Tito 1 - BONKANDA WA NZAKOMBA W’AEYOKO

¹ PAULO, bokwala owa Nzakomba, l’ekima ea Yesu Masiya, eleng’ele imeezo ea basonami ba Nzakomba la njea ea nsosolo eko eleng’ele mamemya ea Nzakomba,

² nda lolendezo ja loiko lotasilaka, loki Nzakomba, otafombaka, ocikak’elaka nda joso ja bikeke biuma:

³ lolo nda bikeke bikae mongo aoleneya joi likande fole, nda nsango e’olotsi ekitsamaki el’emi eleng’ele bosise wa Nzakomba, Boikyi’okiso;

⁴ ele Tito, bona’okami owa nsosolo nd’imeezo ekis’auma: Boya la kuci lim’ele Nzakomba Ise la Masiya Yesu, Boikyi’okiso.

⁵ Nkocikaki we nda Kulete nd’ewela ene, wae oongya baoyi baciki, ko w’ile bampaka b’Ekelesia nda wengi bonanga elenge eki’m’okolakaka:

⁶ ayak’onto afa la likambo ja lofeli, ale bome owa waji’omoko, ko ale la bana bandimeza bafoandema nd’akambo ba jenge j’obe la botendo.

⁷ Eji wete Wesanyi ayaleme bonto ofa la likambo ja lofeli ngole bofongi owa Nzakomba; ofa la bompokotoi, ofoke nkele nkaola, otalangwaka la vina, ofokund’anto, ofoke nkito ea linyamo mposa,

⁸ lolo ayaak’anto boya, bolangi ow’olotsi, ole la lokai ja wanya, bonto ow’oeko, bonto owa bonkomete;

⁹ okatemela joi ja nsosolo lile eleng’ele lilako liko, wae akuseya lokemya banto, nda lilako lionga, ko alomol’iy’andikya bikoli.

¹⁰ Ele bam’ant’auke bale ba botendo, batefela baoyi basamba ncina, ko la bafombi b’anto, baleki wete bako batenama nsonge, eji wae bemwa bekiyo beumbame;

¹¹ iyo bungusanya tolongo touma ta banto, balaka baoyi bafeji o nd’ewela ea nkito ea linyamo.

¹² Omo’okiyo, nkanga ekiyo mongo, aokela, Ba-Kulete bale bafombi b’ampulu bikeke biuma; nyama y’obe; balei ba toma ba mponye.

¹³ Bomwa’one bole nsosolo. Nd’ewela ene, w’afele la bolo, wete baonge nd’imeezo eko,

¹⁴ ko bafokoza bekolo bia Ba-Yuda, la besise bi’anto baututala nsosolo eko.

¹⁵ Baoyi’auma bale feto el’anto ba feto; lolo nko joi limoko lile feto el’anto ba linyamo l’el’iy’afimeza: lolo lokai lokiyo la juge e’otema ekiyo baofitana la linyamo.

¹⁶ Iyo bakela wae bea Nzakomba; lolo baoloangana l’eketo bekiyo, bale banto ba linyamo mongo, ko ba botendo, ko nda wengi bolemo w’olotsi iyo bumbama nda lomeko.