Luka 1 - Nouveau Testament et Psaumes en Ndandi Version 1962

¹ Ngoko bangi babirilenga erihira haguma emyatsi eyakolawa omukati-kati ketu,

² ngoko twahabawa nabatsuka erimbere abalangiri na bakwenda bekinywa

³ mokyabya kibuya busana nage inamabikwama ndeke emyatsi eyo yosi oko mugulu alaba, erikusakira ndekendeke ngoko ikwamene, uwe Teofilo mu buya,

⁴ iwatoka eriminya kwenene emyatsi eyo wabiribwirwa.

Zakaria na Elizabeti

⁵ Oko biro bya Herode, omwami weYudea, habya omuhereri oyu kahulawa mo Zakaria, wekihanda kya Abiya; iniawite omukali abya muguma goko bali ba Haruni, erina riwe ryabya Elizabeti.

⁶ Nabosi babiri babya batunganene embere syo Mungu, ibakalendera omo bihano neritegeka ryoMukama butsira ekyo bangatsongerwako.

⁷ Nikwa babya isibawite omwana, kusangwa Elizabeti abya mugumba, kandi babiri ibamabibya bakulu.

⁸ Nikwa omugulu abya akakola emibiri yobuhereri embere syoMungu omugulu ekinanda kiwe kyabya kwe kituli,

⁹ ngoko emitsye yobuhereri yabya, obukanga buwe mobwamuwirako eriingira omo hekalu yoMukama nerihisya uvumba.

¹⁰ Ne ndeko yosi yabandu yabya ikasabira eyihya oko ndambi ya uvumba.

¹¹ Omulaika woMukama mwamubutukira iniaha ngene oko luhande lwamali lwaheriherera uvumba.

¹² Zakaria mwahahukya omutima omugulu amulolako, neriubaha morya mubyako.

¹³ Nikwa omulaika mwamubwira ati, Sigubahe, Zakaria, kusangwa erisaba ryawe ryamogubwa, kandi omukali wawe Elizabeti asyakubutira omugala, wasyahula erina riwe mo Yoane.

¹⁴ Wasyabya nobutseme neritsanga; na bangi basyatsema okwibutwa riwe;

¹⁵ kusangwa asyabya mukulu embere woMukama, siendisyapulya ebinyu kutse ekyangaku ndisya kutsibu, asyusulibwa neKirimu Kibuyirire, erilwa omo nda ya koyo wuwe.

¹⁶ Asyabindulira abangi boko bagala beIsraeli oko Mukama Mungu wabo,

¹⁷ Asyagenda embere siwe omo kirimu nomo kagala kaElia, eribindulira emitima yabise oko bana, abatiowa oko menge wabatunganene, erisikya abandu ababiritegekanibwa busana noMukama.

¹⁸ Zakaria mwabwira omulaika ati, Nasyaminyabyo nyiti kwehi? kusangwa ndi musyakulu, nomukali wage amalabya mituta mingi.

¹⁹ No mulaika mwamubwira ati, Ingye ndi Gabrieli, oyu kahangana emuliro woMungu; natumawa eribuga nawe, nerikuletera engulu yowene eyi.

²⁰ Ulebaye, ukandibya mumu siwendiswa toka eribuga erihika ekiro emyatsi eyi yasyabererera, kusangwa suritikirirya ebinywa byage, ebikandisyabererera oko mugulu wabyo.

²¹ Nabandu babya bakalindirira Zakaria, mobasweka busana nerilinda riwe omo hekalu.

²² Neryo abere ahuluka, mwatatoka eribuga nabo, mobaminya bati abere omo bulime omo hekalu; neryo mwakoheryabo omo byala mwabya mumu.

²³ Nomugulu omubiri wuwe ahwa, mwasuba ewuwe.

²⁴ Enyuma webiro ebi omukali wuwe Elizabeti mwaheka obukule, mwayibisa emikera itano, ati,

²⁵ OMukama amangola atya omo biro anyisamalira, erilusya erinyisekererya omukati kati kabandu.

Eriminyerera eributwa ryaYesu

²⁶ Oko mukera wendatu omulaika Gabrieli mwatumwa no Mungu oko muyi wa Galilaya owakahulawa mo Nazareti,

²⁷ noko mukondo oyu wasimolibawa nomundu oyu kahulawa mo Yosefu, owenyumba ya Dawidi; nerina ryomukondo oyu ryabya Maria.

²⁸ Neryo mwabuga ati, Ngakukeraya, Uwe Musombolwa, oMukama ari nawe!

²⁹ Nikwa iye mwahahukya omutima oko kinywa ekyo, mwaganirya omo buringikania buwe ngerikerya eryo nga ni musindoki.

³⁰ Omulaika mwabuga naye ati, Sigubahe, Maria, kusangwa wabiribana olukogo ku Mungu.

³¹ Neryo lebaya, wasyaheka obukule wasyabuta omugala, wasyamwahula mo Yesu.

³² Asyabya mukulu, asyahulwa mo Mugala woWendata Kutsibu; oMukama Mungu asyamuha ekitumbi kya tata wuwe Dawidi,

³³ asyatabalira nyumba ya Yakobo kera na kera; nobwami buwe sibwendisyabya nenduli.

³⁴ Maria mwabwira omulaika ati, Eki kisyatokekana kiti ingye ndawite omulume kwehi?

³⁵ Nomulaika mwamusubirya mwa­mubwira ati, eKirimu Kibuyirire kyasyakuhikako, nakagala koWendata Kutsibu kasyakusukurirya; kikaleka omwana oyo wasyabuta iniasyahulwa mo mubuyirire, oMugala woMungu.

³⁶ Kandi lebaya, Elizabeti owekihanda kyenyu ahekire obukule bwomwana wobulume, omo bukekulu buwe; oyu ni mukera wendatu ukwoyo ukahulawa mo mugumba.

³⁷ Kusangwa oko Mungu sihari ekitetokekana.

³⁸ Maria mwamubwira ati, Lebaya indi mwanamuto omugombe woMukama; kinyibyeko ngekinywa kyawe. Nomulaika mwamusigania mwagenda.

Maria mwaya bana Elizabeti

³⁹ Oko biro ebyo Maria mwahangana mwagenda luba oko kihugo kyebitwa, oko muyi wa Yuda,

⁴⁰ mwingira omo nyumba ya Zakaria mwakerya Elizabeti.

⁴¹ Nomugulu Elizabeti owa erikerya rya Maria, omwana mwayisumba omo nda yiwe; na Elizabeti musulibwa neKirimu Kibuyirire

⁴² mwabuga nomulenge munene ati, Uri mutsumulwa omokati kati kabakali, olubuto lwenda yawe ni lutsumulwa!

⁴³ Busana naki ngahabawa erihikwako na nyinya woMukama wage kwehi?

⁴⁴ Kusangwa lebaya, omulenge weribukya ryawe ariabya ingira omo matwi wage, omwana mwakayisumba nobutseme omo nda yage.

⁴⁵ Omuyisa ari noyu wikiriraya ati omwatsi akandi syabererera owabwirawa noMukama.

⁴⁶ Maria mwabuga ati, Omutima wage akapipa Mukama,

⁴⁷ Nekirimu kyage kikatsemera oMungu Mulamya wage,

⁴⁸ Kusangwa abirilangira obukebuke bwamwanamuto mugombe wuwe, Kusangwa lebaya, eritsuka lino esyondengo syosi syasyanyahula mo womuyisa;

⁴⁹ Kusangwa owamaka abiringolera emyatsi minene, Nerina riwe ribuyirire.

⁵⁰ Neriganyira riwe riri oko syondengo noko syondengo okobakamubaha.

⁵¹ Abirikangya akagala omo kuboko kuwe, Abiripanzapanza abakayipipa omo maringikania wemitima yabo,

⁵² Abirikuhihya abamaka erilwa oko bitumbi byabo byobwami, Abirihamya abakebake;

⁵³ Abiriugutya abari nenzala omo myatsi mibuya, Na bebindu abirisubulyabo busa.

⁵⁴ Abiriwatikya omugombe wuwe Israeli, Neribuka eriganyira riwe,

⁵⁵ Ngoko abuga na botata wetu, Uku Abrahamu noko lubuto luwe kera na kera.

⁵⁶ Neryo Maria mwikala naye nga mikera isatu, neryo mwasuba omo nyumba yiwe.

⁵⁷ Nikwa omugulu weributa ryaElizabeti mwabererera, mwa buta omwana wobulume.

⁵⁸ Nabalikyabo nebekitunga kiwe mobowa ngoko Mukama abirimukanyirya eriganyira riwe, mobatsema haguma naye.

⁵⁹ Noko kiro kyomunani mobasa neribania omwana; ibakasonda erimwahula mo Zakaria ngerina rise wuwe,

⁶⁰ nikwa nyinya wuwe mwasubiryabo ati, Eyihi; asyahulwa mo Yoane.

⁶¹ Nabo mobabuga naye bati, Sihari omo kitunga kyawe oyo kahulawa omo rina eri.

⁶² Nabo mobakoherya ise wuwe, erimubulya ngakasonda erimwahula mondi.

⁶³ Naye mwasaba ekyerisakako, mwasaka ati, Erina riwe yo Yoane. Nabosi mobasweka.

⁶⁴ Neryo-neryo obuno buwe mobwakumbukala nolulimi luwe molwagobokala, mwa buga, mwapipa Mungu.

⁶⁵ Neriubaha moryahika oko bosi ababya bahimbire hakuhi naye. Nemyatsi eyi moyatulwa omo kihugo kyosi kyebitwa kya Yudea;

⁶⁶ nabosi bowabyo moba bikabyo omo mitima yabo, bati, Omwana oyu asyabyaki kwehi? Kusangwa ebyala byoMukama mobyabya naye.

⁶⁷ Na Zakaria ise wuwe musulibwa neKirimu Kibuyirire, mwaminyerera ati,

⁶⁸ Omuyisa abye oko Mukama Mungu waIsraeli, Kusangwa abirisyabana abandu buwe, neritongolyabo,

⁶⁹ Abirituhanganirya erihembe eryerilamibwa busana netu Omo nyumba yomugombe wuwe Dawidi,

⁷⁰ Ngoko abuga omo buno bwabaminyereri buwe babuyirireeritsuka kera,

⁷¹ Tulamibawe oko syonzigu syetu, nomo byala byabosiabakatukwa obusu;

⁷² Erikangya eriganyira olwalagawa abotata wetu, Neriyibuka erilagana riwe ribuyirire,

⁷³ Erilahirya eryo alahiriraya tata wetu Abrahamu,

⁷⁴ Atuhe, itukatongolibawa omo byala byesyonzigu syetu, Itwamukolera butsira obuba,

⁷⁵ Omo ribuyirire neritunganene embere siwe ebiro byosibyengebe yetu.

⁷⁶ Nawe, mwana, wasyahulwa mo muminyereri wowEndata Kutsibu; Kusangwa wasyatangirira embere syoMukama erikokotya esyonzira siwe,

⁷⁷ Eriha eriminya yerilama oko bandu buwe Eribuyira ebibi byabo,

⁷⁸ Busana nobolo bweriganyira ryoMungu wetu, Omugulu omusakala werikya asyatuhulukira erilwa endata

⁷⁹ Erikolerya oko bikere omo mwirimya nomo kitutu kyoluholo, Erisondola ebisandu byetu omo nzira yobuholo.

⁸⁰ Nomwana mwakula mwabya namaka omo kirimu, kandi mwabya omo mbwarara erihika oko kiro ahulukira abaIsraeli.