Filemona 1 - BONKANDA WA NZAKOMBA W’AEYOKO

¹ PAULO, loanga ja Masiya Yesu, la Timoteo lilongo likiso, ele Filemona olangema l’iso ko oamana l’iso nd’olemo,

² la Apia nkana ekiso, la Alukipo oamana l’iso nd’etumba, ko ele Ekelesia ele nd’ilombe ike;

³ Boya la kuci el’inyo lim’ele Nzakomba Ise ekiso, ko la Nkolo Yesu Masiya.

⁴ Nsima Nzakomba ekami boya wengi’aefa, nkoanda nda beondo bekami,

⁵ ndoka nsango ea eefe eke ea lolango, l’imeezo endimeza we Nkolo Yesu, ko la ba-boeko bauma;

⁶ wae esangano e’imeezo eke eonge nda njea ea wengi joi j’olotsi lil’el’iso nd’eloko ea Masiya.

⁷ El’emi njoata bosalangano la ncicima bouke, lilongo, nd’ewela ea eefe ekawe ea lolango, eki betema bia ba-boeko ocicimaka la we.

⁸ Nd’ewela eko, mpeka la nde la nkaso ele Masiya wae nkosangele joi lindeji, lolonde nd’eloko ea eefe ea lolango,

⁹ emi Paulo, mpaka mongo, ko aeyoko loanga ja Yesu Masiya, nkoonda we o mbaonda:

¹⁰ ko nkoonda nd’eloko ea bona’okami oki’m’ootaka nd’onyolo bokami, wete Onesimo;

¹¹ ende ntakoatela nkito nda joso, lolo aeyoko atoatela nkito, we l’emi;

¹² njolouteya ende mongo, wae botema’okami mongo;

¹³ ndangaki wae ndosuk’ende el’emi, wete ansaele nd’onyolo wa Nsango e’olotsi o nd’eloko eke;

¹⁴ lolo ncilanga lokela joi limo, eki’mi ncoka bomwa’oke; wae liota likawe lifoyaleme ja nkamema, lolonde ja wango boke mongo.

¹⁵ Nkin’ende akafwanaki la we fele la ncina wete w’oate seko:

¹⁶ afa lenkina ngole bokwala, lolo ofend’okwala, wete lilongo olangema l’emi bouke ko la we bouke wa ndekola, la jonge l’ele Nkolo.

¹⁷ Ayaka w’ontanga lilongo mongo w’oamb’ende nga w’onjamb’emi mongo.

¹⁸ Lolo ng’ende akokeelaki joi j’obe, nkin’ale l’ombale’oke, onkay’emi likambo ja baoyi’aso;

¹⁹ emi Paulo nkota joi line la likata likami mongo, njifokosombola bako; wae mpokokele wete ole l’ombale’okami, wae we mongo.

²⁰ Onde, lilongo, kela mbate bosalangano nd’ewela eke ele Nkolo; cicimya botema’okami ele Masiya.

²¹ Andimez’emi wae wifonjokoza, nkokotela we, el’emi njolea wete wifofenda baoyi bakosangel’emi.

²² Lolo onjeleza boyalo, el’emi nde la lolendezo wae nd’ewela ea beondo bekinyo njifokaema el’inyo.

²³ Epafula, oamana l’emi nd’onyolo ele Masiya Yesu akuola;

²⁴ ende la Malako la Alisitaluko la Dema la Luka, baamana l’emi nd’olemo.

²⁵ Boya wa Nkolo ekiso Yesu Masiya boyale l’olimo’okinyo. O ngoko.