwikemo 1996

Ilịsyu lya būmị

¹ Kubwandilo āliko ịsyu; umwene ịsyu āli na Kyala; kangi ịsyu āli jo Kyala.

² Umwene kubwandilo alinkuja na Kyala.

³ Fyosa ịtolo fyapelelị̄gwe mụ mmyake, asobe jūjo angali kakapelịgwako nakamo akapelịgwa.

⁴ Mmyake mo bwalịmo ubūmị, ubwene ubūmị bula bulinkuja lumụlị lwa bāndu.

⁵ Ulumụlị lụkumụlika mụngị̄sị, lolị ijēne īngị̄sị jikalusịmisyamo sịku.

⁶ Po papo alinkuboneka umụ̄ndu uju ātumị̄gwe na Kyala, īngamụ jake ali jo Johanị.

⁷ Umwene ālisịle kulusịsịmikisyo, ukuti alusịsịmikisyege ulumụlị lula, ukuti bōsa bitikilege mụli jūjo.

⁸ Umwene jūjo akāli jo lumụlị, himma, lolị ālisịle ukuti alusịsịmikisyege ulumụlị lula.

⁹ Umwene lumụlị gwa nalolị, uju ịkummụlika kukuti mụ̄ndu, ālisịle nkị̄su mụno.

¹⁰ Ālịmo nkị̄su, ikị̄su kyapelelịgwe mụli jūjo, lolị ikyene ikị̄su kilinkusịta nukummwaganịa.

¹¹ Umwene ālisịle mụ mmyake jūjo, lolị abēne abāndu bāke balinkusịta nukummwambilila.

¹² Lolị bōsa aba balimmwambilịle, aba bājị̄tị̄ke īngamụ jake, bo ābapēle amaka ga kujīla bāna ba Kyala.

¹³ Aba bakāpāpị̄gwe mwịlopa, pamo mmbwịgane bwa mmbili, pamo mmbwịgane bwa mụ̄ndu, himma abēne ābapāpịle ju Kyala.

¹⁴ Po papo Ịsyu alinkwịpela ukuja mmbili, alinkwịtūgala mmyitu; tulinkububona ubukulūmba bwake, ubukulūmba bo ubwa Mwana jumojwene ntiga Ngwịse, uju ị̄swile ilị̄pyana nubwanalolị.

¹⁵ Umwene Johanị alinkunsịsịmikisya, alinkukōlela alinkuti: Uju jo uju nanjobaga apa nạ̄tigi, uju ịkwịsa kūnyụma kumyangu, jo nkulūmba kumyangu, namanga umwene āliko bo ngāli nukupāpịgwa.

¹⁶ Ukufụma mbukwile bwake, twesa twambilị̄le ilị̄pyana pamwanya pị̄pyana lilị̄ngi;

¹⁷ namanga īngomēlesyo syalyendịle mwa Mose, lolị ilị̄pyana nubwanalolị fyo fịsịle mwa Jesụ Kilisịtị.

¹⁸ Najumo akammbonamo sịku Kyala; lolị ju Mwana gwa Kyala jumojwene ntiga, uju ali ndupagato lwa Gwịse, jo uju atulingēnịe.

Īndumị ja Johanị Umōsị

¹⁹ Ulu lo lusịsịmikisyo lwa Johanị, bo Abajụ̄ta ba mụ Jelụsalemụ babatumịle abapụ̄tị abakulūmba na banya Lebị kukunndālūsya isya kuti: Kali ugwe gwanị?

²⁰ Umwene alinkwịlāta, alinkusịta nukufị̄nda, alinkwịlāta alinkuti: Une ngaja ne Kilisịtị.

²¹ Po papo abēne balinkunndālūsya balinkuti: Gwanị lelo? Gwe Elịja? Umwene alinkuti ngaja ne Elịja. Abēne balinkuti: Kali gwe nkụ̄ngụlụka jula? Umwene alinkwamụla alinkuti: Himma.

²² Po papo lelo balinkunndālūsya balinkuti: Kali po gwanị? Ulitubūla ukuti tukabāmụlege aba batutumịle? Kwịjoba ukuja gwanị?

²³ Umwene alinkuti: Une ne ịsyu lya nkōlelị uju ịkukōlela ndukubo ịkuti: Amụgolosyege injila ja NTWA, bo mụmo ājobị̄le unkụ̄ngụlụka Jesaja.

²⁴ Aba bātumịgwe bāfụmịle ku Bafalịsaị,

²⁵ bo balinkunndālūsya balinkuti: Po fịkị kōsya lelo, linga ukaja gwe Kilisịtị, pamo gwe Elịja, pamo gwe nkụ̄ngụlụka jula?

²⁶ Umwene Johanị alinkubāmụla alinkuti: Une ngōsya namīsi; Umwene lolị jo īmịle nkāti mmyinụ, uju umwe mụkammanya.

²⁷ Uju ịkūngōnga mụnyụma une, uju une ngabagila ukufụ̄ndula utukoba twa mfịlato fyake.

²⁸ Sịsịsị syabonị̄ke mụ Betanịja, ịsīlya lila lya Jolịtanị, kūko Johanị ōsyaga.

Akang'ōsi ka Kyala

²⁹ Ulwakilabo Johanị alinkummbona Jesụ ịkwịsa kumyake alinkuti: Kēta, ali kala akang'ōsi ka Kyala, aka kịkusōsyapo ubutulanōngwa bwa kị̄su.

³⁰ Uju jo uju nanjobaga apa nạ̄tigi: Ịkwịsa kūnyụma kumyangu umụ̄ndu, uju jo nkulūmba kumyangu, namanga umwene āliko bo ngāli nukupāpịgwa.

³¹ Nanịne ngālimmēnye; lolị une nịsịle nịkōsya namīsi, ukuti afụmụkege kubany'Ịsịlaelị.

³² Po papo Johanị alinkujoba alinkusịsịmikisya fị̄jo alinkuti: Nummbwene Mbepo bo ịkusololoka ukufụma kumwanya ukuti ngụ̄nde, ịkutūgala pamwanya pamyake.

³³ Une ngalimmēnye, lolị uju ālindumịle kukōsya abāndu namīsi jo ālimbūlile ạ̄tile: Umụ̄ndu kwịsakummbonaga bo Mbepo Mwikemo ịkunnsololokela ukufụma kumwanya ịkutūgala pamyake, ujo uju jo uju ịkōkesya mwa Mbepo Mwịkemo.

³⁴ Nanịne nsịbwene, kangi nsịsịmikịsye ukuti uju jo Mwana gwa Kyala.

Abafụ̄ndịgwa abatasị ba Jesụ

³⁵ Kangi ulwa kilābo ikīngi, Johanị alinkwima pamopēne na bafụ̄ndịgwa bāke babili,

³⁶ alinkummbona Jesụ bo ịkwenda alinkuti: Kēta, ali kala akang'ōsị ka Kyala.

³⁷ Abene abafụ̄ndịgwa bāke babili bala balinkumpilika bo ịkujoba, po papo balinkwenda nukunkōnga Jesụ.

³⁸ Umwene Jesụ alinkusyụtụka alinkwaga bịkunkōnga, alinkubalālūsya alinkuti: Mụkulōnda fịkị? Balinkwamụla balinkuti: Mmanyịsị, kwịtūgala kūgu?

³⁹ Alinkubāmụla alinkuti: Ịsaga mụkēte. Po papo lelo balinkubūka, balinkwakukēta apa ātūgalaga; balinkulīnda nagwe ilị̄sịku lila. Pāli po pakabalilo ka kalōngo.

⁴⁰ Andeleja, ugwamyabo gwa Sịmonị Petelị ali jo jumo mụli bala babili aba ba limpilịke Johanị, balinkwenda nukunkōnga Jesụ.

⁴¹ Umwene alinkutala ukummwaga Sịmonị unkulu gwake, alinkummbūla alinkuti: Tummwagịle Mesịja (ko kuti Kilisịtị).

⁴² Alinkuntwala kwa Jesụ. Umwene Jesụ alinkunkēta, alinkummbūla alinkuti: Ugwe gwe Sịmonị unnya Johanị, lolị kwịsakubilikilịgwaga ija Kefa, (ko kuti Petelị, iji kangi ko kuti lwalabwe).

Jesụ ịkubabilikila ba Fịlịpụ na Natanaelị

⁴³ Ulwa kilābo Jesụ alinkulōnda ukubūka mụ Galịlaị, po papo alinkwakummwaga Fịlịpụ. Umwene Jesụ alinkummbūla Fịlịpụ alinkuti: Ngōngaga.

⁴⁴ Umwene Fịlịpụ ali gwa mụ Betịsaịta, bali kāja kamo na Andeleja na Petelị.

⁴⁵ Po papo Fịlịpụ alinkummwaga Natanaelị, alinkummbūla alinkuti: Tummwagịle uju ājobị̄gwe na Mose, mụngomēlesyo kangi na mbakụ̄ngụlụka, jo Jesụ unnya Josefụ ugwa mụ Nasaletị.

⁴⁶ Umwene Natanaelị alinkunndālūsya alinkuti: Kali sịbagị̄le ukufụmamo īnụnụ sịmo mụ Nasaletị? Po papo Fịlịpụ alinkummbūla alinkuti: Tubūke ukakēte.

⁴⁷ Umwene Jesụ alinkummbona Natanaelị ịkwịsa kumyake, alinkujoba alinkuti: Kēta umw'Ịsịlaelị nalolị, uju akaja nulusyobo nalumo mụ̄nda mmyake.

⁴⁸ Umwene Natanaelị alinkunndālūsya alinkuti: Kali ūmēnye bulebule? Umwene Jesụ alinkummwamụla alinkuti: Bo akāli tāsị nukukubilikila Fịlịpụ, nākubwene bo uli pankuju.

⁴⁹ Po papo Natanaelị alinkummwamụla alinkuti: Mmanyịsị, ugwe gwe Mwana gwa Kyala, gwe Malafyale gwa Ịsịlaelị.

⁵⁰ Po papo Jesụ alinkummwamụla alinkuti: Kwịtika papo ngubulile ukuti nākubwene pankuju? Kwịsakusịbonaga īngulūmbapo ukusịkīnda na ịsị.

⁵¹ Po papo alinkuti: Nalolị nikukubūla une nikuti: Mwịsakukubonaga kumwanya kwịgwịke, bo nabāndumị ba Kyala bịkuti nukufyuka, bịkuti nukunsololokela Nnyamụ̄ndu.