Abalagilị 1 - Biblia Umwikemo 1996

Ifịkolo fya Jụ̄ta na Sịmyonị fịkuntola Andonịbesekị

¹ Bo Joswa afwịle, po papo abany'Ịsịlaelị balinkunndālūsya UNTWA balinkuti: Kyo kikolo kyitu kiliku iki kịkutalaga ukubūka kukulwa na Bakanānị?

² UNTWA alinkwamụla alinkuti: Ikikolo kya Jụ̄ta bo bịkutalaga ukubūka. Mbapēle ubutolị bwa kị̄su ikyo.

³ Abanya Jụ̄ta balinkujoba kubamyabo abanya Sịmyonị balinkuti: Ịsaga mụbūkege nanụ̄swe kukị̄su iki tupēgị̄gwe ukuti tukalwege na Bakanānị pamopēne. Po lelo nanụ̄swe twisakubūkaga nanụmwe kukị̄su iki mūpēgị̄gwe. Po papo abanya Sịmyonị balinkubūka nabo,

⁴ pamopēne na banya Jụ̄ta kukulwa ubwịte. Untwa alinkubapa ubutolị, balinkubatola Abakananị na Bapelesị; babatolịle abāndu baelufụ kalōngo pa Besekị.

⁵ Mụla mụla Basekị balinkummwaga Andonịbesekị, balinkulwa nagwe; balinkubatola Abakananị na Bapelesị.

⁶ Andonịbesekị alinkwenda nukubopa, abēne lōlị balinkunkaga balinkunkola, bo bankolịle bālinkeng'endịle īnyōbe syanna isya mmaboko nisya mmalūndi.

⁷ Andonịbesekị alinkujoba alinkuti: Abanyafyale amalōngo mahāno na mabili (70) aba bakēng'endị̄gwe inyōbe syabo syanna isya mmaboko na mmalūndi bāsalasalaga ifị̄ndu pāsi pamēsa jāngu. Isị nābabōmmbị̄le une syo sịsyo nanịne Kyala ambōmbị̄le sịsyo. Balintwele mpaka ku Jelụsalemụ ko afwilị̄le.

Ikikolo kya Jụ̄ta kikuntola Jelụsalemụ na Hebulonị

⁸ Abāndu ba Jụ̄ta balinkulwa na kāja ka Jelụsalemụ, balinkukatola, balinkukēga. Bābagogịle abāndu bāke nukukōkya numōto akāja.

⁹ Panyụma pali sịsịsị, abāndu ba Jụ̄ta balinkubūka kukulwa na Bakanānị aba bātūgalaga nkị̄su kya mfyamba, mụ Negebu na nkị̄su ikya mụntebēla.

¹⁰ Kangi balinkubabūkila Abakananị aba bātūgalaga mụ Hebulonị, akāja aka ịjolo bakakōlelaga īngamụ ja Kịlịati-alịba; mo balintolile Sesyai, Ahimanị na Talịmai.

Otanịelị ịkukatola akāja ka Ndebili

¹¹ Ukufụma pala, abāndu ba Jụ̄ta balinkukabūkila akāja ka Ndebili, aka pakabalilo kala bakakōlelaga ingamụ ja Kịlịatị-sefelị.

¹² Kalebu alinkujoba alinkuti: Uju linga alwịle nakāja ka Kịlịatị-sefelị akatolịle nukukēga, nịsakumpaga umwanāngu unndīndwana Akịsa ukuja nkasị.

¹³ Po papo Otanịelị umwana gwa Kenasị ugwamyabo gwa Kalebu akatolịle akāja nukukēga, po Kalebu alinkumpa umwanāke unndīndwana Akịsa ukuja nkasị gwake.

¹⁴ Bo ịsịle kumyake, ālimbūlịle ukuti asūmege unngūnda kugwịse. Āsụlwịke pāmbūnda jake, Kalebu ājobịle kumyake ātịle: Kulōnda fịkị?

¹⁵ Ālyamwịle kumyake ātịle: ngulōnda ukuti gūmbe fịmo ifịsịba fya mīsi; papo ikị̄sụ kya Negebu iki gūmbele kyumụ. Po papo Kalebu alinkumpa inyị̄buko sya mīsi isya kulūlu nisya kwịtōngo.

Ubutolị bwa fịkolo fya Jụ̄ta na Benjamịnị

¹⁶ Abāna ba Kenị unko gwa Mose bāfyukịle pamopēne na banya Jụ̄ta ukufụma ku Jelịko nkāja ka mịpịkị gya tugīndwa mpaka ndungalāngala lwa Jụ̄ta, ulu luli mụ Negebu kifụkị na Alati; bāfyukị̄le balinkwakutūgasania na Bamaleki.

¹⁷ Jụ̄ta ābūkịle nugwamyabo Sịmyonị, bājakubatola Abakananị aba bātūgasyaga mụ Sefati, bākapyụtịle lōsa. Po papo īngamụ ja kāja kala kalinkukōlelịgwa Helima.

¹⁸ Kangi Jụ̄ta ākāgịle akāja ka Gasa nimịpaka gyake, kangi Asịkelonị nimịpaka gyake, kangi Ekịlonị nimịpaka gyake.

¹⁹ UNTWA āli pamopēne na banya Jụ̄ta alinkubatūla po apa bākitolịle kangi bākyegịle ikị̄su kya mfyamba, lōlị bātolị̄gwe ukubakagamo abāndu aba bātūgalaga nkị̄su kya ntebēla papo bāli namagali agābwịte aga gāli gā fyela.

²⁰ Akāja ka Hebulonị āpēlị̄gwe Kalebu, bo mụmo Mose ājobị̄le. Akābakagịlemo nkāja kala abāna batatu ba Anakị.

²¹ Lōlị Abanya Benjamịnị bābakagịle Abajebusị aba bātūgalaga mụ Jelụsalemụ mpaka numụsyugu.

Ifịkolo fya Efụlaimụ na Manase fịkukatola akāja ka Betelị

²² Po papo ifịkolo fya Efụlaimụ na Manase fyafyukịle ukubūka kukulwa nakāja ka Betelị; umwene UNTWA āli nabo.

²³ Ifịkolo fya Efụlaimụ na Manase fyabatumịle abatēndēsị kukukatēndēla akāja ka Betelị; aka ịjolo īngamụ jake kāli jo Lụsụ.

²⁴ Abatēndēsị balimmbwene umụ̄ndu jumo bo ịkusōka pānja ukufụma nkāja; bājobịle nagwe bātịle: Tupelịle utunāngisye injila ja kwịngilila nkāja, po uswe twịsakukupākisyaga ugwe.

²⁵ Ābanāngị̄sye injila ja kwịngilila nkāja; bākakomịle akāja, bābagogịle abāndu bōsa nulūbo, lōlị umụ̄ndu uju ābanāngị̄sye injila jo balinndekịle bakalinngogịle pamopene nabāndu ba nnyụ̄mba jake.

²⁶ Umụ̄ndu jula ābūkịle kukị̄su kya Bahịtị, ājakujēnga akāja alinkukakōlela ingamụ ja Lụsụ; jo ngamụ jake mpaka numụsyugu.

Abāndu aba bakākagị̄gwe na bany'Ịsịlaelị

²⁷ Abanya Manase bakābakagịle abenekāja aba bātūgasyaga mụ Betị-syanị pamopēne nutwaja twake utunāndi; mu Tānaki pamopēne nutwaja twake utunāndi; bōpe naba bātūgasyaga mụ Ndolị pamopēne nutwaja twabo utunāndi; naba bātūgasyaga mụ Megịto pamopēne nutwaja twabo utunāndi; kangi naba bātūgasyaga mụ Ibeliamu pamopēne nutwaja twabo utunāndi; lōlị abēne Abakananị bo balinkūmilila balinkutūgala mụ nkị̄su kila.

²⁸ Bo abany'Ịsịlaelị bakabịle amaka, balinkubapa īmbōmbo ja kufịmbilisịgwa Abakananị, lolị abēne bakābakagịlemo lōsa.

²⁹ Kangi jope Efụlaimụ akābakagịlemo Abakananị aba bātūgasyaga mụ Geselị; lōlị Abakananị balinkutūgasania nabo mụ Geselị.

³⁰ Jope Sabulonị akābakagịle abāndu aba batūgalaga mụ Kịtịlonị, kangi naba bātūgalaga mụ Nahalolị; lōlị Abakananị balinkutūgasanịa nabo abēne balinkubōmba imbōmbo ija kufịmbilisịgwa.

³¹ Aselị akābakagịle abāndu aba bātūgasyaga mụ Ako, naba bātūgasyaga mu Sịtonị, naba batūgasyaga mụ Ahalabu, naba bātūgasyaga mụ Heliba, naba bātūgasyaga mụ Afweka, kangi naba batūgasyaga mụ Lehobụ;

³² lōlị abanya Aselị balinkutūgasanịa na Bakanānị, aba bāli benekị̄su namanga bakābakagịlemo ukusōkamọ nkị̄su.

³³ Nafụtalị akabakagịlemo abāndu aba bātūgasyaga mu Betị-syemesị, naba bịkutūgasya mu Betanati; lōlị abēne balinkutūgasanịa na Bakanānị aba bāli benekị̄su; lōlị abāndu aba bātūgasyaga mụ Betị-syemesị na mụ Betanati balinkuja bāndu bākubabōmbela imbōmbo ija kufịmbilisịgwa.

³⁴ Po papo Abāmolị balinkubakagila abanya Ndanị kukị̄su ikya mfyamba, namanga bakabị̄tikị̄sye ukuti basụlụkege bị̄sege nkị̄su ikya ntebēla;

³⁵ Abāmolị balinkūmilila ukuti bikutūgasyaga pakāmba aka Helesị mụ Aịjalonị na mu Syalibịmụ, lōlị ikiboko kya nnyụ̄mba ja Josefụ kyali namaka pamwanya pamyabo, balinkubōmba imbōmbo ija kufịmbilisịgwa.

³⁶ Umpaka gwa Bamolị gwali ukufyukịla ku Akịlabimu ukufuma ku Sela nukufyuka.