Abahibʉli 1 - Biblia Umwikemo 1996

Ilịsyu lya Kyala lịkwendela Mmwanāke

¹ Ịjolo Kyala ājobaga na bātāta ka kị̄ngị na mụnjila sị nyịngị ukwendela mbakụ̄ngụlụka,

² lolị mmasịku ga kūsụlo aga ịsịlekujobela nanụswe Mmwanāke, uju ammbīkịle ukuja mwịngilapo kilīngo kya fyosa, kangi mụli uju nifị̄su āfịpelị̄le mụ mmyake.

³ Umwene papo nndāngalila gwa busịsya bwa Kyala, kangi kifwanị ịtolo kya Kyala mụno ajīlị̄le, ịkukipīmba ikị̄su kyosa niịsyu lyake ilya maka, alinkwịtūgasya kukiboko ikị̄līlo ikya Mwenebukulūmba kumwanya kula, bo abapēle ubuswe bwa mbị̄bị abāndu.

Ubukulūmba bwa Mwana gwa Kyala

⁴ Umwana nkulūmba ukubakị̄nda abāndumị, bo papo īngamụ āpelị̄gwe na Kyala ngulūmba ukusịkīnda īngamụ syabo.

⁵ Namanga Kyala akālimmbulilemo najumo sịku abāndumị bāke ilya Kuti: Ugwe uli mwanāngu ngupāpịle umụ̄syugu. Kangi Kyala akālinjobịlepo ugwandumị najumo ukuti: Une nịkwịpelaga ukuja gwịse kumyake, Umwene ịkwịpelaga ukuja mwanāngu.

⁶ Lolị Kyala bo ịkuntwala umwanāke ugwa kipānda nkị̄su, ātịle: Bōsa abāndumị ba Kyala, bị̄pụ̄tege kumyake.

⁷ Lolị isya bāndumị Kyala atịle: Kyala ịkubapela abāndumị bāke ukuja mịbelo, na babōmbị bāke ukuja ndapi sya mōto.

⁸ Lolị isya Mwana, Kyala ātịle: Ubutwa bwako gwe Kyala, bụkujako bwịlabwịla! Ugwe kubalagila abāndu bāko nubugolofụ.

⁹ Ugwe ubuganịle ubugolofụ, ububēngị̄le ubwịlandagilo. Fyobēne Kyala, Kyala gwako akusalịle. Akupakịle īnyēmba sya lusekelo, ukubakīnda abanịno.

¹⁰ Kangi ạ̄tile: Gwe NTWA, pabwandilo gwapelịle ikị̄su, kangi ifya kumwanya gwapelịle namaboko gāko.

¹¹ Ifyene fịsakujōngaga, lolị ugwe kwịsakujangako. Kangi fyosa fịsakukūlupaga bo gu nselekesye.

¹² Kwịsakufịpịndanịaga ukufwana kilūndo, kangị fịsakwandukaga bo gu nselekesye, Lolị ugwe utịkwandukamo, Fyope ifyinja fyako fịtịsakumalikamo sịku.

¹³ Kyala akālimmbulilemo sịku ugwandumị gwake najumo ukuti: Ịtūgasya kukiboko kyangu ikị̄līlo, ukafịkege apa nịkubabīkaga abalugu bāko kūsi kumalūndi gāko.

¹⁴ Abāndumị mbepo ịtolo aba bịkummbōmbela Kyala, Kyala ịkubatuma kukubatūla aba bịkuja pakwambilila ubupokịgwa.