Jakobụ 1 - Biblia Umwikemo 1996

¹ Joune Jakobụ ne mmbōmbị gwa Kyala kangi ne mmbōmbị gwa NTWA Jesụ Kilisịtị, nịkubasị̄mbila mwebāfịkolo kalōngo na fịbili mwe mụbalanị̄le nkị̄su kyosa, nịkubaponịa nịkuti: Mụgonịle?

Ulwịtiko na mahala

² Mwe bāmyitu, amụsekelege ịtolo linga mwagịle īngelo isị naisị sịkubị̄sila,

³ namanga mụmēnye ukuti linga ulwịtiko lwinụ lụkusịtola īngelo sịsịsị po mụkukabaga amaka ga bufịsalyojo.

⁴ Ubwene ubufịsalyojo bo fịkuti bubōmbēge īmbōmbo jake bufịkēngepo ukuti bubapelelege ukukula kisịta kusyalako, mụjege bapelelesye mwe basịtakwagilwa fịmo.

⁵ Lolị linga jumo mmyinụ apōndịlwe amahala; jo alīsumaga Kwa Kyala namanga ịkōna ịtolo ukubapa bōsa ni ndụmbụla īnyēlụ kisịta kulumbūsya, po isakwambililaga.

⁶ Lolị fịkuti asūmilege ndwịtiko āngịlāmwaga napanāndi. Namanga uju ịkwịlāmwa jo afwene bo ilịjiga lya mụnyanja ili lịkujuganịgwa nummbelo kuno nakuno.

⁷ Umụ̄ndu bo jujuju akabagila ukusūbila ukwambilila fịmo ifịfụma ku NTWA.

⁸ Umụ̄ndu uju īndụmbụla syake sịpasēne, ndwendo lwake akaja napa īmịle.

Ubulōndo nubukabị

⁹ Unkilisịtị unndōndo abagị̄le ukuti asekelege bo Kyala ammwịnwịle,

¹⁰ unkilisịtị unkabị jope asekelege bo Kyala ansụlwịsye. Namanga abakabị bịsakujōngaga bo ubulenge bwa nndị̄su.

¹¹ Ịlị̄suba lịkusōka nulumụ ulukali, lịkōkya ilị̄su, ubulenge bụkulagala, ubunụnụ bwake bụkujōnga lōsa. Bo sịsakujaga na kumụ̄ndu unkabị, ịsakukofụkaga amalikege bo ịkusyungūtila mụ mbōmbo syake sya kukabilamo ubukabị.

Īngelo ni mbēfyo

¹² Nsangalufụ umụ̄ndu uju ịkwima ndwịtiko, atịkuseguka, bo ali mụ ngelo, namanga linga asịtolịle po ịsakwambililaga īngiga ja būmị, iji Kyala afị̄ngịle ukubapa aba bannganịle.

¹³ Umụ̄ndu najumo uju ịkupēfịgwa, angajobaga ukuti jo Kyala uju ịkumpēfya. Kyala atịkupefịgwamo nimbị̄bị, po jope atịkumpēfya nimbị̄bị umụ̄ndu najumo.

¹⁴ Lolị umụ̄ndu ịkupēfịgwa nifịnyonyo, fyake jūjo bo fịkuntwalila ubunyonywe nukunsōnga.

¹⁵ Po lelo ubunyonywe bụkukaba ikifụba, bụkwenda nukupapa ubutulanōngwa, bo ubutulanōngwa bukomịle bufịkịlepo, bukupapa ubufwe.

¹⁶ Mụngasyobịgwaga mwe bāmyitu mwe baganịgwa umwe.

¹⁷ Fyōsa ifịkūngilwa ifịnụnụ kangi fyōsa ifyabupe ifịnụnụ fịkufụma kumwanya; fịkusụlụka ukufụma kwa Kyala, Tāta uju āpelịle īmụlị syakumwānya. Uju atịkwānduka sịku, kangi atịkusanūngana kifwene bo unsyungūlu.

¹⁸ Mbwịgane bwake jūjo ātupelị̄le mwịsyu lya bwanalōlị, ukuti twe tujege mmbujo bwa kwanda kufịpelịgwa fyōsa.

Ukupilika nu kubōmba

¹⁹ Mụkūmbukege īnōngwa isị mwe bāmyitu mwe baganịgwa: Umụ̄ndu gwesa fịkuti ajege mwēngo ukupilika, lolị angakūjilaga pakujoba kangi angabopelaga ukukalala.

²⁰ Ingalalisị sya mụ̄ndu sịtịkunkabila ubugolofụ ubu Kyala ịkubulōnda.

²¹ Bunobuno lelo amụlutāgege ulwendo ulunyalị nutujīlo tōsa utubị̄bị, mwịnị̄ngege kwa Kyala mbutēmbēlefụ mụlyambililege ilịsyu ili ịkubyala mụndụmbụla syinụ ili lili namaka ukugipoka imyojo gyinụ.

²² Mụngị̄syobaga mwịbēne nkupilika kwene kukupilika ilịsyu lyake; lolị mụlibōmbelege.

²³ Uju linga ịkupilika ilịsyu lelo atịkulibōmbela jo afwene bo umụ̄ndu uju ịkwịkētela nkikētelo ịkwịbona mụno ajīlị̄le kumāso.

²⁴ Ịkwịjēnēsya fị̄jo napo asōkēngepo lelo nakalīnga ịtolo ịkwịjị̄bwa mụno kumāso kwake kujīlị̄le.

²⁵ Lolị uju linga ịkulwenēsya fị̄jo ulukomēlesyo ulupelelesye ulu lụkubābula abāndu, uju alūmīlị̄le atịkulupilika kukulupilika kwene po ēndege nukulwịbwa, lolị ịkulubōmbela, umụ̄ndu jujuju jo ịsakusajịgwaga na Kyala mụ mbōmbo iji ịkubōmba.

²⁶ Umụ̄ndu uju ịkuti ndi mmbōmbị gwa Kyala bo atịkwịtị̄ma nndulimị jo ịkwisyōba mwene mụ̄nda mmyake jo ubutị̄la. Kyala bwake bwa ịtolo.

²⁷ Ubunụnụ ubu Kyala Tāta ịkububona bo ụbu: Ukubakēta mmbukamāndanịgwa bwabo abapīna (aba basyīlịle abapāpị bābo), na bakị̄kulu abafwile, nukwịjēpusya kumbị̄bị sya nkị̄su.