AbaEbrania 1 - Nouveau Testament et Psaumes en Ndandi Version 1962

Kristo ni mukulu kwilaba balaika

¹ Omo syonzira nyingi nomo syonzira emisindomisindo Mungu mwabuga oko mugulu wakera ukwabotata wetu omwisi wa baminyereri;

² nikwa omo biro ebi byenyuma nyuma abiribuga netu omwisi woMugala wuwe, oyo ahira eribya muri womwandu wemyatsi yosi, naye yo wahangika e kihugo.

³ Iye akakangabanaya omo lukengerwa lwoMungu kandi akaheka ekisosekanio kyomubiri wuwe ndeke, iniaka hamba ebyosi omo kinywa kyakagala kuwe. Abere abikola ekyerierya ebibi, mwikala oko byala byamali byoMwenye oBukulu endata kutsibu,

⁴ iniabiribya omukulu oko balaika ngerina riwe eryo abiribana ni ribuya kwilaba awabo

⁵ ku sangwa Mungu mwabuga nomulaika wahi kutse na kera kwehi? ati, Uri Mugala wage, Munabwire namakubuta. Kutse akandi, Nasyabya ise wuwe Naye asyabya mugala wage.

⁶ Nakandi, omugulu akaleta akambere omo kihugo, ati, Abalaika bosi boMungu bamukukamire.

⁷ Busana nabalaika akabuga ati, Oyu kayira abalaika buwe mo mahunga, Nabagombe buwe mo birimi byomuliro.

⁸ Nikwa busana noMugala ati, Ekitumbi kyawe kyobwami uWe Mungu, ni kyakera na kera. Omutso atunganene ni mutso wobwami bwawe.

⁹ Wabirianza eritunganene ukakwa obusu ebikatsandaya; Kikaleka oMungu, ye Mungu wawe, iniakuhakabya Maguta wobutseme kwilaba balikyenyu.

¹⁰ Na kandi, Uwe Mukama, mowahira ekibanza kye kihugo erimbere, Nolubula nalo ni mubiri webyala byawe;

¹¹ Byasyahera, nikwa uwe wasyasigalaho; Ebyo byosi byasyakula ngo lukimba.

¹² Wasyalingabyo ngolukimba Ibyahindukibwa. Nikwa uwe inune ngoko wabya, Nemituta yawe siyendisyayira nduli.

¹³ Nikwa na kera abiribuga nomulaika wahi kwehi? ati, Ikala oko byala byamali byage, Erihika aho nasyahirira esyonzigu syawe Omo kitumbi kyebisandu byawe.

¹⁴ Nabo abosi sibirimu byerikolera, ebyatumawa erikolera abo basyabana erilama omo mwandu kwehi?