Romanos 1 - Jiñi Tsiji' bʌ Wen T'añ cha'añ Estudio

I TEJCHIBAL ( 1.1-15 ) Cortesía tac

¹ Joñon Pablo, x'e'telon i cha'añ Jesucristo, pʌybilon cha'añ mic chojquel majlel ti subt'añ. Dios tsi' ña'ta i c'ʌñon cha'añ mic su'b jiñi wen t'añ,

² jiñʌch jiñi tsa' bʌ i wʌn su'bu Dios ti' tojlel x'alt'añob ti Ch'ujul bʌ i Ts'ijbujel.

³ Jiñi wen t'añ jiñʌch i Yalobil Dios, lac Yum Jesucristo tsa' bʌ i yila pañimil ti' bʌc'tal tilem bʌ ti' p'olbal David.

⁴ Tsa' tsictiyi i Yalobilʌch Dios ti' p'ʌtʌlel yic'ot ti' sʌclel i yEspíritu Dios che' bʌ tsa' tejchi loq'uel ba'añ chʌmeño' bʌ.

⁵ Ti Jesucristo tsi' yʌq'ueyon lojon i yutslel i pusic'al yic'ot tsi' yʌq'ueyon lojon que'tel che' bajche' apóstol, cha'añ mic su'ben lojon wiñicob x'ixicob ti pejtelel pañimil cha'añ mi' ñopob Jesucristo,

⁶ jatetla ja'el pʌybiletla cha'añ mi la' wochel ti' cha'añ Jesucristo.

⁷ Ti la' pejtelel añet bʌ la ti Roma, c'uxbibiletla i cha'añ Dios tsa' bʌ i pʌyʌyetla cha'añ mi la' wochel ti ch'ujul: La' i yʌq'ueñetla Dios lac Tat yic'ot lac Yum Jesucristo i yutslel yic'ot i ñʌch'tʌlel la' pusic'al.

Pablo yom majlel ti Roma

⁸ Ñaxan mic su'ben wocolix i yʌlʌ Dios ti Jesucristo cha'añ pejteletla, come woli ti ajlel ti pejtelel pañimil bajche' tsa' la' ñopo Cristo.

⁹ Jiñi Dios mu' bʌ c melben i ye'tel ti' pejtelel c pusic'al, che' mic su'b jiñi wen t'añ cha'añ i Yalobil; yujil cha'añ woli c chʌn ña'tañetla ti pejtelel ora che' mic pejcan ti oración.

¹⁰ Woli c chʌn c'ajtiben Dios j coltʌntel, mi che' yom cha'añ mic mejlel ti majlel ba'añetla cha'añ la' jula'tʌntel,

¹¹ come com j q'ueletla, cha'añ mi cʌq'ueñetla la' cʌn la' majtañ ch'oyol bʌ ti Espíritu, cha'añ mi la' xuc'chocontel;

¹² com j q'ueletla cha'añ mi lac tem ñuq'uesʌben lac bʌ lac pusic'al, come ti jump'ejl lac pusic'al woli lac ñop.

¹³ Pero com mi la' ña'tan hermañujob, añix ora woli c ña'tan c tilel ba'añetla cha'añ mi' p'ojlel xñopt'añob ti la' tojlel che' bajche' ti' tojlel yaño' bʌ gentilob, pero c'ʌlʌl wʌle añ chuqui tsi' mʌctayon.

¹⁴ Come añ tic wenta jiñi wen t'añ cha'añ mic su'beñob griegojob yic'ot mach bʌ griegojobic, jiñi año' bʌ i ña'tʌbal yic'ot jiñi mach bʌ añobic i ña'tʌbal.

¹⁵ Jiñi cha'añ mic ña'tan lʌc'ʌlix mi caj c su'beñetla ja'el jiñi wen t'añ añet bʌ la ti Roma.

1. CɅNTESA TAC: LAJ COLTɅNTEL CHE' MI LAC ÑOP ( 1.16—11.36 ) I p'ʌtʌlel jiñi wen t'añ

¹⁶ Ma'añic mic cha'len quisin cha'añ jiñi wen t'añ, come jiñʌch i p'ʌtʌlel Dios cha'añ mi' coltañ pejtelel mu' bʌ i ñopob, ñaxan jiñi judíojob, wi'il jiñi griegojob,

¹⁷ come ti jiñi wen t'añ mi' tsictiyel toj bʌ i pusic'al Dios mu' bʌ i yʌq'ueñonla che' mi lac ñop, yic'ot cha'añ chʌn xuc'ul mi lac ñop che' bajche' ts'ijbubil: “Jiñi mu' bʌ i q'uejlel ti toj cha'añ jach tsi' ñopo Dios, chʌn cuxul mi caj i yajñel”.

I mich'ajel Dios ti' contra wiñicob x'ixicob

¹⁸ Come mi' tsictiyel i mich'ajel Dios ya' ti panchan, ti' contra pejtelel xmulilob yic'ot ti' tojlel pejtelel mach bʌ añic mi' melob chuqui toj come mi' mʌctañob isujmlel ti' jontolilob,

¹⁹ come mi' mejlel i cʌñob chuqui tac pʌsbebilob ti Dios ila ti pañimil, come Dios tsi' tsictesʌbeyob.

²⁰ Anquese ma'añic mi laj q'uel ti lac wut, tsiquil i p'ʌtʌlel yic'ot i ña'tʌbal, come c'ʌlʌl ti' cajibal pañimil tsiquil añʌch Dios, come tsiquil ti' melbal. Jiñi cha'añ bʌjobʌch i bʌ che' ma'añic mi' ñopob.

²¹ Anquese tsi' cʌñʌyob Dios, ma'añic tsi' ch'ujutesayob, ma'añic tsi' su'beyob wocolix i yʌlʌ. Tsa' utsi asiyiyob ti' bajñel ña'tʌbal yic'ot tsa' p'ojliyob i tontojlel i pusic'al.

²² Che' bʌ tsi' lon ña'tayob ca'bʌlobʌch i ña'tʌbal, tsa' utsi ochiyob ti tonto,

²³ come tsi' q'uextayob i ñuclel Dios mach bʌ yujilic jilel ti' yejtal wiñic yujil bʌ jilel, yic'ot ti' yejtal te'lemut tac, yic'ot ti' yejtal jiñi cotol tac bʌ, yic'ot ti' yejtal jiñi jʌlʌcña bʌ mi' majlel.

²⁴ Jiñi cha'añ Dios tsi' cʌyʌyob ti' ts'i'lel, come wo'atax i pusic'alob ti mulil, quisintic jax bajche' tsi' c'ʌñʌyob tac i bʌc'tal,

²⁵ come tsi' q'uextʌbeyob isujmlel Dios ti jiñi mach bʌ isujmic, tsi' ch'ujutesayob jiñi melbil tac bʌ, tsi' melbeyob i q'uiñilel. Ma'añic tsi' ch'ujutesayob Dios tsa' bʌ i mele pejtelel chuqui tac añ, jiñi yom bʌ mi' sujbel i ñuclel ti pejtelel ora. Amén.

²⁶ Jiñi cha'añ Dios tsi' cʌyʌyob, come woli' melob quisintic jax bʌ i colosojlel i pusic'alob, come jiñi x'ixicob i cha'año' bʌ tsi' cʌyʌyob i c'ʌjñibal wiñicob, tsi' laj bʌ pi'leyob i bʌ.

²⁷ Che' ja'el wiñicob tsi' cʌyʌyob i c'ʌjñibal x'ixicob, wo'ob jax ti' ts'i'lel, tsi' wʌlʌc pi'leyob i bʌ, quisintic jax bajche' tsi' meleyob che' bʌ tsi' laj bʌ pi'leyob i bʌ, jiñi cha'añ tsa' aq'uentiyob i tojol i mul che' bajche' añob i jontolil.

²⁸ Come mach yomobic i wis ña'tan Dios, jiñi cha'añ Dios tsi' cʌyʌyob cha'añ mi' ña'tañob chuqui tac bi'bi' yic'ot cha'añ mi' cha'leñob chuqui tac mach bʌ weñic.

²⁹ But'ulob ti jujunchajp jontolil, [ti ts'i'lel,] ti mulʌntel chu'bʌañʌl, yic'ot ts'a'leya; but'ulob i pusic'al ti' tsʌytsʌyñʌyel cha'añ i wenlel i pi'ʌlob, yic'ot ti tsʌnsa, yic'ot ti leto, yic'ot ti lotiya, yic'ot ti u'yaj t'añ tac.

³⁰ Mi' cha'leñob wulwul t'añ yic'ot mi' p'olob t'añ ti' contra yaño' bʌ, mi' ts'a'leñob Dios, mi' p'ajob i pi'ʌlob, mi' q'uelob i bʌ ti ñuc, mi' wen chañ-esañob i bʌ, mi' ña'tan i melob jontolil, mi' ñusʌbeñob i t'añ i tat i ña',

³¹ tontojob, mach xuc'ulobic i pusic'al, mach yujilobic c'uxbiya, ma'añic mi' jac'ob i toj-esʌntel, mi p'untaya.

³² Anquese yujilobix cha'añ tsa'ix i yʌc'ʌ mandar Dios cha'añ mi' chʌmel jiñi mu' bʌ i mel bajche' jiñi, pero mi' chʌn melob, yic'ot tijicña mi' yu'bin che' mi' q'uel mu' bʌ i cha'leñob mulil.