Abanyalēbị 1 - Biblia Umwikemo 1996

Amakemo ga kwịkemēsya mmōto

¹ UNTWA alinkunkōlela Mose, alinkujoba nagwe mụhēma ja kukomānịlamo alinkuti:

² Ujobege na bany'Ịsịlaelị ubabūlege utigi: Linga umụ̄ndu jumo nkati mmyinụ ịkutwala ilị̄kemo ku NTWA, āmụkutwalaga amakemo ukufụma mfịnyamāna fyinụ ifị mụtị̄mịle, īng'ōmbe pamo īng'ōsị.

³ Linga ị̄kemo lyake ịkemo lya kōkya mmōto ili lifụmịle mụntị̄mo gwake gwa ng'ōmbe, ịsakusōsyaga īngāmbaku iji jikaja nikilema nakimo; ịsakujitwala pa hēma ja lukomāno, ukuti UNTWA ammwịtikege.

⁴ Ịsakukibīkaga ikiboko kyake pantu gwa ịkemo ilyo lya kōkya mmōto, lịsakwịtikisịgwaga ukuja ịkemo lyake lya kusajanịla.

⁵ Po ịsakwendaga nukujibōla īngāmbaku ijo nkyenị mụ NTWA; abāna ba Alonị abapụ̄tị bịsakulitwalaga ilị̄lopa, bịsakulimị̄saga ilịlopa mụmbali ukukisyungūtila ikigemo iki kili pakifịgo kya hēma ja lukomāno.

⁶ Ịsakubūlaga ilị̄kemo lya kōkya mmōto, ịsakulibụ̄tanịaga ukuja mfịtụlị mfịtụlị;

⁷ po lelo abāna ba mpụ̄tị Alonị, bịsakubīkangapo umōto pamwanya pakigemo kya kwịkemēkesyapo, bịsakubātikaga imbabu pamwanya pa mōto.

⁸ Kangi abāna ba Alonị abapụ̄tị bịsakufịbātikaga ifịtụlị fya nyama, untu na mafụta, pamwanya pa mbabu isị sịli pamwanya pa mōto ugu guli pakigemo;

⁹ lolị ubula bwake na malūndi gāke, ịsakusụkaga namīsi. Umpụ̄tị ịsakulyokyaga ilị̄kemo lyosa mmōto, ilịkemo lya kōkya mmōto ilya kuja lūma ulunụnụ ku NTWA.

¹⁰ Linga ifyabupe fyake ifya ịkemo lya kōkya mmōto fịfụmịle mụntị̄mo, gwa ng'ōsị pamo gwa mbene, ịsakusōsyaga īng'ōsị inyambala iji jikaja nikilema nakimo.

¹¹ Ịsakujigogelaga palubafụ lwa kulūlu ulwa kigemo nkyenị mụ NTWA, abāna ba Alonị abapụ̄tị bịsakumị̄saga ilị̄lopa ukusyungūtila ikigemo kya kwịkemēkesyapo.

¹² Po ịsakujibụ̄tanịaga ukuja mfịtụlị mfịtulī untu gwake namafụta gāke, umpụ̄tị ịsakubātikaga pamwanya pa mbabu isị sịli pamwanya pamōto pakigemo,

¹³ lolị ubula namalūndi ịsakōsyaga namīsi. Umpụ̄tị ịsakusōsyaga lyosa, nukōkya fyosa pamwanya pakigemo kya kwịkemēkesyapo; ilị̄kemo lya kōkya mmōto ukuja lya lụ̄ma ulunụnụ ku NTWA.

¹⁴ Linga ịkemo lyake ili ịkunsōkesya UNTWA ilị̄kemo lya kōkya mmōto lya njunị, po ịsakutwalaga ilị̄kemo lyake lya ngūnde pamo ilya mwana sya ngungubija.

¹⁵ Umpụ̄tị ịsakutwalaga ku kigemo, ịsakujipopotolaga untu, po aịkujōkyaga pamwanya pakigemo; ilị̄lopa lyake lịsakukololelị̄gwaga ukusōkapo pa kigemo;

¹⁶ ịsakusōsyangamo unsokelo namajoja gāke, ịsakutāgaga kūmbali ku kigemo kulubafụ lwa kubusōkelo, pabujo bwa mfwandilo;

¹⁷ po ịsakujipāndulanịaga amapiko gāke lolị atịsakujijabanịaga pabili. Umpụ̄tị ịsakujōkyaga pamwanya pakigemo, pamwanya pa mbabu isị sịli mmōto; ilị̄kemo lya kwịkemēsya, lya kōkya mmōto ukuja lya lūma ulunụnụ ku NTWA.