Esekyelị 1 - Biblia Umwikemo 1996

Ubusetuli bwa Esekyelị ubwa kwanda ubwa Kyala

¹ Nkyinja kya malōngo matatu, pị̄sịku ilyabuhāno ilya mwesị gwa buna, bo ndi pamopēne na bany'Ịsịlaelị Abakagịgwa kūmbali ku lwisi Kebali, kumwanya kwalịgwịke po papo ndinkummbona Kyala mụ njosị.

² Pị̄sịku lya buhāno lya mwesị gula gula (Kyali kyo kyinja kya buhāno ikya kuja mbukagịgwa Umalafyale Jehojakịnị),

³ ilị̄syu lya NTWA lyalimmwịsị̄le umpụ̄tị Esekyelị umwana gwa Busi nkị̄su kya Bakalịtaja pambali palwisi Kebalị. Pala pala amaka ga NTWA galimmwịsị̄le.

⁴ Ndinkukēta ndinkwaga ummbelo gwa maka gukukụla ukufụma kulūlu, ilịbīngu ilịnywamụ lisyungūtililịgwe nulumụlị, umōto gulinkūmīlisya ukusōka, pakati ndinkububona ubwelụ, ubu bufwene kyela kibūngu nkati mmōto.

⁵ Ukufụma nkati mụmo ndinkufịbona fịlinkufwana fịnyamāna fịli fịna, fyabonekaga ukufwana fịli nimịbili gyabāndu.

⁶ Kimo kimo kyali nifyenị fịna kangi namapiko mana.

⁷ Amalūndi gābo gāgolwịke, fyali nifyuga bo ing'ōmbe, ifyuga fịfịfị fyamụlikaga ukufwana kyela kibūngu iki basụkịle.

⁸ Fyāli na maboko ga mụ̄ndu kūsi kumapiko gabo imbafụ syosa ịna; fyo fịna fyali nifyenị fyabo na mapiko gābo bo buno buno.

⁹ Amapiko gābo gāpalamasanịaga; bo fịkwenda fikāsyụtụkaga, kimo kimo kyalōngolaga mụnkyenị.

¹⁰ Ukuboneka kwa fyēnị fyābo, Kimo kimo kyāli ni kyenị kya mụ̄ndu nkyenị, kangi fyo fịna fyali nifyenị fya ngalamụ kulubafụ lwa kukị̄līlo, kangi fyo fịna fyali na kumāso kwa ngāmbaku ulubafụ lwa kukị̄mama, kangi fyōsa fyāli na kumāso kwa ịpūla kwịkosị.

¹¹ Amapiko gābo gābālwịke kumwanya; ikinyamāna kimo kimo kyali na mapiko mabili aga gāpalamasanịaga nagā kīngi; agāngi mabili gāgikụpikilaga imibili gyabo.

¹² Fyosa fyalōngolaga mụnkyenị, fyabūkaga kuno imyojo gyabo gyafịtalusyaga, fịkāsyụmbụtụkilaga kubūngi bo fịkwenda.

¹³ Pakati pafịnyamāna fịfịfị galinkuboneka ukufwana mababu gịkwaka umōto ukufwana tōkị isị sịkumụlikamụlika kuno na kuno mfịnyamāna; umōto gulinkusōsya ulumụlị, lwa njasị lulinkufụma mmōto.

¹⁴ Po papo ifyabūmị fịfịfị filinkubopela kuno na kuno ukufwana lumụlị lwa njasị.

¹⁵ Lelo bo ngufịkēta ifịnyamāna, ndinkwaga kimo kimo muli fyo fịna kipalamēne nulugōmbelo. Kukuti kinyamāna kyapalamēne nulugōmbelo lumo.

¹⁶ Ukuboneka, nububūmbe bwa ngōmbelo sịsịsị, syamụlikaga ukufwana kyela, kangi syosa ịna syafwene ịtolo, sịlinkuboneka ukufwana lumo lumo luli nndunịne.

¹⁷ Bo sịkwenda sịlinkwenda ukubūka nkyēnị mụmbafụ syābo syo ịna kisịta kupūsanịka.

¹⁸ Īngōmbelo syosa syo ịna syalyongelịgwemo ummbili mụmbali ni sāmbo mụmbali mōsa ukusyungūtila, mụngōmbelo mwali na māso.

¹⁹ Bo ifịnyamāna fikwenda ukubūka nkyenị, syope īngōmbelo syendaga mụmbali mmyabo; kangi linga ifịnyamāna fịkusụmuka, īngōmbelo syope syasōkangapo apa syāli.

²⁰ Kōsa kuno umōjo gwalōndaga ukubūka, fyabūkaga; īngōmbelo syope syasụmụkaga nafyo, papo umōjo gwa fịnyamāna gwali mụngōmbelo.

²¹ Bo ifịnyamāna fịkwenda ukubūka nkyenị, syope syendaga ukubūka nkyenị; bo ifịnyamāna fyimịle, syope syimaga; bo fịkusōkapo apa fyalyimịle, īngōmbelo syope syasōkangapo, namanga umōjo gwa kinyamāna gwali mụ̄ngōmbelo.

²² Pamwanya pa mịtu gya fịnyamāna kālịpo akāndu aka kafwene bo umpālānga, kāmụlikaga ukufwana kikētelo kisịsya kigobēme pamịtu gyabo.

²³ Pāsi pa mpālānga unngobamụ gugugu amapiko gābo ga bālukilēne, kukuti kīnyamāna kyali na mapiko mabili aga gagikụpikilaga imibili gyabo.

²⁴ Ndinkupilika ukulila kwa mapiko gābo bo fịkwenda; gālilaga ukufwana mīsi mị̄ngị, kwafwanaga kutajanịka kwa njasị ja mwenemaka gosa; unjwego gwafwene mmbelo, gwafwene mmbụbụ̄to gwa kilūndilo kya bāndu. Bo fyimịle fyagwisyaga amapiko gābo.

²⁵ Po papo unjwego ukufụma mụ mpālānga mmwanya gulinkuja pamịtu gyabo; bo fyimịle fịlinkugwisya amapiko gābo.

²⁶ Pamwanya pampālānga unngobamụ ugu gwāli pamịtu gyābo kālịpo akāndu kamo aka kāfwene kikota kya butwa iki kyafwanaga kili nutubwe utupala. Pakikota kikiki alinkufwana ātūgēlepo umụ̄ndu.

²⁷ Ndinkummbona bo abalịle ukufwana kyela kibūngu, kangi pị̄pị nagwe nukusyungūtila mụno mwabonekaga ukuja go nsana gwake, ukubūka kumwanya kālịko akāndu aka kafwene mōto; kangi ukufụma mụli ugu gwafwene nsana ukubūka pāsi ndinkugubona ukufwana mōto, ubwelụ bugusyungūtị̄le.

²⁸ Ukufwana lulānga lwa fụla mo mụno lulinkubonekela ubwelụ ulumụlị ulu lwasyungūtị̄le. Kāli kāndu aka kịkunāngisya ubusịsya bwa NTWA. Bo ndukētịle nāgwịle ulutēnde; po papo ndinkupilika ilị̄syu lya jumo bo ikujoba.