Matayo 1 - BONKANDA WA NZAKOMBA W’AEYOKO

¹ BONKANDA wa lioci ja Yesu Masiya, bona owa Dawidi, bona owa Abalayama.

² Abalayama aotaki Yisaka; ko Yisaka aotaki Yakoba; ko Yakoba aotaki Yuda l’atomolo’akande;

³ ko Yuda aotaki Pelese la Zela, bana ba Tamala; ko Pelese aotaki Eselone; ko Eselone aotaki Lama;

⁴ ko Lama aotaki Aminadaba; ko Aminadaba aotaki Nasona; ko Nasona aotaki Salomona;

⁵ ko Salomona aotaki Boaza, bona owa Laba; ko Boaza aotaki Obede, bona owa Luta; ko Obede aotaki Yisai;

⁶ ko Yisai aotaki Dawidi bokulaka owa roi. Ko Dawidi aotaki Solomona, bona owa bomoto oki waji owa Uliya;

⁷ ko Solomona aotaki Labama; ko Labama aotaki Abiya; ko Abiya aotaki Asa;

⁸ ko Asa aotaki Yosapata; ko Yosapata aotaki Yolama; ko Yolama aotaki Uziya;

⁹ ko Uziya aotaki Yotama; ko Yotama aotaki Aza; ko Aza aotaki Izikiya;

¹⁰ ko Izikiya aotaki Manase; ko Manase aotaki Amona; ko Amona aotaki Yosiya;

¹¹ ko Yosiya aotaki Yekonya l’akune’akande nd’ekek’ek’iy’otombamaka nda Babela.

¹² Nd’afeka, ak’iy’otombamaka nda Babela, Yekonya aotaki Salatiele; ko Salatiele aotaki Zelubabela;

¹³ ko Zelubabela aotaki Abiuda; ko Abiuda aotaki Eliyakima; ko Eliyakima aotaki Azola;

¹⁴ ko Azola aotaki Sadoka; ko Sadoka aotaki Akimi; ko Akimi aotaki Eliyuda;

¹⁵ ko Eliyuda aotaki Eleazala; ko Eleazala aotaki Matana; ko Matana aotaki Yakoba;

¹⁶ ko Yakoba aotaki Yosefa bome owa Malia, ootaki Yesu, otangema Masiya.

¹⁷ Eleng’eko ndatsa Abalayama la Dawidi baoci jom la banei; ko ndatsa Dawidi Fekeke ek’iy’otombamaka nda Babela baoci jom la banei; koko ndatsa ekeke ek’iy’otombamaka nda Babela la Masiya baoci jom la banei.

¹⁸ Eotswelo eki Yesu Masiya eki ngone; aki nyango ekande Malia oandema la Yosefa, ataf’iy’oalana, aki la jemi la Bolimo w’olotsi.

¹⁹ Koko Yosefa, bome’okande, aki bonto owa liongi, ko ntalanga ooky’ende nsoi l’esayenge, asangya oimol’ende la lokuko.

²⁰ Lolo aki’nd’okanela baoyi’ane, bala, ekima ea Yawe aolenya el’ende nda liloto, aokela, Yosefa, bona owa Dawidi, toangake wae okole Malia ayale waji’oke: ende aofoswa jemi la Bolimo w’olotsi.

²¹ Ko ende ifoota bona owa jende, ko wifil’ende lina YESU: el’ende ifoikya banto’akande lim’aoyi’obe’akiyo.

²² Baoyi’ane bauma baoliela wete baoyi baki Yawe osangaka la boteli bakelame, aokela,

²³ Bala, bomoto otafoala jende ifofoswa jemi, ko ifoota bona owa jende, Ko bifil’ende lina Imanwele; lile wae Nzakomba ale l’iso.

²⁴ Yosefa aoetswa lim’ais’ilo, ko aokela ngoki ekima ea Yawe olakaka, ko aokola waji’okande:

²⁵ ko ntoal’ende, elaka nko aoota bona owa nsomi owa jende, ko aoloila lina YESU.