BaRoma 1 - Biblia Umwikemo 1996

¹ Paulị ummbōmbị gwa Jesụ Kilisịtị, uju ābilikilị̄gwe ukuja mfụ̄ndịgwa, uju ābīkị̄gwe ukuja gwa kufụmụsya ilịbāngilị lya Kyala,

² ili āfị̄ngịle ngānị ukwendela mbasololị, mụnōngwa īnyị̄kemo sya Kyala,

³ ilịbāngilị lya nōngwa sya Mwanāke, uju āfụmịle nkikolo kya Ndabitị ukupāpịgwa,

⁴ alinkujobịgwa ukuja mwana gwa Kyala mmaka na Mbepo gwa bwịkemo bwa kusyuka kwake ukufụma mmbafwe, Jesụ Kilisịtị UNTWA gwitu,

⁵ uju twambilị̄le mmyake ilị̄pyana nubufụ̄ndịgwa ubwakunkabila abākusịkonga isya lwịtiko lwa kujị̄tikila īngamụ jake ifịkolo fya bāpānja fyosa,

⁶ pamopēne nanụmwe jujumwe mwe mụkujobịgwa ukuja ba Jesụ Kilisịtị.

⁷ Kulimwesa mwe baganịgwa ba Kyala nkị̄su kya Loma mwe mụkujobịgwa ukuja bị̄kemo. Ilị̄pyana lijege nanụmwe nulutēngāno ulufụma kwa Kyala Tāta gwitu kangi Ugwịse gwa NTWA Jesụ Kilisịtị.

Ulwịpụ̄to lwa kugwila ulupị

⁸ Tāsị ngutala ukubagwila ulupị kwa Kyala mwesa mwa Jesụ Kilisịtị, namanga ulwịtiko lwinụ lufụmwịke nkị̄su kyosa.

⁹ Buno Kyala jo nkētị gwangu, uju ngummbōmbela ni mbepo syangu ukulūmbilila mwịbāngilị lya mwanāke, ukuti ngūmīlisya ukubajoba bwịla umwe mụnyịpụ̄to syangu,

¹⁰ bo ngusūma ukuti mbwịgane bwa Kyala nnjagege injila jimo ja kwịsila kumyinụ.

¹¹ Namanga ngusyukwa ukubabona umwe ukuti mmbamanyịsyege ikyabupe kimo kya mụmbepo ikyakubapa amaka umwe,

¹² kokuti twesa nanụmwe nanịne tukasaniege nalwịtiko uju ulwa nnịne uju ulwannịne nulwangu.

¹³ Ngulōnda ukuti mụsyaganịege, mwe bāmyitu, ukuti ndōndịle kākị̄ngị ukwịsa kumyinụ (lolị mpaka ulu mbīngị̄gwe) ukuti ndondolēngemo untōndolo mmyinụ mope, bo apa ndōndwịle na mmbāpānja abāngi.

¹⁴ Une kumbagị̄le ukubōmba sịsịsị kuli bōsa, ku Bagịlịkị na kubāpānja, kubāmahala na kubakonyofụ.

¹⁵ Bunobuno lelo ngunyonywa ukulūmbilila ilịsyu lya Kyala kumyinụ nụmwe mwe mụli mụ Loma.

Amaka ga ịbāngilị

¹⁶ Namanga une ndịkufwa īsonị kunōngwa ja ịbāngilị: Ilyene go maka ga Kyala agākutwala ubupokị ku mụ̄ndu gwesa uju ali nulwịtiko, ukutala pa Njụ̄ta pope na pa Nngịlịkị.

¹⁷ Papo mbugolofụ bwa Kyala mo sịsakulị̄le isya lwịtiko; bo apa sịsị̄mbị̄gwe isị sịkuti: Uju ubugolofụ abwagị̄le ndwịtiko jo ịkujangako kubūmị.

Ubusobị bwa bāndu

¹⁸ Namanga īngalalisị sya Kyala sịkịngulị̄gwe ukufụma kumwanya sịbwịlukị̄le ubusịtakuntị̄la Kyala, nububị̄bị bwa, kunōngwa ja bubị̄bị bwabo bịkusịfụ̄ja isyanalōlị.

¹⁹ Isyakummanya Kyala sịli pabwelụ kumyabo, namanga Kyala asịnāngị̄sye kumyabo.

²⁰ Ukufụma nkabalilo kākupēlịgwa ikị̄su, ukupelịgwa kwake uku kutịkuboneka, amaka gāke aga galịko bwịla nubwa kyala, kumanyịlị̄gwe ntūndu utu tupelị̄gwe. Po lelo bakaja nisyakuponelamo.

²¹ Buno napapo bālimmēnye Kyala bakammwimịkaga ukuja jo Kyala, pamo ukugwa ulupị kumyake, lolị balịpelịle ukuja bwasị mụnyịnogono syabo ni ndụmbụla syabo isịta mahala sịlinkuja ni ngị̄sị.

²² Bo bịkwịjoba ukuja na mahala, balinkwịpela bakonyofụ,

²³ ubusịsya bwa Kyala uju atịkufwamo balinkububīka mbujo bwa fịfwanị ifị fịfwene bo umụ̄ndu ummbugujufụ, pamo bo īnjunị, pamo bo ifịnyamāna nifịpelịgwa ifị fịkwendela ulwanda.

²⁴ Fyobene Kyala alinkubaleka mụ mfinyonyo fya mụndụmbụla syabo, nkugịnyasya imịbili gyabo

²⁵ papo isyanalōlị sya Kyala bāsịpelịle ukuja sya butūngulu, balinkwịpụ̄ta kufịpelịgwa nukufịbōmbela, balinkunndeka Umpelị, uju ịkutụ̄fig̣wa bwịla na bwịla. Amenị.

²⁶ Jo nongwa iji Kyala alinkubaleka mụmụnyịnogono syabo īnyalị isị sịkabagila. Abakị̄kulu bābo balinkuleka ukubōmba isị bāpelelịgwe, balinkubōmba isị bakāpelelịgwe,

²⁷ bope abanyāmbala bububo balinkusịleka isị bāpelelịgwe isyakwangala nabakị̄kulu balinkunyonywana babanyāmbala batupu, abanyāmbala balinkubōmba īnyalị nabanyāmbala abị̄nābo kisịta sonị, balinkwambilila mmịbili gyabo ulufụ̄ndo ulu lwababagị̄le kunōngwa ja butulanōngwa bwabo.

²⁸ Lelo kunōngwa jakuti bakāsịbonaga ukuti sịbagị̄le isyakummbīka Kyala mụndụmbụla syabo, Kyala ābalekịle ukuti bakōngege isịtakubagila isya mahala gābo nakajīlo kābo akabị̄bị.

²⁹ Bālịswịle nu bubị̄bị bwa luko lōsa; Ubunyalị, ubupafụ, ubunyonywa fyosa, akabịnị; bāliswịle ubūfị, ubugogị, ubwịte, ubusyobị,

³⁰ bāli ni hēho, bali bōhesị, bālimmbēngịle Kyala, bāli namatị̄ngo, bị̄kūmbukaga bēne nukwịtụ̄fya, bāli batwala mbị̄bị bābị̄laga abapāpị bābo.

³¹ Bāli bakonyofụ, basịtalwịtiko, basịtakisa.

³² Napapo bālumēnye ululagilo lwa Kyala ukuti aba bịkubōmba sịsịsị kubabagị̄le ukufwa, kukaja ko kuti bāsịbōmbaga kwene kukusịbōmba lolị bābịtikilaga aba bābōmbaga sịsịsị.