Judas 1 - Jiñi Tsiji' bʌ Wen T'añ cha'añ Estudio

I yutslel i t'añ

¹ Joñon Judas, x'e'telon i cha'añ Jesucristo, i yijts'iñon Jacobo, woli c ts'ijbubeñetla ili juñ pʌybilet bʌ la, c'uxbibilet bʌ la i cha'añ Dios lac Tat, cʌntʌbiletla i cha'añ Jesucristo.

² La' p'ojlic la' p'untaya yic'ot i ñʌch'tʌlel la' pusic'al yic'ot la' c'uxbiya.

Mach bʌ isujmic bʌ cʌntesa tac yic'ot lot bʌ xcʌntesajob

³ C'uxbibil bʌ quermañujob ti Cristo, añix ora tsa' c ña'ta c ts'ijbubeñetla isujmlel laj coltʌntel am bʌ lac cha'añ ti lac Yum. Pero wʌle yomix mic ts'ijbubeñetla cha'añ mic xic'beñetla, come yom mi la' cha'len wersa cha'añ jiñi isujm bʌ t'añ tsa' bʌ junyajlel aq'uentiyob i cha'año' bʌ Dios cha'añ mi' ñopob.

⁴ Come lamital wiñicob tsa' mucul ochiyob cha'añ mi' xʌbob i bʌ yic'ot hermañujob. Wʌn ña'tʌbil bʌ i cha'añ Dios cha'añ mi caj i yochelob ti tojmulil jiñi wiñicob jontolo' bʌ, mu' bʌ i socob jiñi wen t'añ yic'ot i yutslel i pusic'al Dios cha'añ mi' melob mulil. Ma'añic mi' ñopob Dios jiñi ñuc bʌ yumʌl ti pejtelel pañimil yic'ot ma'añic mi' ñopob lac Yum Jesucristo.

⁵ Com c cha' c'ajtesʌbeñetla, anquese la' wujilix. Lac Yum tsi' colta pejtelel jiñi israelob ti Egipto, pero ti wi'il tsi' jisa jiñi mach bʌ añic tsi' ñopoyob.

⁶ Jiñi ángelob ja'el mach bʌ añic tsi' cʌntayob i ye'tel yic'ot i ñuclel tsi' cʌyʌyob i yajñib, Dios tsi' cʌchʌyob ti cadena cha'añ mi' cʌytʌlob ti ic'ch'ipan bʌ pañimil ti pejtelel ora, c'ʌlʌl jinto ti jiñi ñuc bʌ i q'uiñilel meloñel.

⁷ Che' ja'el Sodoma yic'ot Gomorra, yic'ot yam bʌ tejclum tac am bʌ ti' joytʌlel, tsi' tajayob i yixic, tsi' wʌlʌc pi'leyob i bʌ, pero tsi' tojoyob i mul ti c'ajc mach bʌ añic mi' jilel. Jiñi cha'añ yom mi lac chʌcʌ q'uel lac bʌ, come che'ʌch mi caj i jilelob jiñi mu' bʌ i socob i bʌ.

⁸ Che' ja'el jiñi wiñicob x'ixicob, ñijcʌbilob cha'añ chuqui mi' q'uelob che' bajche' ti ñajal, mi' bi'b-esañob i bʌ, mi' ts'a'leñob jiñi año' bʌ i ye'tel, mi' p'ajob jiñi ñuco' bʌ ti panchan.

⁹ Pero ma'añic tsi' chañ-esa i bʌ Miguel, jiñi c'ax ñuc bʌ ángel ti' tojlel jiñi xi'ba che' bʌ tsi' contrajiyob i bʌ che' bʌ tsi' cʌlʌx pejcayob i bʌ cha'añ i bʌc'tal Moisés; ma'añic tsi' yʌc'ʌ i bʌ cha'añ mi' su'b i mul jiñi xi'ba, tsa' jach i yʌlʌ: La' i tiq'uet lac Yum, che'en.

¹⁰ Pero ili wiñicob mi' p'ajob chuqui tac mach cʌmbilic i cha'añob, lajalob i melbal che' bajche' bʌte'el mach bʌ añic i ña'tʌbal.

¹¹ ¡Mi caj i tajob wocol! Come tsi' cha'leyob tsʌnsa che' bajche' Caín, tsi' junyajlel ac'ʌyob i bʌ ti' sajtemal Balaam cha'añ yomob ganar, tsa' jiliyob che' bajche' Coré cha'añ tsi' contrajiyob Dios.

¹² Leco mi' melob ti la' tojlel ili wiñicob che' mi la' tem cha'len we'el. Mach yujilobic quisin che' mi' c'uxob we'elʌl la' wic'ot; x'e'telobʌch pero mi' bajñel we'sañob i bʌ; lajalob bajche' tocal mach bʌ añic i ya'lel mu' bʌ i wets' ñumel ic'; lajalob bajche' tiquin bʌ te' mach bʌ añic tsi' yʌc'ʌ i wut che' ti' yorajlel, bojquemix, chʌmeñobix ti cha'yajlel.

¹³ Lajalob bajche' bʌbʌq'uen jax bʌ sʌcwʌlan bʌ ja' ti colem mar mu' bʌ i yʌc' bi'bi' jax bʌ i lojc. Lajalob bajche' ec' mu' bʌ i sajtel ti' bijlel. Lotbilob cha'añ mi caj i yajñelob ti c'ax i'ic' bʌ ac'ʌlel ti pejtelel ora.

¹⁴ Enoc i wʌclajmlel i p'olbal Adán, tsi' wʌn alʌ cha'añ jiñi wiñicob: Tsa' tili lac Yum yic'ot bajc'ʌl ch'ujulo' bʌ i cha'añ,

¹⁵ cha'añ mi' i cha'len meloñel ti' tojlel wiñicob x'ixicob. Tal i su'beñob i mul pejtelel xñusa Diosob cha'añ pejtelel i jontolil yic'ot pejtelel tsʌts bʌ t'añ tsa' bʌ i su'buyob ti' contra lac Yum jiñi xmulilob tsa' bʌ i ñusayob Dios, che'en.

¹⁶ Xwulwul a'leyajob, mi' jop'beñob i mul i pi'ʌlob, mi' jac'ob i colosojlel i pusic'al, mi' chañ-esañob i bʌ ti lot, mi' pejcañob wiñicob ti i t'ojol bʌ t'añ cha'añ mi' tajob chuqui yom i bajñel pusic'al.

Lac tic'ol yic'ot lac xic'bentel

¹⁷ Pero jatetla c'uxbibilet bʌ la, ña'tanla chuqui tsi' wʌn su'buyob jiñi apóstolob i cha'añ lac Yum Jesucristo.

¹⁸ Tsi' su'beyetla: Ti wi'il bʌ q'uiñ mi caj i tilel xwajleyajob mu' bʌ caj i cha'leñob xʌmbal ti' jontolil, ti' colosojlel i pusic'al.

¹⁹ Mi' t'oxob hermañujob, mi' melob chuqui yom i tsucul pusic'al, ma'añic jiñi Espíritu ti' tojlelob.

²⁰ Pero jatetla c'uxbibilet bʌ la, xuc'chocon la' bʌ ti jiñi ch'ujul bʌ t'añ woli bʌ la' ñop, pejcanla Dios ti jiñi Ch'ujul bʌ Espíritu.

²¹ Chʌn ajñenla ti' c'uxbiya Dios, chʌn pijtan la' p'untʌntel ti lac Yum Jesucristo cha'añ mi la' taj la' cuxtʌlel mach bʌ añic mi' jilel.

²² Xic'benla jiñi tilel bixelo' bʌ i pusic'al cha'añ mi' sutq'uiñob i bʌ.

²³ Coltañla yaño' bʌ, chucuyob loq'uel ti c'ajc; p'untanla yaño' bʌ yic'ot bʌq'uen ame bi'b-aquetla, ts'a'lenla i pislel bi'b-esʌbil bʌ ti mulil.

I yujtibal i yutslel i t'añ

²⁴ Añ i p'ʌtʌlel lac Yum cha'añ mi' cʌntañetla cha'añ ma'añic mi la' yajlel. Tijicña mi caj i yʌq'uetla ti' tojlel i ñuclel, sʌc-esʌbiletla ti mulil.

²⁵ Jiñi cojach bʌ Dios am bʌ i ña'tʌbal, la caj Coltaya, la' tsictiyic i ñuclel yic'ot i yumʌntel yic'ot i p'ʌtʌlel ti' tojlel lac Yum Jesucristo wʌle yic'ot ti pejtelel ora. Amén.