Abagalatị 1 - Biblia Umwikemo 1996

¹ Paulị untumịgwa, uju ukubilikilịgwa kwake kukāfụmị̄le mmụ̄ndu pamo ukwendela mmụ̄ndu, lolị kwafụmị̄le mwa Jesụ Kilisịtị na Kyala uju ālinsyusị̄sye mmbafwe,

² pamopēne na Bakilisịtị aba bāli nagwe bị̄kufị̄tumila uluponịo ifịpānga fya mụ Galatịja bịkuti:

³ Kyala Tāta gwitu nu NTWA Jesụ Kilisịtị abapege ilị̄pyana nulutēngāno.

⁴ Kunōngwa ja kutwabula uswe mfyinja ifịbị̄bị ifị Kilisịtị alinkwịnị̄nga ukutufwila pa mbị̄bị syitu ukukōngana nubwigane bwa Kyala, kangi Tāta.

⁵ Īmikịgwege Kyala bwịla na bwịla Amenị.

Ilịbāngilị limolyene

⁶ Lolị ngubaswị̄ga umwe: Nakalīnga ịtolo mụkuntaga uju ababilikị̄le umwe mwịpyana lya Kilisịtị, mụkulabila kwịbāngilị ilīngi.

⁷ Mmbwanalolị likajako nalịmo ilịbāngilị ilīngi, lolị nịkujoba sịsịsị papo balịpo abāndu bamo aba bịkubasofanịa nukulōnda ukulyandula ilịbāngilị lya Kilisịtị.

⁸ Lolị napapo linga jouswe pamo gwandumị uju afụmịle kumwanya ịkulūmbilila ilịbāngilị ili lili pasịma kuli ili tukabalūmbilila umwe jo fịkuti agụnilịgwege kubupyụtịgwa.

⁹ Bo apa tutalile ukujoba, nịkwandisya kangi nịkuti: Uju linga ịkulūmbilila ilịbāngilị ili likīndēne naili mwalyambilị̄le jofịkuti agụnilịgwege kubupyụtịgwa.

¹⁰ Kali lelo ngulōnda ukuti abāndu bāndụ̄fyege? Himma ngulōnda ukuti Kyala āndụ̄fyege. Ngulōnda ukuti mbakyelege abāndu? Linga nākāli nạ̄tigi mbakyelege abāndu po angali ngaja mmmbōmbị gwa Kilisịtị.

Mụno Paulị ābwagị̄le ubufụ̄ndịgwa

¹¹ Nịkulōnda ukubabūla mwe bāmyitu ukuti ilịbāngilị ili ngulūmbilila likātendekesị̄gwe numụ̄ndu.

¹² Ngālyambilị̄le ukufụma kumụ̄ndu jumo, kangi najumo akāmanyịsyamo ilyene. Lolị, jo Jesụ Kilisịtị jo ālisetukị̄sye une ilịbāngilị.

¹³ Mụbūlị̄gwe mụno ubūmị bwangu bwajīlị̄le bo ndi ndwịtiko lwa Bajụ̄ta, mụno nākifwimilaga ikipānga kya Kyala nukukifụjụla, ndinkukindilila ukukyonānga.

¹⁴ Nābakīndile Abajụ̄ta bị̄ngị abị̄nāngu mụngulilo ukukōnga ulwịtiko lwa Bajụ̄ta, nālisōsịsye fịjo ukukōnga īnyị̄ho sya banyēnya bītu.

¹⁵ Lolị mwị̄pyana lyake Kyala, alinkusalila nganị bo ngāli nukupāpịgwa, alinkungōlela ukuti nummbōmbelege.

¹⁶ Ukunsetula umwanāke kumyangu ukuti nūmbililege īnōngwa syake īnụnụ ku bapānja ngabūkịle kāmụ̄ndu najumo ugwakumbūla mbubōmbelo,

¹⁷ kōpe naku Jelụsalemụ ngabūkịleko kukubakēta aba bātalịle na kumyangu ukuja bafụ̄ndịgwa. Loli nakalīnga ịtolo ndinkubūka ku kị̄su kya Bālabu, po kangi ndinkugomokela ku Ndamasịka.

¹⁸ Lelo pānyụma pafyinja fịtatu ndinkufyuka ukubūka ku Jelụsalemụ kukunkēta Kefa (Petelị). Ndinkutūgala nagwe imịlūngu mịbili.

¹⁹ Ngalimmbwenemo umfụ̄ndịgwa ujūngi lolị mwene Jakobụ ugwamyabo gwa NTWA.

²⁰ Isị ngusị̄mba sya nalolị, ndịkutūngulupa, nabuno napa Kyala ịkungēta.

²¹ Pānyụma ndinkubūka mfị̄su fya mụ Sịlịja na mụ Kilisịja.

²² Akabalilo kalakala Abakilisịtị ba mfịpānga fya mụ Jụtaị bakālimbwene mmāso une.

²³ Bāsịmēnye syene isị abāngi bājobaga bạ̄tigi: Umūndu uju alịsịbị̄le ukutufwima uswe, lilino ịkululūmbilila ulwịtiko ulu pakwanda ālōndaga ukulugoga:

²⁴ Po papo balinkwenda nukummwimika Kyala panōngwa jangu une.