Esela 1 - Biblia Umwikemo 1996

Sailasị ịkubalagila Abajụ̄ta ukugomoka

¹ Nkyinja kya kwanda Sailasi bo malafyāle nkị̄su kya Pelesịja, isị āsịjobịle UNTWA mụ nkụ̄ngụlụka Jelemịa alinkusịpela ukuti sị̄sege bo mụmo āsịjobị̄le. UNTWA alinkugusụkānịa umōjo gwa Sailasị umalafyāle gwa Pelesịja ukuti afụmụsyege mōsa mbulagilị bwake kangi asị̄mbege atigi:

² Ulu lo lulagilo lwa Sailasị Umalafyāle gwa Pelesịja. UNTWA, Kyala gwa kumwanya, āmbēle ukuti nkilagilege ikị̄su kyosa kangi īmbōmbo ja kunnjengela īnyụ̄mba īnyị̄kemo mụ Jelụsalemụ nkị̄su kya Jụ̄ta.

³ Kyala ajege nanụ̄mwe mwesa mwe bāndu bāke. Mụsụmwịke ku Jelụsalemụ kukujijēnga kangi īnyụ̄mba īnyị̄kemo ja NTWA, Kyala gwa Ịsịlaelị, Kyala uju abāndu bịkwịpụ̄tako mụ Jelụsalemụ.

⁴ Linga abāndu bōsa abakagịgwa bịkulōnda ubutūlị ukuti bagomoke, abapalamanị bābo bịkubatūlaga. Bịkubapaga fēsa na sahabu, utūndu twakupēgwa, imịtịmo, pamwanya pamakemo gakubīka nnyụ̄mba īnyịkemo ja Kyala mụ Jelụsalemụ.

⁵ Po lelo abakulūmba mfịkolo fya Jụ̄ta nifya Benjamịnị, abapụ̄tị na Banya Lebị, nu mụ̄ndu gwesa ujūngi uju īndụmbụla jāke Kyala ajisụkēnịe ālịtendekị̄sye ukujijēnga kangi īnyụ̄mba ja NTWA mụ Jelụsalemụ.

⁶ Abapalamanị bābo bōsa balinkubatūla, balinkubapa utūndu twịngị; ifyombo fya fēsa, sahabu, nutūndu utūngi, imịtịmo, utūndu utupala na makemo ga bwịgane ga Nyụ̄mba Īnyị̄kemo.

⁷ Saịlasị alinkubagomolela ībakụlị nifịkōmbe ifị Umalafyale Nebukatịnesa ālyegịle ukufụma Nnyụ̄mba Inyịkemo mụ Jelụsalemụ, ifị alinkufịbīka mụ nyụ̄mba sya gyabakyala gyake.

⁸ Alinkumpa Mịtịletatị, unkulūmba gwa ịbokosị lya ndalama syabutwa, uju alimmbātikị̄le pakalata Syesịbasa unkabakị̄su kya Jụ̄ta,

⁹ bo ulu: amabesenị ga sahabu elufụ jumo, amabesenị ga fesa elufụ, jumo, ībakụlị isị̄ngị amalōngo mabili naịhāno naịna,

¹⁰ ībakụlị sya sahabu amalōngo matatu (30), ībakụlị sya fēsa baelufụ babili nabāmịa bana niịlōngo limo (2,410), nifyombo ifị̄ngị elufụ jumo;

¹¹ ifyombo fyōsa fya sahabu nifya fēsa fyali baelufụ bahāno nabāmia bana amalōngo ntandatu na fịhāno na fịna (5,469). Syesịbasa āfịtwele fyosa fịfịfị, bo abakagịgwa bịkutwalịgwa ukufụma mụ Babelị ukubūka ku Jelụsalemụ.