BaFilipi 1 - Biblia Umwikemo 1996

¹ Uswe ba Paulị na Tịmotị, twe babōmbị ba Jesụ Kilisịtị tụkubasịmbila mwe bikemo mwesa mwe mụli mwa Kilisịtị Jesụ mụ̄Fịlịpị na mwe balindilila fịpanga mwe bakulūmba na mwe batūlị ba fịpanga.

² Kyala Tāta nu NTWA Jesụ Kilisịtị abapege ilị̄pyana nu lutēngāno.

Ulwịpụ̄to lwa Paulị lwa Kubipụ̄tila Abafịlịpị

³ Bwịla bo nịkubakumbuka umwe nịkubagwila umwe ulupị kwa Kyala;

⁴ kangi akababilo kōsa aka ngubị̄pụ̄tila umwe mwesa nịkwịpụ̄ta nulusekelo,

⁵ pāpo nāgịle mụndūlịle mụmbōmbo ja kufụmụsya ilịbangelị ukufụma pịsịku lya kwanda ukwịsakufịka lilino.

⁶ Fyobēne ndi nubwanalōlị ukuti Kyala, uju ālyandịle imbōmbo inụnụ iji mmyinụ jo ịkujendesyaga ukwịsakufịka pịsịku lya Jesụ Kilisịtị.

⁷ Lelo syo sịmbagị̄le une ukubịnogona umwe, Namanga nịkubakumbuka bwịla umwe. Papo mụli balilanịsị bāngu mwịpyana ili Kyala āmbēle, na mụnnyololo mụmo napa nāli mwabuke pakulilwila nukulisisịmịkisya.

⁸ Kyala jo nkētị gwangu ukuti nịkujoba syanalolị apa nịkuti nịkubasyukwa mwesa ubusyūkwe ubu bụkufụma mụndụmbụla ja Kilisịtị Jesụ jūjo.

⁹ Nịkwịpụ̄ta ukuti ulugano lwīnụ longelelege ukukula, pamopēne nukusyaganịa ukwanalōlị namahala amapelelesye.

¹⁰ Ukuti mwịsalilege isị sịbagị̄le. Po lelo mwịse mụjege bēlụ ịtolo abasịta kababye pịsịku lya Kilisịtị.

¹¹ Po ubūmị bwinụ bwịsakwisula īseke sya bugolofụ isị sịkwịsila mwa Jesụ Kilisịtị isyakummwịmikila nukuntụkifya Kyala.

Ukujako kubūmị jo Kilisịtị

¹² Mwe bāmyitu, nị̄ganịle ukuti mụsyaganịe ukuti syosa isị syalinyāgịle sịbombịle isyakubāsya ilịbāngilị,

¹³ ukufụmila mụli sịsịsị abasịkali bōsa bakulindilila ikitāngālala nabāngi bōsa aba bāmēnye ukuti mbịnyị̄gwe mụnnyololo panōngwa ja kummbōmbela Kilisịtị.

¹⁴ Ukupịnyịgwa kwangu mụnnyololo kubapelị̄le abāmyitu bābịngị ukuja nulwịtiko mụ NTWA, nukukindilila ukuja bakịfụ pakulijoba ilịsyu lya Kyala kisịta lutēnde nalumo.

¹⁵ Bamo nalolị bịkumfụmụsya Kilisịtị kunōngwa ja būfị nukulwāna, abāngi lolị, bo bịkūmfụmụsya Kilisịtị mụnyịnogono inụnụ.

¹⁶ Bababa bịkubōmba sịsịsị ukufụmila ndugano papo bāmēnye ukuti une mbēgị̄gwe na Kyala imbōmbo ja kulilwīla ilịbāngilị.

¹⁷ Abāngi batịkumfụmụsya Kilisịtị mbwanalōlị bikwịlondela ubukulūmba bwa kuja nabo bēne, bịkwịnogona ukuti po ubutolwe bwangu mụnnyololo bụkōngelelaga ubwịngị.

¹⁸ Sịsịsị syo sịkaja na mbōmbo! Une nịkusekela mụnjila syosa ịtolo nsyabusyōbị na nsyanalōlị, mụno ikufụmụkisịgwa Kilisịtị. Une nịkūmīlisyaga ịtolo ukusekela,

¹⁹ Namanga mmenye ukuti mụnyịpụ̄to syinụ nubutūlị ubu bụkufụma mwa Mbepo gwa Jesụ Kilisịtị mo nịsakubwagilaga ubupokị.

²⁰ Isị nịkulonda fịjo nukusūbila syo syakuti nangịsakutolịgwaga sịku mụmmbōmbo jangu, lolị ntubalilo tōsa na fịjo nkabalilo kakakā fịkuti nị̄sulege ubukịfụ, kokuti Kilisịtị īmikịgwege mụmmbili gwangu linga mo mmbūmị bwangu pamo mbufwe bwangu.

²¹ Une kumyangu ubūmi jo Kilisịtị, ubufwe kokukaba.

²² Lolị lelo līnga ukujako kubūmị kukumbelela ukubōmba inụnụ fịjo, kali nịsalile ifịkị ubūmị nubufwe!

²³ Nịkolenịe kunjila ịbili! Nịkulōnda fị̄jo ukusụmụka ukuti ngajege na Jesụ, isi syo nụnụ sịkindilị̄le,

²⁴ lolị kunōngwa jīnụ, sịkulōndịgwa sịkindilị̄le ukuti une nendelelege ukujako kubūmị.

²⁵ Isị syo ndi nubwanalōlị nasyo ngusyāla nanụmwe pakubatūla mụmbōmbo ja kukūla nukubōngela ulusekelo ndwịtiko.

²⁶ Po lelo po ndi pamopēne nanụmwe kangi, po mwịsakōngelelaga ukwịtụ̄kifya mmyangu bo mwịkūngile mwa Jesụ Kilisịtị.

²⁷ Lilino, īmbala syo syakuti fikuti injila jīnụ ja bumị jijege bo mụmo ilịbāngilị lya Kilisịtị lịkulōndela, kokuti linga nịsịle pamo ngịsa kukubakēta mmbilikege ukuti mwimịle mụmbepo jimojēne, mụli ndụmbụla jimo jene mụbāmbịle pakulwila ulwịtiko lwa ịbagilị.

²⁸ Mungabatị̄laga abalugu bīnụ, bwịla ịtolo mụjege bakafu, sịsịsị syo sịkubanangisyaga ukuti bị̄sakutolịgwa nukuti umwe mwịsakutola, namanga jo Kyala uju ịkubapa umwe ubutolị.

²⁹ Buno umwe mụkungilịgwe isya kummbōmbela Kilisịtị, momma mwene nkummwịtika lolị mope nankukubilwa.

³⁰ Lilino po mụbagị̄le ukujamo nkulwa ubwịte pamopēne nanịne. Bo bu bwịte bulabula ubu mwalimbwene bo ngulwa ịjolo, po apa mụkupilika bo būbo ngāli ngulwa nalilino.