Yakobo 1 - Nouveau Testament et Psaumes en Ndandi Version 1962

¹ Yakobo, omugombe woMungu nowoMukama Yesu Kristo, oko bihanda erikumi nebibiri ebipanzapanzirwe: Ngabakeraya.

Erisaba omwikirirya

² Balikyetu, muganze ebyosi mo butseme omugulu muka hindana nerilengwako misindomisindo,

³ kusangwa munasi erilengwako ryerikirirya ryenyu rikaletera erisika eriteluha.

⁴ Kandi erisika riteluha rikole omubiri waryo werihikana, imwatoka eribererera nerihikana, butsira eribula kindu.

⁵ Nikwa hamabya muguma kwinywe oyu kabula amenge, asabe oMungu oyu kaha abosi butsira buhemu butsira yihania, naye asyahabwa.

⁶ Nikwa abulaye omwikirirya, butsira ni tikatika,

⁷ kusangwa oyu katikatika aringe bisunda ebyomo ngetsi ebika kunawa neriguswa nerihunga.

⁸ Kusangwa omundu oyo siatolere eriganirya ati omundu wamalengekania abiri oyu tasikire omo syonzira siwe syosi, asyahabwa ekindu oko Mukama.

Ebindu bye kihugo bikahwerekerera

⁹ Nikwa omugala wetu oyu hehere ayipipe omwihamibwa riwe,

¹⁰ nowebindu omwikehibwa riwe, kusangwa ngobusoyo bwebiti asyahwaho.

¹¹ Kusangwa eryuba ryahuluka nekibu hira kyerihisya ibyumya ebiti; obusoyo bwabyo ibwalagala, nobubuya bwabo ibwahera. Neryo omundu webindu asyumira atya omo syonzira siwe.

Eritsuka ryebibi

¹² Oinuyisa ari oko mundu oyu kasika omwilengwako, kusangwa amabitoka erirengwako asyangirira embita yengebe eyo Mungu abirilaga abamwanzire.

¹³ Omundu siabuge omugulu akarengawako ati, Mungu yukanyirengako; kusangwa Mungu siaritoka erirengwako nekibi naye siarirenga oko mundu;

¹⁴ nikwa oburi mundu akarengawako omugulu akahekawa neritebibwa nesyongumbu siwe.

¹⁵ Neryo engumbu yama biheka obukule ikabuta ebibi; nebibi byabikula ibyabuta oluholo.

¹⁶ Simutebibawe, abagala betu banze.

¹⁷ Oburi erihitya ribuya noburi erihitya erihikene bikalwa endata, bika ndagala erilwa oko Ise webyakakala oyu tehinduka kutse eriyira ekitsutsu kyeribinduka.

¹⁸ Okwisonda riwe mwatubuta omo kinywa kyekwenene itwabya omusindo webiguma byerimbere ebyerihangika riwe.

Omwowa nomukoli

¹⁹ Muminye eki, abagala betu banze. Oburi mundu anguhe eriowa, sianguhe okwibuga, sianguhe okwihitana,

²⁰ kusangwa erihitana ryabandu siririyira eritunganene ryoMungu.

²¹ Neryo muhiyire hali ebitisirire ebyosi nerikanya ryebibi, mwangirire nobolo eKinywa kyabiriherwa omwisi wenyu, ekyangatoka erilamya ebirimu byenyu.

²² Nikwa mubye abakoli bekinywa, butsira abowa bakyo busa, imukayiteba.

²³ Kusangwa omundu amabya omwowa wekinywa isimukoli, aringe omundu oyu kayileberaya omo kilolero;

²⁴ kusangwa akayilolako kandi akagenda neryo inibirirwa kwalwa sosire.

²⁵ Nikwa oyu kasa marira ebihano ebihikene, ebihano byeriyigenderya, akakwa mirirabyo nomuhwa, isimowi omwibirirwa nikwa omukoli oyu kakola, asyabana omuyisa omwikola riwe.

²⁶ Omundu ama ganirya ngani wekisomo, isiarikakiraya olulimi luwe nikwa akateba omutima wuwe, ekisomo kyomundu oyu ni busa.

²⁷ Ekisomo ekiri ibuya kite nebitisirire embere syoMungu na Tata kyeki: eriyabana esyongubi nabakwakali omo bulige bwabo, neriyiteya butsira ebitingu omo kihugo.