Yuda 1 - BONKANDA WA NZAKOMBA W’AEYOKO

¹ YUDA, bokwala owa Yesu Masiya, ko bokune owa Yakobo, el’iy’andetama l’etelo, balangema ele Nzakomba Ise, ko bafongama ele Yesu Masiya:

² isei la kuci la eefe bafule el’inyo o mpafula.

³ Iny’alangema, aki’m’oasaka la mposa ea loncinji wete nkotel’inyo nd’eloko ea loiko lokis’auma, njokamema wae nkotel’inyo ko nkamany’inyo wete loswela la mposa mongo nd’eloko ea imeezo ekaema boka bomoko wa seko ele ba-boeko.

⁴ Ele bant’amo baolotswa la jongo wet’iy’aandemaki kalakala ele umbelo ene, bafomemya Nzakomba, bafaningola boya wa Nzakomba nd’ewela ea mposa e’obe efosukame, ko bangan’ende ole nk’ende kika Bomongo la Nkolo ekiso Yesu Masiya.

⁵ Aeyoko ndanga loofwey’inyo, mpeka la lolea baoyi’auma fombo eleng’eki Nkolo osikolaka banto lim’ese ea Ejipeto, ko nd’afeka afitak’iyo batimeza,

⁶ Ko bikima bia loola batayala nda mpifo ekiyo mongo, lolo basundolaki boyalo’okiyo mongo, aolaomba nd’enyolo bia seko nda wilima elaka nk’etenelo e’akambo ea mbile e’enene.

⁷ O ngoki Sodomo la Amola, ko la benanga bekotutsi la beko, bakelaki linsamba nk’eleng’ekiyo ko bakimanaki la wunyu bonkina, baolilama nga lotaza ja lilako, ben’elo ea nsisoza ea tsa ta seko.

⁸ Lolonde nk’eleng’eko, bane bayofite jonge nd’aloto’akiyo, ko baotengwela ba-mpifo, ko basaola ba-jilangi,

⁹ Lolo Mikaele, ekima ea loola ea joso, aki’nd’oswelaka la Satana ko aikyak’ende bikoli nd’ewela ea ilaka ya Mose, ntakuseya loumb’ende l’umbelo e’isaola, lolo akela, Yawe akofele we lofeli!

¹⁰ Lolo bane basaola baoyi nko loswele baf’iy’oea: ko bafitana la baoyi bakotol’iyo eleng’ele jonge, ko eleng’ele nyama isamba nkai.

¹¹ Elo el’iyo! ek’iy’ocwaka nda mboka ea Kaina ko bikumwaki la jenge nd’oseketano wa Balama nd’eloko ea ndako, ko bafitanaki nda bikoli bia Kola.

¹² Bane bale wete bikenje bindisama nda bilambo bikinyo bi’eefe ea lolango, al’iyo nd’elambo l’inyo; baesanyi baley’iyo mongo nko boangi, batute basamb’asi, batombama l’ompompo, betamba bia ekeke e’emukelo besamb’amuka, beowa bewa befe, beoluwa biili,

¹³ mpombe ya wale ya lieke j’okwa indoza mpulu ya nsoi ikiyo mongo, bale tooci tondesesa, potopi ea wilima eoombama el’iyo seko.

¹⁴ Koko Anoka oki owa nsambo lim’ele Adama, atelak’aoyi nd’eloko ea bant’ane nk’eleng’eko, aokela, Bala, Yawe ayaki la bitukuluku bia bitukuluku bia ba-boeko bakande

¹⁵ wete aten’akambo ba bant’auma aolomoriy’auma bafomemya Nzakomba nd’ewela ea beketo’ekiyo beuma befeji la mamemya ea Nzakomba bek’iy’okelaka nd’osamba wa mamemya ea Nzakomba, ko nd’ewela ea baoyi’auma ba bolo baki banto b’obe otangak’ende.

¹⁶ Bane bale bamemesai, bayokime lokino, bayokime mposa ikiyo y’obe ileki, (ko bomwa’okiyo boyotefele baoyi b’eloloko) bayosime banto nd’ewela ea nkito.

¹⁷ Lolo iny’alangema, lofwaka baoyi baki bikima bia Nkolo ekiso Yesu Masiya otefelaka nda joso;

¹⁸ wae basangelak’inyo, Balengoli bifiela nd’ekeke ea nsukela bakima mposa ikiyo ileki isamba mamemya ea Nzakomba.

¹⁹ Bane wae iy’akafol’anto nd’eloi, bale la mposa ya jonge, basamba Bolimo w’olotsi.

²⁰ Lolo iny’alangema, lokemyak’inyo mongo nd’imeezo ekinyo e’oeko mongo, loondaka nda Bolimo w’olotsi,

²¹ lesanyak’inyo mongo nd’eefe ea Nzakomba, lolendezak’isei ya Nkolo ekiso Yesu Masiya ele loiko ja seko.

²² Ko lokel’amo bandikya bikoli isei,

²³ ko loiky’amo o nga label’iyo lima tsa; ko lokel’amo isei la boangi, lotona o bonkoto bokela baanda lima jonge.

²⁴ Aeyoko el’ende okuseya lesany’inyo wae lofokunumwela, ko okuseya lil’inyo nda joso j’elongi ea jilangi likande nk’olema l’ekemo endekola,

²⁵ ele Nzakomba nk’emoko kika, Boikyi okiso, jilangi, l’imemya, la mpamba, la mpifo, nda joso ja bikeke biuma, ko la aeyoko, ko la bikeke biuma seko. O ngoko.