Yoane 1 - BONKANDA WA NZAKOMBA W’AEYOKO

¹ JOI liki nd’iango, ko Joi liki la Nzakomba, ko Joi liki Nzakomba.

² Ende aki la Nzakomba nd’iango:

³ wengi yomba emamaki l’ende, nko yomba imoko ikociki iki’nde ntema.

⁴ Loiko loki el’ende, ko loiko loki fole e’anto:

⁵ koko fole eofolala nda wilima, ko wilima ntumbak’eko.

⁶ Bont’omo aolenya, oki Nzakomba otomaka, lina likae liki Yoane.

⁷ Ende ayaki oyalema bosangi, wae asange nsango ea fole, ncina wete bant’auma bimeza l’ende.

⁸ Ende ntaki fole eko, lolo ayaki wae asange nsango ea fole.

⁹ Fole ea nsosolo wae eko efolaza wengi’onto, eoya nd’okili.

¹⁰ Ende aki nd’okili, ko bokili wemami l’ende, lolonde ba-bokili ntaboea.

¹¹ Ayaki eka’nde mongo, ko bakande mongo ntaboamba.

¹² Lolo iy’andoambaki, aolaka iyo mpifo wae bayaleme bana ba Nzakomba, wete iy’andimeza nda lina likae,

¹³ iy’aotswaki, afa l’alongo, ko afa la wango wa jonge, ko afa la wango w’onto: lolonde baotswaki la Nzakomba.

¹⁴ Koko Joi joyoyalema wunyu, ko likokit’ase l’iso: (tolena jilangi likande—jilangi ngole ja bona owa likinda owa Ise) ende aokama l’oya ko la nsosolo.

¹⁵ Yoane aosanga nsango ekande, aobeleza, akela, One wae ende oki’m’osangelak’inyo. Os’ondiel’emi aoyala nda joso likami: nd’ewel’eki’nde nda joso likami.

¹⁶ Is’auma tolamba lim’ofula bokae, boya l’oya.

¹⁷ Bisekyelo bikaemaki la Mose, lolo boya la nsosolo baoya la Yesu Masiya.

¹⁸ Nk’ont’ondenaki Nzakomba nd’ekeke nko loswele: lolo Bona owa likinda, ole nda ntolo ea Ise, ende aoleanya Nzakomba.

¹⁹ Ene wae nsango eki Yoane osangaka aki Ba-Yuda ba Yelusalema otomaka nkanga ko la Ba-Lewi wae bouole, We ole na?

²⁰ Aolimeza, ko ntangana nye, aolimeza: Emi mpa Masiya.

²¹ Ko baolouola, Nkin’o ngoko, ole na? W’ol’Eliya? Aokela, Mp’ende. W’ole boteli’oko? Aolamba, Onye.

²² Nd’ewel’eko baolokela, We ole na, wae tokaoza iy’atotomaki. Joi litefela we nd’eloko eke mongo na?

²³ Akela, Emi nde lofoso j’ont’omo obeleza nd’etekeleke, Locilaza mboka ea Yawe ci, ngoki Yesaya owa boteli okelaka.

²⁴ Iy’atomamaki el’ende baki Bafalusi.

²⁵ Ko baolouola, baolokela, Nkin’ofa Masiya, ko ofa Eliya, ko ofa boteli’oko, oyin’anto nd’asi lae?

²⁶ Yoane aolaamba, akela, Emi njin’anto nd’asi, lolo Omo emi nd’etei ekinyo of’iny’oea,

²⁷ wae end’ondiel’emi, of’em’eji lolembola bekulu bia bikoto bikae.

²⁸ Baoyi’ane bakelamaki nda Betania, wij’a Yoladane, nd’itenela iki Yoane oinak’anto nd’asi.

²⁹ Nda mbile ea lobi, aolena Yesu aoy’el’ende, ko akela, Bala, bona owa mpate owa Nzakomba ondimola bobe w’okili.

³⁰ One wae end’oki’m’okelaka, Nd’afek’akami bont’omo aoya oyalemaki nda joso likami: nd’ewel’eki’nde nda joso likami.

³¹ Ko emi ncoea; lolo njoy’oin’anto nd’asi wae ende enya ele Yisalaele.

³² Yoane aosanga, akela, Njenaki Bolimo ayokitele, ngol’embenga, lima loola: ko aoyal’el’ende nkotama.

³³ Koko emi ncoea: lolo ontomaki wae njin’anto nd’asi, ende aonkela, oe we wena Bolimo ayokitele ko ayafem’el’ende, ende wete ondin’anto nd’olimo w’olotsi.

³⁴ Ko emi njolena, ko njosanga wete, One ale Bona owa Nzakomba.

³⁵ Lenkina nda mbile ea lobi, Yoane akemi, ende l’akimi’akande bafe,

³⁶ ayoale Yesu nk’aki’nd’olande, ko akela, Bala, bona owa mpate owa Nzakomba!

³⁷ Koko bakimi’ak’afe baolok’end’atefela, ko baokima Yesu.

³⁸ Ko Yesu aokengwana, ko aolaena bayokim’ende, ko aolakela, Inyo lasa na? Iyo baolokela, Labi, wae Bolaki, okit’ase nko?

³⁹ Ende aolakela, Loyaka, lene. Koko baocwa, ko baolena boyalo boki’nde, ko baoyala l’ende mbil’eko: eki nkina quatre heures.

⁴⁰ Omoko ow’ak’afe bandokaki Yoane ko bakimaki Yesu wae Andelo okosangi la Simona Petelo nd’ooci.

⁴¹ Nda joso ende aotana Simona osangi l’ende, ko aolokela, Tolena Masiya: wae Kilisito.

⁴² Ko aoloyel’ele Yesu. Ko Yesu aoloteemeza, ko akela, We ole Simona, bona owa Yoane: wifotangema Kefa, wae Petelo.

⁴³ Nda mbile ea lobi, Yesu aki la wango wae acwe nda Ngalilaya, ko aotana Filipo, ko Yesu aolokela, Yonkime.

⁴⁴ Filipo aki bosi Betesaida, bonanga wa Andelo la Petelo.

⁴⁵ Filipo aotana Natanaele, ko aolokela, Totan’end’oki Mose okotaka lotelo nda bisekyelo, ko oki bateli okotaka lotelo wae Yesu owa Nazaleta, bona owa Yosefa.

⁴⁶ Koko Natanaele aolokela, La joi j’olotsi joya lima Nazaleta? Filipo aolokela, Yaka, yene.

⁴⁷ Yesu aolena Natanaele aoy’el’ende, ko akela, Bala, Bo-Yisalaele owa nsosolo, ofa l’okakatano nye.

⁴⁸ Natanaele aolokela, Onjea emi lima nko? Yesu aolamba, aolokela, Atafa Filipo oketa, aki we nd’ase b’otamba wa liteli, nkenaki.

⁴⁹ Natanaele aoloamba, Labi, we ole Bona owa Nzakomba, Bokulaka owa roi owa Yisalaele.

⁵⁰ Yesu aolamba, aolokela, Wimeza nde nd’ewel’eki’m’okosangelaka, Nkenaki nd’ase b’otamba wa liteli? Wifena baoyi bandekola bane.

⁵¹ Koko aolokela, Nsosolo, nsosolo, nkosangela, lifena loola lokombwa, ko bikima bia Nzakomba bayounde ko bayokitela ele Bona ow’onto.