Jesaja 1 - Biblia Umwikemo 1996

¹ Ubusetulị bwa Jesaja umwana gwa Amosị ubu ābubwene panōngwa ja Jụ̄ta na Jelụsalemụ mmasịku ga Usịja, Jotamụ, Ahasị, na Hesekịja abanyafyale ba mwa Jụ̄ta.

Kyala ịkubakemela abāndu bāke

² Pilika gwe kumwanya, tega imbulukutu gwe kị̄su; papo UNTWA bo ajobịle atịle: Abāna aba mbaswilịle jujune kangi mbakusịsye jujune bāsāmbukị̄le une.

³ Īng'ōmbe jimmēnye umwenenajo, jope nimbụ̄nda jikimēnye ikibaga kya ntwa gwake; lolị abany'Ịsịlaelị bakāmanya une, abāndu bāngu batịkusyaganịa.

⁴ Ahīlị gwe kikolo ikitulanōngwa, mwe bāndu mwe mụlambikị̄gwe ni mbị̄bị, mwe luko lwa babōmba mbị̄bị mwe bāna mwe mụkōnānga. Mụnndekịle UNTWA munhenwịle umwịkemo gwa Ịsịlaelị, mụkīndēne nagwe mụnsịndịle īnyụma.

⁵ Papo fịkị mụkulōnda ukuti mufụ̄ndịgwege kangi? Apa mụkāli mụkusāmbuka? Ịsịlaelị untu gwako guli nifịfụlalo, kangi īndụmbụla jako numōjo gwako fịbịnịle.

⁶ Ukufụma ndujajo lwa nkilūndi mpaka kuntu, ubunụnụ bukajamo nabumo; lolị fịlịmo fịfịfụlalo, ubung'wale, nifịlōnda ifị̄ fikusōka amafịla, ifị fịkabāndịgwa, fịkapịnyịgwa nutwenda, kangi fịkapakịgwa īnyēmba.

⁷ Ikị̄su kili ịtolo, utwaja twinụ tukosị̄gwe numōto bo mụ̄kukēta namāso gīnụ, abahēsya bịkupoka ikị̄su kyinụ, kangi bịkōnānga utūndu tōsa.

⁸ Akāja ka Syonị kalekị̄gwe kēne, kakaja nu nndindililị, kaliti bo ilịtēmbe lya mụnngūnda gwa māfị̄lu, ngati kijụ̄mba mụnngūnda gwa mụngụ.

⁹ Linga UNTWA umwene maka gōsa akātusyesye twe bāndu nabamo kubūmị, angali tuli bo ju Sotomụ na Gomola.

¹⁰ Pilikisya ilịsyu lya NTWA, mwe balōngosị ba mụ Sotomụ, tega imbulukutu kulumanyịsyo lwa Kyala gwitu mwe bāndu ba mụ Gomola.

¹¹ UNTWA ịkujoba ịkuti: Gịkūmbumbulila fịkị amakemo gīnụ amị̄ngị aga mụkwịkemēsya kumyangu. Mfwene nalyo ilịkemo ilyokye ilya ng'ōsị namafụta ga fịnyamāna ifịtụpe; mụndwalị̄le amakemo gīnụ amị̄ngị aga gangatēsye, ndikulisekelela ilịlopa lya ng'ōmbe pamo ilya ng'ōsị pamo ilya mbene īmbōngo.

¹² Apa mụkwịsa kukwịpụ̄ta kumyangu namakemo gīnụ, jwanị uju ịkubalōnda umwe ukuti mwịse mukanyege nnyụ̄mba jāngu?

¹³ Komma ukundwalila une kangi amakemo gīnụ aga lusyobo, ulunụ̄sị lwa lubani gwinụ uju mụkufụ̄kisya lụkūngalalisya fị̄jo une. Ifyaka fyinụ fya mwesị umpya, sabati, ningomāno syinụ ni nyịpụ̄to syinụ syonāngị̄gwe nimbị̄bị syinụ.

¹⁴ Imịesị gyinụ imịpya, ifị mụmbatīkị̄le umōjo gwangu gukịkyela nafyo gukasịgana napanāndi papo sị̄pelịle ukuja kitwalo kisịto kumyangu, sịngatēsye fị̄jo.

¹⁵ Bo mukwịnula amaboko gīnụ pakwịpụ̄ta, une āngugafịsaga amāso gangu āndikubakētangako āndikubapilikisyaga. Papo amaboko gīnụ gịswịle ilịlopa.

¹⁶ Mwịjosyege, mwịjēlusyege. Leka īmbị̄bị syosa isị ngubabona umwe bo mụli pakubōmba; leka ukubōmba īmbị̄bị.

¹⁷ Kangi mụmanyịlege pakubōmba īnụnụ; mụbulōndege ubulōngị bwanalolị, mụbalwilege aba bịkubonelịgwa; mụbatūlege aba bakaja nabị̄sabo mubīmilege abafwile.

¹⁸ Oko, lelo ịsaga tujobesanịe, bo ịkujoba UNTWA ịkuti: Napa linga īmbị̄bị syinụ ngesēfụ āsịkujaga nyēlụ swe bo īngala, napa linga ngesēfụ sịkindilị̄le fị̄jo āsịkujaga nyēlụ bo amasapa amēlụ swe.

¹⁹ Lolị pēne papo linga mwịsakūndị̄laga nāpo mwịsakulyaga ifị̄ndu ifịnụnụ ifị ikị̄su kịkupa.

²⁰ Loli linga mụkāngana une kangi mụkūsāmbukila une po āmụkwịsakupyụtịgwaga nulūbo nkati mbwịte. Jujune ne NTWA njobịle.

Akāja ka mbị̄bị

²¹ Akāja aka lumo kāli kagolofụ lilino ulu kasanwịke kali bo akāja kā bāmalaja, aka ịjolo kālịswịle nabāndu abagolofụ, lilino kasyele nabagogị bēne.

²² Gwe Jelụsalemụ īndalama syako sị̄pelịle ukuja mị̄ndu gya kwịjala, ubwalwa bwako bwa māfị̄lu bongēne namīsi.

²³ Abalōngosị bako basāmbuke bamanyānị babahījị. Kukuti mụ̄ndu ịkwambilila ikyuma kya mbunị̄ongafụ kangi ịkulōnda fị̄jo nukufịbopela ifya kusesịgwa. Batịkubatūla abapīna, batịkubīmila abafwile.

²⁴ Po apa lelo ịkujoba UNTWA, UNTWA ugwa fịlūndilo, ugwa maka gwa Ịsịlaelị ịkuti: Muhīlị! Ngubabụkisyaga ulufụ̄ndo mwe balugu bāngu, po āmụtịsakwandisyamo kangi ukūndamya une.

²⁵ Āngukugolokesya ikiboko kyangu ugwe, āngukwelusyaga ubunyalị bwako bōsa, ākujaga bo ikyela iki kyengusị̄gwe mmōto iki ubunyalị bōsa busōkịlemo.

²⁶ Āngukugomokesyaga abalōngosị bāko bịkujaga bo ulwakwanda, kangi namafụmụ gāko āgịkujaga bo ulwambwandilo. Kūnyụma lelo ākukōlelịgwaga ukuja gwe kāja akā bugolofụ kangi akasūbilịgwa.

²⁷ Ubulōngị bwịsakumpokaga Syonị, kangi ubugolofụ bwisakubapokaga abāndu bāke aba bali mmyake aba bịkwịlāta.

²⁸ Lolị abasāmbuke nabatulanōngwa ābịsakupịnyịgwaga palikimo kangi bope bala bịkunndeka UNTWA bịsakupyụtịgwaga.

²⁹ Namanga mwesa mwe mwịpụ̄taga kumịpịkị mwagisekelelaga, mwịsakusụlụmanịaga mụkujaga nisonị̄ mwịsakusūsịgwaga nimịgūnda gya masyeto gīnụ igi mugị̄salị̄le.

³⁰ Namanga nụmwe āmụkujaga bo umpịkị umwala ugu amānị gāke gūmịle gali bo unngūnda ugu gutịkōneleligwa namīsi.

³¹ Bo ulu ilị̄su ilyumụ lịkwasịgwa nindụlụlụkila, mo muno bope abāndu ba maka bịsakupyụtilị̄gwaga bōsa nimbị̄bị syabo bābo, kangi atịsakujangako najumo ugwa kwịsakulugomola ulupyụto ulo.