Filimoni 1 - Biblia Umwikemo 1996

¹ Joune Paulị, ne mpịnyịgwa kunōngwa ja Kilisịtị Jesụ, nugwamyitu Tịmotị, tụkukusị̄mbila gwe Fịlịmonị gwe nnganịgwa kangi gwe mmbōmbanisi mwịnītu,

² tụkukusị̄mbila nanụngwe Apịja gwe ịlūmbu gwitu, nanụngwe Alikipu gwe nndwabwịte mwịnītu, tụkukisị̄mbila nikipānga iki kịkukomāna nnyụ̄mba jako.

³ Ilị̄pyana lijege namumwe, nulutēngāno ulufụma kwa Kyala Tāta nu NTWA Jesụ Kilisịtị.

Ulugano nu lwịtiko lwa Fịlịmonị

⁴ Gwe gwamyitu Fịlịmonị nịkukūkumbuka utubalilo tōsa mụnyịpụ̄to syangu, ngugwa ulupị kwa Kyala,

⁵ namanga ngupilika isya lugano lwako ulwa kubagana abāndu ba Kyala bōsa nulwịtiko ulu ulinalo mụ NTWA Jesụ.

⁶ Ngwịpụ̄ta ukuti ubulilanịsị bwako nanụswe ndwịtiko lwitu twesa bōngelelege ukutupelela ukusyaganịa isya sajo syosa isị tụkusyagila nkumanyana na Kilisịtị.

⁷ Gwe gwamyitu ulugano lwako lūmbēle ulusekelo ulukulūmba nulusūbisyo ulwịngị, usịsangalwịsye īndụmbụla sya bị̄kemo ba Kyala.

Ukusūma, kunōngwa ja Onesịmo

⁸ Fyobene nābagị̄le ukukịba ịtolo, apa ndinkamụgo mwa Kilisịtị, ukukulagila ukubōmba isị sịbagị̄le ukubōmbịgwa.

⁹ Lolị kunōngwa jakuti nguganịle po fịkuti lolị ngusūmege. Ngubōmba sịsịsị pālema ne Paulị, ne mbīkị̄gwe ukuja mmbujo bwa Kilisịtị Jesụ, ne kangi lilino ndi mpịnyịgwa kunōngwa jake.

¹⁰ Nịkunsūmila sịmo kumyako umwanāngu mwa Kilisịtị Onesịmo; namanga mụnnyololo nāli gwịse mụmbepo.

¹¹ Jo Onesịmo jula akabalilo kamo akāli na mbōmbo najimo kumyako, lolị lilino ali nimbōmbo kumyangu na kumyako.

¹² Lilino ngunngomolela kumyako, ịkwịsa kumyako bo īndụmbụla jangu jujune.

¹³ Nāliganịle fị̄jo ukummbīka papapa ukusyala nanịne mbujo bwako, ukuti āndūlege īmbōmbo ja Ịbāngilị bo ndi mụnnyololo,

¹⁴ lolị ndịkulōnda ukubōmba sịmo bo ukị̄tika ugwe. Ngīgana ukukufị̄mbilisya ukundūla une, lolị fịkuti ubōmbelege mụno gwịganịle jujugwe. Bunobuno lelo ngīgana ukubōmba sịmo bo ugwe ukị̄tika.

¹⁵ Kingamo pamo syo isị syalimpelị̄le ukuti ēpukeko kumyako akabalilo kanāndi kokuti ịse agomokelege kumyako gwịse ujege nagwe utubalilo tōsa,

¹⁶ kisịta kuja ntumwa kangi, lolị ukukīnda nuntumwa, ukuja gwamyinụ unnganịgwa mwa Kilisịtị. Mo mụno ajīlị̄le fị̄jo kumyangu ukuja nkamụ gwangu, po ịkupelaga pōkị ukuja nkamụgo ugwe mụmmbili na mụ NTWA?

¹⁷ Lelo linga une mụ̄nda mmyako ūmbīkịle ukuja nndīlanịsị gwako ndwịtiko, po ummwambililege jope bo mụmo ngali kunyambililila une.

¹⁸ Linga ākubōmbị̄le sịmo īmbị̄bị pamo ālị̄le fịmo ifyako, po ūmelelege une.

¹⁹ Ngusị̄mba apa nikiboko kyangu jujune nguti: Joune Paulị nịsakukuhōmbaga, syo ndịkukukumbusya lolị isyakuti nụngwe uli nịnōngwa ija kwịhōmba kumyangu jujugwe gwesa ịtolo.

²⁰ Syo isị gwamyitu ngulāmba ukuti ūnyābule kunōngwa ja ngamụ ja NTWA, utalalisye umōjo gwangu mbukamụ bwa mwa Kilisịtị.

²¹ Ngusị̄mba kumyako nulusūbilo ukuti kumbombelaga isị ngusūmịle; Mmēnye ukuti nalolị kwịsakubōmba īnụnụ ukukīnda na pali isị nsūmịle.

²² Pamwanya pali isị, ngusūma ukuti undendekekesyege ngānịla ubugono, namanga ngusūbila ukuti kunōngwa ja nyịpụ̄to syinụ Kyala ịsakūndūla une ukwịsa kukubakēta.

Īmbonịo sya bumalīkisyo

²³ Ịkukuponịa fị̄jo Epafụla umpịnyịgwa Mwịnāngu mụ nnyololo kunōngwa ja Kilisịtị Jesụ.

²⁴ Bope ba Malika, na Alisịtalikị na Ndema na Luka aba bịkūndūla īmbōmbo bịkukuponịa.

²⁵ Ilị̄pyana lya NTWA gwitu Jesụ Kilisịtị lijege nanụmwe mwesa.