Hagai 1 - Biblia Umwikemo 1996

Ululagilo lwa NTWA lwa kujijēnga kangi Inyụ̄mba ja NTWA

¹ Nkyinja kya bubili kya malafyale Ndalịjo, mmwesị gwa ntandatu, pịsịku lya kwanda ilya mwesị gula gula, ilịsyu lya NTWA lilinkwendela mụ nkụngụlụka Hagai ukwịsa kwa Selụbabelị umwana unndumyana gwa Jehosatakị, umpụ̄tị unkulūmba, lilinkuti:

² UNTWA gwa fịlūndilo ịkujoba ịkuti: Abāndu aba bịkuti kakāli ukwịsa akabalilo ka kujēnga kangi ịnyụ̄mba ja NTWA.

³ Lelo po papo ilịsyu lya NTWA lilinkwendela mụnkụngụlụka Hagai ukwịsa lilinkuti:

⁴ Mwe bandu bangu, fịkị ukuti umwe mụgonege mụnyụ̄mba isị sịjēngị̄gwe kanụnụ bo Inyụ̄mba jangu Īnyikemo jipāngwịke?

⁵ Lilino lelo UNTWA gwa fịlūndilo ịkuti: Amwịnogone isị sịbagị̄le.

⁶ Mwabyele fịngị lolị mụfụnjịle fịnāndi; mụkulya lolị mụtịkwịkuta; mụkunwa lolị mụtịkufwana; mụkwịfwika imyenda lolị najumo atịkulwaga ulufụkụ; uju ịkufwala umfwalo, ịkufwala umfwalo gwakugubịka mụnyāmbi iji jitobwịke.

⁷ UNTWA gwa fịlūndilo ịkuti: Amwịnogone muno syendile isị mubōmbile.

⁸ Amụfyukege kufyamba mụkatwale imịpịkị mụjēnge īnyụ̄mba, ukuti mo nịkyelege kangi ukuti mo mbonekelege ubukulūmba bwangu.

⁹ Mwasūbilaga untondolo umwingi loli gwali nnāndi bo mụtwele kukāja nāgụnyāmbēnịe. UNTWA ịkuti: Fịkị jipangwịke bo umwe kukuti mụ̄ndu ikutukunyika ni nyumba jake jujo.

¹⁰ Fyobene kumwanya īndūngwa jisị̄tịle, ifị̄ndu fịkānịle pakị̄su.

¹¹ Ndwele ulumụ pakīsu na mfyamba, pa mbejụ, pabwalwa bwa māfīlu ubupya, pa mafụta, na pakandu kosa aka kịkwagịgwa pakị̄su, na kubandu, nakufịnyamāna, na kumbombo sya maboko syosa.

Abāndu bịkukōnga ululagilo lwa NTWA

¹² Lelo po papo Selụbabelị unnya Salatyelị, na Joswa unnya Jehosatakị, umpụ̄ti, unkulumba, na bandu aba bāsyele balinkulitị̄la ilisyu lya NTWA kyala gwabo, na masyu ga Hagai unkụngụlụka bo mụmo UNTWA alintumị̄le, abāndu balinkuntị̄la

¹³ Buno buno lelo, Hagai, untumịgwa gwa NTWA alinkubabūla abāndu indumị ja NTWA ijị jātigi: UNTWA ịkuti: Une ndi nanụmwe.

¹⁴ Po papo UNTWA alinkubapelela ukupya īndụ̄mbụla syabo ba Selụbabelị unnya Salatyelị, unndagili gwa Jụ̄ta, na Joswa unnya Jehosatakị, umpụ̄tị, unkulūmba nāba bạsyele; balinkusụmụka ukwịsa pakubōmba pa nyụ̄mba ja NTWA gwa fịlūndilo, Kyala gwabo,

¹⁵ pịsịku lya malōngo mabili na mana lya mwesị gwa ntandatu nkyinja kya bubili kya malafyale Ndalịjo.