Yakobo 1 - BONKANDA WA NZAKOMBA W’AEYOKO

¹ YAKOBO, bokwala owa, Nzakomba, ko l’owa Yesu Masiya, ele beloi jom l’efe bele nd’efalangano, bosalangano el’inyo.

² Balongo’akami, a iny’okita nda mmeko ya bilenge la bilenge, lotanga ngoko nk’osalangano;

³ el’inyo lolea wae mameka e’imeezo ekinyo ieza ikelo e’otema.

⁴ Kela ikelo e’otema ekambe bolemo w’eko wa kolongo, wete inyo lelame kolongo, ko lokoke, ko lofosambe yomba nye.

⁵ Lolo ng’om’okinyo asamba wanya, kel’ende uole Nzakomba, okaya bant’auma la mpafula, ko ntafelaka lofeli; ko boko wifokaema el’ende.

⁶ Lolo kel’ende uole nd’imeezo, nk’okakaano; el’end’okakaana ale ngole basi ba lieke j’okwa bafukyama l’ompompo, ko baolusama l’oko.

⁷ Kela bonto ow’eleng’eko afotange wae ifamba yomba lim’ele Nkolo;

⁸ bonto owa nkai ife, onanonga nda baoyi’akae bauma.

⁹ Lolo kela lilongo osotsama akumy’ekumya nda mpifo ekae e’enene:

¹⁰ ko kela boaci akumy’ekumya eki’nd’osotsamaka; el’ende ifimana nga lobya j’ailo.

¹¹ Ele jefa jokya ko joala la wane mongo, ko jonyeeza bailo, ko lobya ja bako jokwa, ko lituka j’elenge ea loko jofitana; o ngoko boaci ifofitana nda bikendelo bikae.

¹² Bonto ondik’otema nda lomeko aokem’ekemo, el’ende, a end’osimam’olotsi, ifamba likuka ja loiko, liki Nkolo ocikelaka iy’andok’ende eefe elaka.

¹³ Amekama bonto lomeko, kel’ende afosange, Emi mmekama la Nzakomba; ele Nzakomba ntamekamaka la bebe, ko ende mongo afomeke bonto nye:

¹⁴ lolo wengi’onto aomekama, a end’obelama la mposa ekae mongo eleki, ko aolongama jongo l’eko.

¹⁵ Nkako mposa eko ae eko ofoswa jemi, eota joi j’obe: ko joi j’obe, ae liko osekwa, joot’iwa.

¹⁶ Talofombamake, balongo’akami balangema.

¹⁷ Wengi ekaelo e’olotsi la wengi nganji endelama kolongo ele lim’aliko, ko ekitela lim’ele Ise ea fole euma, otacikwanaka, ko ofa la lililingi likelama la nkengwana.

¹⁸ La wango bokae mongo aotoota la joi ja nsosolo, wet’iso toyaleme bamuka ba joso ba bako baki’nd’oemaka.

¹⁹ Inyo lea joi line, balongo’akami balangema. Lolo kela wengi’onto oke nkaola, afotefele nkaola, afoke nkele nkaola,

²⁰ ele nkele e’onto efieza liongi ja Nzakomba.

²¹ Nd’ewela eko, limolaka baoyi’auma ba linyamo la bofula wa nkele e’onkita, ko lambaka la linsimi joi lindonama el’inyo, liikyeya belimo’ekinyo.

²² Lolo loyalemaka bakeli ba joi, afa baoki kika, o ngoko lofomb’inyo mongo.

²³ Nd’ewela wae nga bonto ale woki owa joi ko afa bokeli, asongi la bonto oal’elongi ekae mongo nda talatala:

²⁴ el’ende aal’ende mongo, ko aokenda, ko nkakoyoko aolofela elenge ekae mongo eki’nde.

²⁵ Lolo ende ondengela esekyelo endelama kolongo, wete esekyelo ea esikwelo, ko akongoengela ngoko, ko afoyaleme woki ondofela, lolo bokeli okamb’olemo, bont’one ifokem’ekemo nd’ekeelo ekae.

²⁶ Ayaka bonto nko loswele atanga wae ende mongo ale bomemyi owa Nzakomba, ko afosuke loleum lokande, lolo afomba botema’okae, ememyelo ea Nzakomba ememya bont’one ele o mpampa.

²⁷ Ememyelo ea nsosolo l’ea feto nda joso ja Nzakomba ekiso, Ise, ele ngone, mbaiza ea biciki la bituka nda bielo bikiyo, ko mpafonga e’omongo nko lianda lim’aoyi b’okili.