1 Timoti 1 - Biblia Umwikemo 1996

¹ Jo une Paulị ne ntumịgwa gwa Kilisịtị Jesụ, kululagilo lwa Kyala Umpokị gwitu, na Kilisịtị Jesụ uju jo lusūbilo lwitu.

² Nịkukusị̄mbila gwe Tịmotị gwe uli mwanāngu nalōlị ndwịtiko: Ilị̄pyana, nikisa, nulutēngāno, ifị fịkufụma kwa Kyala Tāta na kwa Kilisịtị Jesụ UNTWA gwitu, fyo fịjege nanụngwe.

Ukusokịgwa panōngwa ja manyịsyo isya butūngulu

³ Nịkulōnda ukuti ugwe utūgalege mụ Efesị, bo mụmo nākusūmị̄le bo nịkubūka ku Maketonịja. Balịko abāndu bamo aba bịkumanyịsya īmanyịsyo sya butūngulu, ukabakānịsyege ukuti balekege.

⁴ Ubabūlege ukuti batulekege utupāngo, ningamụ sya fịkolo mụno sịkōnganị̄le mụ̄sopelo, isị sịkapela napamo ubutalị, isị sịkutụpụsya lwene lu lukānị; sịtịkutulabisya kububōmbelị ubu bubạ̄tikị̄gwe na Kyala ubu bumanị̄gwe ndwịtiko.

⁵ Lolị kuno lukutulabikisya ululagilo, ko kulugano ulu lukufụma mụ ndụmbụla īnyēlụ na mụnyị̄bonelo īnụnụ, na ndwịtiko ulusịtabusyobị,

⁶ mụli isị bamo bapāgwịke, balabị̄le kubujobị ubwa bukonyofụ.

⁷ Bịkulōnda ukwịpela ukuja bamanyịsị ba lulagilo, napapo abēne bakasyaganịa isị bịkujoba, nisị bịkusịsịmikisya ukuti sya nalolị.

⁸ Uswe tumēnye ukuti ululagilo lunụnụ ịtolo, linga umụ̄ndu ịkubōmba mụno lụkulōndelịgwa.

⁹ Lolị tụkulōndịgwa ukukumbuka ukuti ululagilo lukābīkị̄gwe panōngwa ja mụ̄ndu unngolofụ, lolị lwabīkị̄gwe panōngwa ja bị̄langomēlesyo, nabasịtakwịlāmbika, nabasịtakuntīla Kyala, nabatulanōngwa, nabasịtabwịkemo, nabasịtakwịpụ̄ta, nabagogabị̄sabo, nabagogabannabo, nabagogabāndu,

¹⁰ nabalogwe, naba bịkulogwa nabanyāmbala abị̄nābo, nabahījabāndu, nabatūngulu, nabajīganịkandūngulu, nisị̄ngị syosa isị sịkīndēne nulumanyịsyo ulwa nalolị.

¹¹ Nịkubala īnōngwa īnụnụ īngūlu ngīmba isya Ịbāngili lya Kyala unsangalufụ, isị mbēgị̄gwe une ukusịfụmụsya.

Ukugwa ulupị pakisa kya Kyala

¹² Nịkugwa ulupị kwa Kilisịtị Jesụ, uju āmbēle amaka kumbōmbo jangu, nịkuti ndaga kumyake apa ānyịnogonị̄le une ukuja mmbagile, ēndịle nukusala ukuja mmbōmbelị gwake,

¹³ napapo ịjolo nāli ntukamahēlụ, nāli mfwimabāndu, kangi nāli gwa matị̄ngo. Lolị umwene Kyala ālimbākị̄sye, namanga nābōmbelaga mbusịtakumanya, na mbusịtalwịtiko.

¹⁴ Loli ilị̄pyana lya NTWA gwitu lilinkunyị̄sila li lị̄ngị ịtolo pamopēne nulwịtiko nulugano, ifị fịli mwa Kilisịtị Jesụ.

¹⁵ Ilịsyu lilīli lyo ịsūbilịgwa, kangi libagị̄le ukwambililịgwa ịtolo, ili lịkuti: Kilisịtị Jesụ ālisịle nkị̄su nkubapoka abatulanōngwa; une ndi ntasị, ndintulanōngwa fị̄jo ukubakīnda abāngi bōsa.

¹⁶ Loli panōngwa jijiji nālwagịle ulupākisyo kwa Kyala, ukuti nkāti mmyangu une ne gwa kwanda ubutulanōngwa, mo bubonekelege ubufịsalyojo bōsa bwa Jesụ Kilisịtị, ko kuti njege ka kukētelamo ka aba bịsakummwịtikaga, ukuti babwagege ubūmị bwa bwịla.

¹⁷ Kumyake umwene uju Malafyale gwa bwịla na bwịla, unsịtakufwamo, unsitakuboneka, Kyala uju ali jumojwene ntiga, jo ulwimiko nubusịsya fịjengeko kumyake bwịla na bwịla. Amenị.

¹⁸ Gwe mwanāngu Tịmotị, nịkukupa ululagilo ulu ukukōngana namasyu ga bukụngụlụka aga bākukụngụlụkị̄le ugwe ịjolo, ukuti amasyu gagaga gajege fyo fịlwilo fya kulwīla ubwịte ubunụnụ.

¹⁹ Ujege nalo ulwịtiko ninyịbonelo īnụnụ. Abāndu bamo bakāsịpilikisyaga īnyịbonelo syabo bēndịle nukōmola ulwịtiko lwabo.

²⁰ Mụli aba balịmo ba Hịmenaja na Alịkịsanda, aba numpēle Setano, ukuti bamanyịlege balekege ukuntuka Kyala.