Eneyelo 1 - BONKANDA WA NZAKOMBA W’AEYOKO

¹ ENEYELO ea Yesu Masiya eki Nzakomba okaak’ende wae eneya bakwala’akae baoyi’aso bandiela nk’elingi, ko atomaki ekima ekae ea loola ko ende aeneyaki bokwala’okae, Yoane,

² osangaki joi ja Nzakomba ko la nsango eki Yesu Masiya, wete baoyi’auma baki’nd’oenaka.

³ Ende oanda, l’iy’andoka baoyi ba lotelo lone, ko bafonga baoyi bakotam’eko, bakem’ekemo: ele ekeke eotutama.

⁴ Yoane ele Bikelesia nsambo bile nda Asia; boya el’inyo la kuci lim’el’ende oyalema, ko oki eko, ko oyalema seko; ko lim’ele Belimo nsambo bele nda joso ja ngwende ekande,

⁵ ko lim’ele Yesu Masiya, wae Temoin ea nsosolo, Nsomi lim’ele bawei, Bokulaka owa Roi owa bakulaka b’okili ba rois. El’ende otok’eefe ko atotungolaki lima baoyi’obe bakiso l’alongo’akae mongo;

⁶ ko atokelaki wae toyale likulaka ko la nkanga ele Nzakomba, Ise ekande; el’ende jilangi la mpifo bikeke la bikeke. O ngoko.

⁷ Bala! aoya l’atute, wengi liso lifoen’ende, ko l’iy’andookaki mbaoka ngoko; ko baoci bauma b’okili bifolela nd’ewel’ekae. Onde, o ngoko.

⁸ Yawe Nzakomba akela, Emi nde Alpha la Oméga, Ende oyalema, ko oki eko, ko oyalema seko, Nzakomba ea mpamba euma.

⁹ Emi Yoane, ole lilongo likinyo, oamana l’inyo nd’elo, ko nda likulaka ko nd’ikelo e’otema ele Yesu, nki nd’ekole etangema Patemo nd’ewela ea joi ja Nzakomba, ko nd’ewela ea nsango ea Yesu.

¹⁰ Emi nki nda Bolimo nda Mbile ea Nkolo, ko ndokaki lofoso j’onene nga bolola nd’afeka’akami,

¹¹ loko lokelaki, Kotaka baoyi bandena we nd’onkanda, ko sokoza boko ele Bikelesia nsambo; nda Efeso, la Semuluna, la Pelungamona, la Twatila, la Saludi, la Filadelufiya, la Laodikiya.

¹² Koko nkengwanaki wete njene lofoso lotefelaki l’emi, ko aki’m’okengwanaka, ndenaki biilelo bia totswa bia wolo nsambo,

¹³ ko nd’etei ea biilelo bia totswa nsambo Omo oki ngole Bona ow’onto, olota bonkoto bokita nd’akaka ko la bosenge wa wolo bolembama nda ntolo.

¹⁴ Botsa’okande la babwo’akande baki fe nga nkunza ya mpate, nga neige, ko baiso’akae baki nga tsa toyofete;

¹⁵ bakaka’akae baki nga konga engesa, nga etumbamaki nd’etumbelo; ko lofoso lokande loki nga lofoso ja basi’auke;

¹⁶ akitaki tooci nsambo nda likata likae j’elome, ko ifaka y’etumba ya bempempe befe bia mpia mongo iolola lim’omwa’okande; ko elongi ekande eki ngole jefa lingesa la mpamba ea liko.

¹⁷ Aka’m’oenak’ende, nkweki nd’akaka’akae nga bonto owei. Afyaki likata likae j’elome el’emi, ko akela, Toangake, Emi nde owa joso, ko ow’afeka,

¹⁸ ko la Oyoike; mbwaki, ko bala, njoike seko; ko mbata nsete ya Iwa la ya Adese.

¹⁹ Nd’ewel’eko, kotaka baoyi baki w’oenaka, ko la bako bacw’okelama nd’afeka;

²⁰ wisisa wa tooci nsambo toki w’oenaka nda likata likami j’elome la biilelo bia totswa bia wolo nsambo. Tooci toko nsambo tole wae bikima bia Bikelesia nsambo, ko biilelo bia totswa nsambo bile Bikelesia nsambo.