2 Yoane 1 - BONKANDA WA NZAKOMBA W’AEYOKO

¹ MPAKA ele bomoto owa mpifo osonami ko l’ele bana’akande, bandok’emi eefe nda nsosolo: ko af’emi kika, lolo iy’andea nsosolo eko bauma;

² nd’eloko ea nsosolo eko eyal’el’iso ko ifoyala l’iso bikeke biuma.

³ Boya l’isei la kuci bifoyala l’iso, lim’ele Nzakomba Ise, ko lim’ele Yesu Masiya Bona ow’Ise, nda nsosolo l’eefe.

⁴ Nsalangana bouke eki’m’otanaka bana’ake bamo bayokende nda nsosolo, eieng’ek’is’oambaka bosise lim’el’Ise.

⁵ Aeyoko nkoonda we, bomoto owa mpifo, afa nga nkokotela bosise w’aeyoko, lolo boko bok’is’oataka lim’iango, wae tokan’eefe.

⁶ Ene wae eefe ea lolango, wete tokende eleng’ele besise bekae. Bone wae bosise boko ngok’iny’ookaka lim’iango, wae lokende la boko.

⁷ Ele bafombi bauke baoliela nd’okili; wae iy’afimeza l’omwa wae Yesu Masiya aoya nda jonge. One wae bofombi’oko ko la osuka-Masiya.

⁸ Loalak’inyo mongo wae lofocweya belemo bek’is’okambaka, lolo lambe ndako ea mpafula.

⁹ Os’olekana ko afoyaleme nda lilako ja Masiya, ende afoate Nzakomba: ende oyaleme nda lilako liko, bont’oko aata Ise ko la Bona.

¹⁰ Ayak’onto ay’el’inyo ko afoyele lilako line, taloambake nd’ilombe ikinyo, ko talosambelake:

¹¹ el’ende ondosambela aamana l’ende nd’eketo bekande bi’obe.

¹² El’emi mbat’aoyi’auke ba em’okokotela, mpange lokota la papier la boko: lolonde ndendeza wae nje el’inyo ko totefelana bomwa l’omwa wae ekemo ekinyo efule o mpafula.

¹³ Bana ba eoto eke e’omoto osonami bakuola.